ಈಗ ಹೇಳಲು ಹೊರಟಿರುವುದು ನಂಬಿಕೆಯ ಪರಾಕಾಷ್ಠೆ ಎನಿಸುವಂಥ ಕ್ಷೇತ್ರವೊಂದರ ಬಗ್ಗೆ. ತರ್ಕವನ್ನು ಮೀರಿದ ಭಕ್ತಿಯ ಬಗ್ಗೆ. ಸ್ಥಳೀಯವಾಗಿ ನಡೆದುಕೊಂಡು ಬಂದಿರುವ ನಂಬಿಕೆ- ಭಕ್ತಿಯ ಸಮ್ಮಿಶ್ರಣವಾದ ಈ ದೇವಸ್ಥಾನ ಇರುವುದು ತಮಿಳುನಾಡಿನ ತಿರುಚಿರಾಪಳ್ಳಿ (ತಿರುಚ್ಚಿ) / ಪೆರಂಬಲೂರ್ ಜಿಲ್ಲೆಯ ಊಟತ್ತೂರ್ (Ootathur) ಎಂಬ ಪ್ರಶಾಂತವಾದ ಗ್ರಾಮದಲ್ಲಿ. ಇದು ಶ್ರೀ ಶುದ್ಧ ರತ್ನೇಶ್ವರರ್ ದೇವಸ್ಥಾನ. ದಕ್ಷಿಣ ಭಾರತದ ಅತ್ಯಂತ ಪವಿತ್ರ ಹಾಗೂ ಐತಿಹಾಸಿಕ ಶಿವನ ಆರಾಧನಾ ಕೇಂದ್ರಗಳಲ್ಲಿ ಇದೂ ಒಂದಾಗಿದೆ. ಈ ಕ್ಷೇತ್ರವು ತನ್ನ ಭವ್ಯ ಇತಿಹಾಸ ಮತ್ತು ವಾಸ್ತುಶಿಲ್ಪಕ್ಕೆ ಮಾತ್ರವಲ್ಲದೆ, ಭಕ್ತರ ದೈಹಿಕ ಹಾಗೂ ಮಾನಸಿಕ ಕಾಯಿಲೆಗಳನ್ನು ಗುಣಪಡಿಸುವ ದೈವೀ ಶಕ್ತಿಗೂ ಅಪಾರ ಪ್ರಸಿದ್ಧಿ ಪಡೆದಿದೆ. ಇದು ಶೈವ ಸಂಪ್ರದಾಯದಲ್ಲಿ ಅತ್ಯಂತ ಗೌರವಾನ್ವಿತವಾದ 275 ‘ಪಾದಲ್ ಪೆಟ್ರ ಸ್ಥಲಂ’ಗಳಲ್ಲಿ ಒಂದಾಗಿದೆ.
ಸ್ಥಳ ಪುರಾಣ ಮತ್ತು ಐತಿಹಾಸಿಕ ಹಿನ್ನೆಲೆ
ಶುದ್ಧ ರತ್ನೇಶ್ವರರ್ ಎಂದರೆ “ಪವಿತ್ರ ರತ್ನದಂತೆ ಹೊಳೆಯುವ ಈಶ್ವರ” ಎಂದರ್ಥ. ಇಲ್ಲಿ ಶಿವಲಿಂಗವು ಶುದ್ಧ ಮಾಣಿಕ್ಯದ (Ruby) ರೂಪದಲ್ಲಿದ್ದು, ಬ್ರಹ್ಮಾಂಡದ ಶಕ್ತಿ ಹಾಗೂ ಪವಿತ್ರತೆಯನ್ನು ಹೊರಸೂಸುತ್ತದೆ. ಐತಿಹಾಸಿಕ ಹಿನ್ನೆಲೆ ಪ್ರಕಾರ, ಚೋಳ ಸಾಮ್ರಾಜ್ಯದ ಮೊದಲನೇ ರಾಜರಾಜ ಚೋಳನ ಸೈನಿಕರು ಕಾಡಿನ ಹಾದಿಯನ್ನು ಸ್ವಚ್ಛಗೊಳಿಸುತ್ತಿದ್ದಾಗ, ಮರಳಿನ ಅಡಿಯಲ್ಲಿ ಅಡಗಿದ್ದ ಶಿವಲಿಂಗಕ್ಕೆ ಆಕಸ್ಮಿಕವಾಗಿ ಕೊಡಲಿ ತಗುಲಿ, ಅದರಿಂದ ರಕ್ತ ಬರಲಾರಂಭಿಸಿತು. ಈ ದೈವೀ ಪವಾಡವನ್ನು ಕಂಡು ಆಶ್ಚರ್ಯಚಕಿತನಾದ ರಾಜರಾಜ ಚೋಳನು ತಕ್ಷಣವೇ ಆ ಸ್ಥಳದಲ್ಲಿ ಭವ್ಯವಾದ ದೇವಸ್ಥಾನವನ್ನು ಪುನರ್ ನಿರ್ಮಿಸಿದನು. ಈ ದೇವಾಲಯದಲ್ಲಿ ರಾಜರಾಜ ಚೋಳ, ರಾಜೇಂದ್ರ ಚೋಳ ಮತ್ತು ರಾಜಾಧಿರಾಜ ಚೋಳರ ಕಾಲದ 50ಕ್ಕೂ ಹೆಚ್ಚು ಶಿಲಾಶಾಸನಗಳು ಸಿಕ್ಕಿದ್ದು, ಇದು ಚೋಳರ ಭವ್ಯ ಇತಿಹಾಸಕ್ಕೆ ಸಾಕ್ಷಿಯಾಗಿದೆ.
ಸ್ವಂತ ಮನೆ, ಸೈಟು ಖರೀದಿಗೆ ನಾನಾ ವಿಘ್ನವೇ? ಪರಿಹಾರಕ್ಕಾಗಿ ಮಣ್ಣಚನಲ್ಲೂರಿನ ಭೂಮಿನಾಥಸ್ವಾಮಿ ದರ್ಶನ ಮಾಡಿ
ಆರೋಗ್ಯ ಮತ್ತು ಕಿಡ್ನಿ ಕಾಯಿಲೆಗಳ ನಿವಾರಣಾ ಕ್ಷೇತ್ರ
ಊಟತ್ತೂರಿನ ಶುದ್ಧ ರತ್ನೇಶ್ವರರ್ ಕ್ಷೇತ್ರವು ಶರೀರದ ಆಂತರಿಕ ಜಲಮೂಲಗಳನ್ನು ಶುದ್ಧೀಕರಿಸುವ ಮತ್ತು ವಿಶೇಷವಾಗಿ ಕಿಡ್ನಿ (ಮೂತ್ರಪಿಂಡ) ಸಂಬಂಧಿತ ಕಾಯಿಲೆಗಳನ್ನು ಗುಣಪಡಿಸುವ ಅದ್ಭುತ ಶಕ್ತಿಯನ್ನು ಹೊಂದಿದೆ ಎಂಬ ಗಾಢವಾದ ನಂಬಿಕೆ ಭಕ್ತರಲ್ಲಿದೆ. ಈ ದೇವಸ್ಥಾನವು ಕೆಳಗಿನ ಆರೋಗ್ಯ ಸಮಸ್ಯೆಗಳ ನಿವಾರಣೆಗೆ ಪ್ರಸಿದ್ಧವಾಗಿದೆ:
- ಕಿಡ್ನಿಯಲ್ಲಿನ ಕಲ್ಲುಗಳು (Kidney Stones) ಮತ್ತು ಮೂತ್ರಪಿಂಡದ ಸೋಂಕುಗಳು.
- ಮೂತ್ರನಾಳದ ಸಮಸ್ಯೆಗಳು (UTI) ಮತ್ತು ಮೂತ್ರಕೋಶದ ಉರಿ ಹಾಗೂ ಉರಿಯೂತ.
- ದೇಹದಲ್ಲಿ ನೀರು ಶೇಖರಣೆಯಾಗುವುದು (Water Retention) ಮತ್ತು ಅದರಿಂದ ಬರುವ ಬಾವು (Edema).
- ರಕ್ತದ ಶುದ್ಧೀಕರಣ ಹಾಗೂ ದೇಹದಲ್ಲಿನ ವಿಷಕಾರಿ ಅಂಶಗಳ (Toxins) ಹೊರಹಾಕುವಿಕೆ.
ಜ್ಯೋತಿಷ್ಯ ಹಾಗೂ ಬ್ರಹ್ಮಾಂಡದ ಶಕ್ತಿಗಳ ಮಹತ್ವ
ವೈದಿಕ ಜ್ಯೋತಿಷ್ಯದ ಪ್ರಕಾರ, ಮನುಷ್ಯನ ಶರೀರದಲ್ಲಿನ ಜಲ ತತ್ವ ಹಾಗೂ ಮೂತ್ರಪಿಂಡಗಳ (Kidneys) ಕಾರ್ಯಕ್ಷಮತೆಯು ಚಂದ್ರ (Moon) ಮತ್ತು ಶುಕ್ರ (Venus) ಗ್ರಹಗಳ ಅಧೀನದಲ್ಲಿರುತ್ತದೆ. ಜಾತಕದಲ್ಲಿ ಚಂದ್ರ ಅಥವಾ ಶುಕ್ರ ಗ್ರಹಗಳು ದೋಷಪೂರಿತವಾಗಿದ್ದಾಗ ಕಿಡ್ನಿ ಸಮಸ್ಯೆಗಳು ಉಂಟಾಗುತ್ತವೆ. ಊಟತ್ತೂರು ಕ್ಷೇತ್ರವು ಚಂದ್ರ ಮತ್ತು ಶುಕ್ರ ಗ್ರಹಗಳ ಶಕ್ತಿಯನ್ನು ಸಮತೋಲನಗೊಳಿಸುವ ಅಪರೂಪದ ತಾಣವಾಗಿದೆ.
ಅಲ್ಲದೆ, ಆಯುರ್ವೇದ ಮತ್ತು ಸಿದ್ಧ ವಿಜ್ಞಾನದ ಪ್ರಕಾರ, ಮನುಷ್ಯನಲ್ಲಿರುವ ಸುಪ್ತ ಭಯ ಮತ್ತು ಆತಂಕವು ಕಿಡ್ನಿಗಳನ್ನು ದುರ್ಬಲಗೊಳಿಸುತ್ತದೆ. ಈ ದೇವಸ್ಥಾನದ ಪಾಸಿಟಿವ್ ಕಂಪನಗಳು ಮನಸ್ಸಿನ ಭಯವನ್ನು ದೂರ ಮಾಡಿ, ಆಂತರಿಕ ಶಾಂತಿಯನ್ನು ಕರುಣಿಸುತ್ತವೆ. ದೇವಸ್ಥಾನದ ಧ್ವಜಸ್ತಂಭದ ಬಳಿ ಸೀಲಿಂಗ್ನಲ್ಲಿ 27 ನಕ್ಷತ್ರಗಳು, 12 ರಾಶಿಗಳು ಮತ್ತು 9 ಗ್ರಹಗಳ ಕೆತ್ತನೆಗಳಿದ್ದು, ಇಲ್ಲಿ ಪ್ರಾರ್ಥಿಸುವುದರಿಂದ ಜಾತಕ ದೋಷಗಳು ನಿವಾರಣೆಯಾಗುತ್ತವೆ.
ಗುಡ್ಡಟ್ಟು ಶ್ರೀ ವಿನಾಯಕ: 10 ವರ್ಷ ವೇಯ್ಟಿಂಗ್ ಲಿಸ್ಟ್ ಇರುವ ‘ಆಯಿರಕೊಡ’ ಸೇವೆಯ ಮಹಿಮೆ!
ದೇವಸ್ಥಾನದ ಪ್ರಮುಖ ದೇವತೆಗಳು ಮತ್ತು ವಾಸ್ತುಶಿಲ್ಪದ ವೈಶಿಷ್ಟ್ಯಗಳು
- ಗರ್ಭಗುಡಿಯ ಶಿವಲಿಂಗ: ಗರ್ಭಗುಡಿಯಲ್ಲಿರುವ ಶುದ್ಧ ರತ್ನೇಶ್ವರರ್ ಸ್ವಾಮಿಯು ತಂಪಾದ ಪ್ರಾಣಶಕ್ತಿಯನ್ನು ಹೊರಸೂಸುತ್ತಾನೆ. ಭಕ್ತರು ಗರ್ಭಗುಡಿಯ ಹತ್ತಿರ ಹೋದಾಗ ಕೈಗಳಲ್ಲಿ ಒಂದು ರೀತಿಯ ತಂಪಿನ ಅನುಭವವಾಗುತ್ತದೆ ಎಂದು ಹೇಳುತ್ತಾರೆ.
- ಪಂಚನಾಧನ ನಟರಾಜ: ಇಲ್ಲಿನ ನಟರಾಜ ಮೂರ್ತಿಯನ್ನು ಅಪರೂಪದ ‘ಪಂಚನಾಧನ ಕಲ್ಲು’(Panchanadhana Stone) ನಿಂದ ಕೆತ್ತಲಾಗಿದೆ. ಈ ಕಲ್ಲು ಸೂರ್ಯನ ಕಿರಣಗಳನ್ನು ಹೀರಿಕೊಳ್ಳುವ ಮತ್ತು ವಿಶೇಷ ಔಷಧೀಯ ಗುಣಗಳನ್ನು ಹೊಂದಿರುವ ಶಕ್ತಿಯನ್ನು ಹೊಂದಿದೆ. ನಾಣ್ಯದಿಂದ ಈ ಮೂರ್ತಿಯನ್ನು ಸ್ಪರ್ಶಿಸಿದರೆ ‘ಓಂ’ ಎಂಬ ಧ್ವನಿ ಹೊರಹೊಮ್ಮುತ್ತದೆ.
- ಬ್ರಹ್ಮ ತೀರ್ಥ: ಬ್ರಹ್ಮದೇವನು ತನ್ನ ದೋಷ ನಿವಾರಣೆಗಾಗಿ ಬ್ರಹ್ಮಾಂಡದ ಎಲ್ಲಾ ಪವಿತ್ರ ನದಿಗಳ ನೀರನ್ನು ತಂದು ಇಲ್ಲಿ ಒಂದು ಪುಷ್ಕರಿಣಿಯನ್ನು ನಿರ್ಮಿಸಿದ. ಇದನ್ನೇ ‘ಬ್ರಹ್ಮ ತೀರ್ಥ’ ಎನ್ನಲಾಗುತ್ತದೆ. ಇದು ಗರ್ಭಗುಡಿಯ ಮುಂಭಾಗದಲ್ಲೇ ಇದ್ದು, ಸದಾ ಇರುವ ಜಲಮೂಲವಾಗಿದೆ. ಊಟತ್ತೂರು ಎಂದರೆ ‘ಊಟೃ’ – ಬುಗ್ಗೆ ಅಥವಾ ನೀರಿನ ಸೆಲೆ ಇರುವ ಜಾಗ ಎಂದರ್ಥ.
- ಸ್ಥಳ ವೃಕ್ಷ – ನನ್ನಾರಿ ಬೇರಿನ ಮರ: ಇಲ್ಲಿನ ಪವಿತ್ರ ವೃಕ್ಷವು ನನ್ನಾರಿ ಆಗಿದೆ. ಇದರ ಬೇರುಗಳು ಪ್ರಕೃತಿ ಸಹಜವಾಗಿ ದೇಹಕ್ಕೆ ತಂಪು ನೀಡುವ ಗುಣ ಹೊಂದಿದ್ದು, ಕಿಡ್ನಿ ಶುದ್ಧೀಕರಣದ ಔಷಧಗಳಲ್ಲಿ ಬಳಕೆಯಾಗುತ್ತದೆ.
ಹಸಿವಾದರೆ ಕೃಶವಾಗುತ್ತದೆ ಶ್ರೀಕೃಷ್ಣನ ವಿಗ್ರಹ! ತಿರುವರುಪ್ಪಿನ ಈ ಪವಾಡ ನಿಮಗೆ ಗೊತ್ತೇ?
ವಿಶೇಷ ಆಚರಣೆಗಳು ಮತ್ತು ಕಾಯಿಲೆ ನಿವಾರಣಾ ವ್ರತ
ಕಿಡ್ನಿ ಮತ್ತು ಮೂತ್ರಕೋಶದ ಸಮಸ್ಯೆಗಳಿಂದ ಬಳಲುತ್ತಿರುವ ಭಕ್ತರು ಈ ಕ್ಷೇತ್ರದಲ್ಲಿ ವಿಶೇಷ ಪ್ರಾರ್ಥನೆ ಸಲ್ಲಿಸುತ್ತಾರೆ:
- ಲಾವಂಛನ ಮಾಲೆ ಆಚರಣೆ: ಭಕ್ತರು ಸುಮಾರು 45 ರಿಂದ 48 ಕಟ್ಟುಗಳಿರುವ ಲಾವಂಛನ ಮಾಲೆಯನ್ನು ನಟರಾಜನಿಗೆ ಅರ್ಪಿಸುತ್ತಾರೆ. ನಂತರ ಬ್ರಹ್ಮ ತೀರ್ಥದ ಪವಿತ್ರ ಜಲದಿಂದ ದೇವರಿಗೆ ಅಭಿಷೇಕ ಮಾಡಿ, ಆ ತೀರ್ಥ ಪ್ರಸಾದವನ್ನು ಮನೆಗೆ ತಂದು ಸುಮಾರು 45 ದಿನಗಳ ಕಾಲ ದಿನವೂ ಸೇವಿಸುತ್ತಾರೆ. ಇದರಿಂದ ಕಿಡ್ನಿ ಕಲ್ಲುಗಳು ಕರಗಿ ಆರೋಗ್ಯ ಸುಧಾರಿಸುತ್ತದೆ ಎಂಬುದು ಭಕ್ತರ ದೃಢವಾದ ನಂಬಿಕೆಯಾಗಿದೆ. ಇದರೊಂದಿಗೆ ಎಳನೀರು ಅಭಿಷೇಕ, ಹಾಲಿನ ಅಭಿಷೇಕ ಹಾಗೂ ತುಳಸಿ ಅರ್ಚನೆಗಳನ್ನು ಸಹ ಇಲ್ಲಿ ಮಾಡಿಸಲಾಗುತ್ತದೆ.
ದೇವಸ್ಥಾನದ ಸಮಯ
ದೇವಸ್ಥಾನವು ಪ್ರತಿದಿನ ಭಕ್ತರ ದರ್ಶನಕ್ಕಾಗಿ ಬೆಳಗ್ಗೆ ಮತ್ತು ಸಂಜೆ ಈ ಕೆಳಗಿನ ಸಮಯಗಳಲ್ಲಿ ತೆರೆದಿರುತ್ತದೆ:
- ಬೆಳಗ್ಗೆ 6 ರಿಂದ ಮಧ್ಯಾಹ್ನ 12.30 ವರೆಗೆ
- ಸಂಜೆ 4ರಿಂದ ರಾತ್ರಿ 8.30 ವರೆಗೆ (ವಿಶೇಷ ಹಬ್ಬಗಳ ದಿನಗಳಲ್ಲಿ, ಪ್ರದೋಷ ಮತ್ತು ಶಿವರಾತ್ರಿಯಂದು ಪೂಜಾ ಸಮಯಗಳು ವಿಸ್ತರಣೆಯಾಗುತ್ತವೆ).
ಕರಾವಳಿಯ ವೈಕುಂಠ ಉಂಡಾರು: ವಾದಿರಾಜರು ಮೆಚ್ಚಿದ, ವಿಶ್ವವಲ್ಲಭ ತೀರ್ಥರು ಜೀರ್ಣೋದ್ಧಾರಗೊಳಿಸಿದ ಪವಿತ್ರ ಕ್ಷೇತ್ರ
ದೇವಸ್ಥಾನಕ್ಕೆ ತಲುಪುವುದು ಹೇಗೆ?
ಊಟತ್ತೂರು ಗ್ರಾಮವು ತಮಿಳುನಾಡಿನ ತಿರುಚಿರಾಪಳ್ಳಿ (Trichy) ಯಿಂದ ಸುಮಾರು 45 ಕಿ.ಮೀ ಮತ್ತು ಪೆರಂಬಲೂರ್ನಿಂದ 23 ಕಿ.ಮೀ ದೂರದಲ್ಲಿದೆ.
- ರಸ್ತೆ ಮಾರ್ಗ: ಚೆನ್ನೈ – ತಿರುಚ್ಚಿ ರಾಷ್ಟ್ರೀಯ ಹೆದ್ದಾರಿ (NH 45) ಯಲ್ಲಿ ಪ್ರಯಾಣಿಸುವಾಗ ಪಾಡಲೂರ್ (Padalur) ಎಂಬ ಸ್ಥಳ ಸಿಗುತ್ತದೆ. ಪಾಡಲೂರ್ನಿಂದ ಪೂರ್ವಕ್ಕೆ ಕೇವಲ 5 ಕಿ.ಮೀ ದೂರದಲ್ಲಿ ಊಟತ್ತೂರು ಗ್ರಾಮವಿದೆ. ತಿರುಚ್ಚಿ ಅಥವಾ ಪೆರಂಬಲೂರ್ನಿಂದ ಪಾಡಲೂರ್ಗೆ ಸಾಕಷ್ಟು ಬಸ್ ಸೌಕರ್ಯಗಳಿದ್ದು, ಅಲ್ಲಿಂದ ಆಟೋ ಅಥವಾ ಸ್ಥಳೀಯ ವಾಹನಗಳ ಮೂಲಕ ದೇವಸ್ಥಾನಕ್ಕೆ ಸುಲಭವಾಗಿ ತಲುಪಬಹುದು.
- ರೈಲು ಮಾರ್ಗ : ಹತ್ತಿರದ ಪ್ರಮುಖ ರೈಲು ನಿಲ್ದಾಣವೆಂದರೆ ತಿರುಚಿರಾಪಳ್ಳಿ ಜಂಕ್ಷನ್ (Trichy Railway Station – TPJ), ಇದು ಸುಮಾರು 45 ಕಿ.ಮೀ ದೂರದಲ್ಲಿದೆ. ಇಲ್ಲಿಂದ ಟ್ಯಾಕ್ಸಿ ಅಥವಾ ಬಸ್ ಮೂಲಕ ದೇವಸ್ಥಾನಕ್ಕೆ ಬರಬಹುದು. ಲಾಲ್ಗುಡಿ ರೈಲು ನಿಲ್ದಾಣವು ಸುಮಾರು 29 ಕಿ.ಮೀ ದೂರದಲ್ಲಿದೆ.
- ವಿಮಾನ ಮಾರ್ಗ: ಹತ್ತಿರದ ವಿಮಾನ ನಿಲ್ದಾಣವೆಂದರೆ ತಿರುಚಿರಾಪಳ್ಳಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ (TRZ). ಅಲ್ಲಿಂದ ರಸ್ತೆ ಮಾರ್ಗದ ಮೂಲಕ ಸುಮಾರು 50 ಕಿ.ಮೀ ಪ್ರಯಾಣಿಸಿ ದೇವಸ್ಥಾನವನ್ನು ತಲುಪಬಹುದು.
ಲೇಖನ- ಶ್ರೀನಿವಾಸ ಮಠ
