ವಿವಾಹಕ್ಕೆ ತಡೆಯೇ? ತಿರುವಿಡಂದೈ ನಿತ್ಯ ಕಲ್ಯಾಣ ಪೆರುಮಾಳ್ ದರ್ಶನ ಪಡೆಯಿರಿ

ವಿವಾಹ ವಿಳಂಬ ಆಗುತ್ತಿದ್ದಲ್ಲಿ ಅಥವಾ ಶೀಘ್ರವಾಗಿ ವಿವಾಹ ಆಗಲಿ ಎಂಬ ಆಕಾಂಕ್ಷೆ ಇದ್ದಲ್ಲಿ ಈಗ ಹೇಳಲು ಹೊರಟಿರುವ ದೇವಸ್ಥಾನಕ್ಕೆ ಒಮ್ಮೆ ಭೇಟಿ ನೀಡಿ. ಅಷ್ಟೇ ಅಲ್ಲ, ಅಲ್ಲಿ ಇದಕ್ಕಾಗಿ ಅನುಸರಿಸುವಂಥ ಪೂಜಾ ಕ್ರಮವನ್ನು ಸಹ ಮಾಡಿದಲ್ಲಿ ಫಲಿತಾಂಶವನ್ನು ಕಾಣಬಹುದು. ಅಂದಹಾಗೆ ಇದು ತಮಿಳುನಾಡಿನ ಪ್ರಸಿದ್ಧ ವೈಷ್ಣವ ಕ್ಷೇತ್ರಗಳಲ್ಲಿ ಒಂದಾದ ಶ್ರೀ ನಿತ್ಯ ಕಲ್ಯಾಣ ಪೆರುಮಾಳ್ ದೇವಸ್ಥಾನ. ಇದು ಭಕ್ತರ ಪಾಲಿನ ಅತ್ಯಂತ ಪವಿತ್ರ ಹಾಗೂ ಐತಿಹಾಸಿಕ ತಾಣವಾಗಿದೆ. ಮಹಾಬಲಿಪುರಂಗೆ ಸಮೀಪವಿರುವ ತಿರುವಿಡಂದೈ (Thiruvedanthai) ಎಂಬಲ್ಲಿ ಇರುವ ಈ ದೇವಾಲಯವು ಶ್ರೀವೈಷ್ಣವ 108 ದಿವ್ಯ ದೇಶಗಳಲ್ಲಿ ಒಂದಾಗಿದೆ. ಈ ಸುಂದರ ಮತ್ತು ದೈವಿಕ ಶಕ್ತಿ ಇರುವ ದೇವಸ್ಥಾನದ ಸಮಗ್ರವಾದ ಮಾಹಿತಿ ಇಲ್ಲಿದೆ:

ಐತಿಹಾಸಿಕ ಹಿನ್ನೆಲೆ 

ನಿತ್ಯ ಕಲ್ಯಾಣ ಪೆರುಮಾಳ್ ದೇವಸ್ಥಾನವು 1000 ವರ್ಷಕ್ಕೂ ಹೆಚ್ಚಿನ ಇತಿಹಾಸವನ್ನು ಹೊಂದಿದೆ.

• ವಾಸ್ತುಶಿಲ್ಪ: ಈ ದೇವಾಲಯವನ್ನು ಆರಂಭದಲ್ಲಿ ಪಲ್ಲವ ರಾಜರು 7ನೇ ಶತಮಾನದಲ್ಲಿ ನಿರ್ಮಿಸಿದರು ಎಂದು ಇತಿಹಾಸ ಹೇಳುತ್ತದೆ. ಆ ನಂತರ ಬಂದ ಚೋಳ ಅರಸರು (ಮುಖ್ಯವಾಗಿ ರಾಜರಾಜ ಚೋಳ) ದೇವಾಲಯವನ್ನು ಪುನರುಜ್ಜೀವನಗೊಳಿಸಿ, ದೊಡ್ಡದಾಗಿ ವಿಸ್ತರಿಸಿದ.
• ಶಾಸನಗಳು: ದೇವಾಲಯದ ಗೋಡೆಗಳ ಮೇಲೆ ಚೋಳರ ಕಾಲದ ಹಲವಾರು ತಮಿಳು ಶಾಸನಗಳನ್ನು ಕಾಣಬಹುದು. ಇವು ಅಂದಿನ ಕಾಲದಲ್ಲಿ ದೇವಾಲಯಕ್ಕೆ ನೀಡಲಾದ ದಾನ-ದತ್ತಿಗಳು ಮತ್ತು ಆಚರಣೆಗಳ ಬಗ್ಗೆ ಬೆಳಕು ಚೆಲ್ಲುತ್ತವೆ.
• ಆಳ್ವಾರರ ಕೀರ್ತನೆ: ತಿರುಮಂಗೈ ಆಳ್ವಾರ್ ಅವರು ಈ ಪೆರುಮಾಳ್ (ವಿಷ್ಣು) ಕುರಿತು ಮಂಗಳಾಶಾಸನಂ (ಸ್ತುತಿ ಗೀತೆಗಳನ್ನು) ಹಾಡಿದ್ದಾರೆ.

ತಿರುಪತಿ ಶ್ರೀನಿವಾಸನ ಗಲ್ಲಕ್ಕೆ ಹಚ್ಚುವ ಪಚ್ಚ ಕರ್ಪೂರ; ಅನಂತಾಳ್ವಾರ್ ಭಗವಂತನಿಗೆ ಬೀಸಿ ಎಸೆದ ಗಡಪಾರೆ!

ಸ್ಥಳ ಪುರಾಣ ಮತ್ತು ಐತಿಹ್ಯ 

ಈ ದೇವಸ್ಥಾನಕ್ಕೆ “ನಿತ್ಯ ಕಲ್ಯಾಣ ಪೆರುಮಾಳ್” (ದಿನವೂ ಮದುವೆಯಾಗುವ ದೇವರು) ಎಂಬ ಹೆಸರು ಬರಲು ಒಂದು ಪೌರಾಣಿಕ ಕಥೆಯಿದೆ.

• ಕಾಲವ ಮುನಿಯ ತಪಸ್ಸು: ಬ್ರಹ್ಮನ ಮಾನಸ ಪುತ್ರನಾದ ಕಾಲವ ಮುನಿಗೆ 360 ಹೆಣ್ಣುಮಕ್ಕಳಿದ್ದರು. ಅವರೆಲ್ಲರಿಗೂ ಯೋಗ್ಯರಾದ ವರನನ್ನು ಹುಡುಕಲಾರದೆ ಆತ ವಿಷ್ಣುವನ್ನು ಕುರಿತು ಕಠಿಣ ತಪಸ್ಸು ಮಾಡುತ್ತಾನೆ.
• ದಿನಕ್ಕೊಂದು ಮದುವೆ: ಮುನಿಯ ಭಕ್ತಿಗೆ ಮೆಚ್ಚಿದ ಮಹಾವಿಷ್ಣುವು ಒಬ್ಬ ಬ್ರಹ್ಮಚಾರಿಯ ರೂಪದಲ್ಲಿ (ವರಾಹ ಮೂರ್ತಿ) ಬರುತ್ತಾನೆ. ಮುನಿಯ ಕೋರಿಕೆಯಂತೆ ಆತನ 360 ಹೆಣ್ಣುಮಕ್ಕಳನ್ನು ದಿನಕ್ಕೆ ಒಬ್ಬರಂತೆ ವರ್ಷದ 360 ದಿನಗಳೂ ವಿವಾಹವಾಗುತ್ತಾನೆ.
• ಅಖಿಲವಲ್ಲಿ ತಾಯಾರ್: ಕೊನೆಯ ದಿನದಂದು ಭಗವಂತನು ಆ ಎಲ್ಲಾ 360 ಕನ್ಯೆಯರನ್ನು ಒಟ್ಟುಗೂಡಿಸಿ ತನ್ನ ಎಡತೊಡೆಯ ಮೇಲೆ ಕುಳ್ಳಿರಿಸಿಕೊಂಡು “ಅಖಿಲವಲ್ಲಿ ತಾಯಾರ್” (ಲಕ್ಷ್ಮಿ ದೇವಿಯ ರೂಪ) ಎಂಬ ಹೆಸರಿನಿಂದ ತನ್ನಲ್ಲಿ ಐಕ್ಯ ಮಾಡಿಕೊಳ್ಳುತ್ತಾನೆ. ತಮಿಳಿನಲ್ಲಿ ‘ತಿರು’ ಎಂದರೆ ಲಕ್ಷ್ಮಿ, ‘ಇಡಂದೈ’ ಎಂದರೆ ಎಡಭಾಗ ಎಂದರ್ಥ. ಲಕ್ಷ್ಮಿ ದೇವಿಯು ಸ್ವಾಮಿಯ ಎಡಭಾಗದಲ್ಲಿ ನೆಲೆಸಿರುವುದರಿಂದ ಈ ಜಾಗಕ್ಕೆ “ತಿರುವಿಡಂದೈ” ಎಂಬ ಹೆಸರು ಬಂದಿತು.

ತಿರುಮಣಂಚೆರಿ ಕಲ್ಯಾಣ ಸುಂದರೇಶ್ವರ ದೇವಸ್ಥಾನ | ವಿವಾಹ ದೋಷ ನಿವಾರಣೆ, ಸಂತಾನ ಯೋಗ

ಧಾರ್ಮಿಕ ನಂಬಿಕೆಗಳು ಮತ್ತು ವಿಶೇಷಗಳು

ಈ ದೇವಾಲಯವು ಭಾರತದಾದ್ಯಂತ “ವಿವಾಹ ಪ್ರಾರ್ಥನಾ ಸ್ಥಳ” ಎಂದೇ ಪ್ರಸಿದ್ಧಿಯಾಗಿದೆ.

• ವಿವಾಹ ದೋಷ ನಿವಾರಣೆ: ಜಾತಕದಲ್ಲಿ ವಿವಾಹ ದೋಷ, ರಾಹು-ಕೇತು ದೋಷ ಅಥವಾ ಯಾವುದೇ ಕಾರಣದಿಂದ ಮದುವೆ ತಡವಾಗುತ್ತಿದ್ದರೆ ಇಲ್ಲಿಗೆ ಬಂದು ಪೂಜೆ ಸಲ್ಲಿಸಿದರೆ ಶೀಘ್ರದಲ್ಲೇ ಕಲ್ಯಾಣವಾಗುತ್ತದೆ ಎಂಬ ಬಲವಾದ ನಂಬಿಕೆಯಿದೆ.
• ವಿಶೇಷ ಕಲ್ಯಾಣ ಪೂಜಾ ವಿಧಾನ: ಮದುವೆಯಾಗಬೇಕಾದ ಯುವಕ ಅಥವಾ ಯುವತಿ ಇಲ್ಲಿಗೆ ಬಂದು ಎರಡು ಹೂವಿನ ಹಾರಗಳು, ಹಣ್ಣು ಮತ್ತು ತೆಂಗಿನಕಾಯಿಯೊಂದಿಗೆ ಅರ್ಚನೆ ಮಾಡಿಸಬೇಕು. ಪೂಜೆಯ ನಂತರ ಅರ್ಚಕರು ಒಂದು ಹಾರವನ್ನು ಪ್ರಸಾದವಾಗಿ ಹಿಂತಿರುಗಿಸುತ್ತಾರೆ. ಆ ಹಾರವನ್ನು ಮನೆಗೆ ತಂದು ಭದ್ರವಾಗಿ ಇಟ್ಟುಕೊಳ್ಳಬೇಕು.
• ಕೃತಜ್ಞತೆ ಸಲ್ಲಿಕೆ: ಮದುವೆ ನಿಶ್ಚಯವಾದ ನಂತರ ಅಥವಾ ವಿವಾಹವಾದ ನಂತರ, ದಂಪತಿ ಮತ್ತೆ ಅದೇ ಹಾರವನ್ನು ತಂದು ಇಲ್ಲಿನ ಪವಿತ್ರ ತೀರ್ಥದಲ್ಲಿ (ದೇವಾಲಯದ ಕೊಳ) ವಿಸರ್ಜಿಸಿ, ದೇವರಿಗೆ ಧನ್ಯವಾದ ಅರ್ಪಿಸುವುದು ಇಲ್ಲಿನ ಪದ್ಧತಿ.

ದೇವಸ್ಥಾನದ ಸಮಯ 

ದೇವಾಲಯವು ಪ್ರತಿದಿನ ಭಕ್ತರಿಗಾಗಿ ಈ ಕೆಳಗಿನ ಸಮಯದಲ್ಲಿ ತೆರೆದಿರುತ್ತದೆ:

ಗಮನಿಸಿ: ವಿಶೇಷ ಹಬ್ಬದ ದಿನಗಳಲ್ಲಿ, ಶನಿವಾರ ಮತ್ತು ಭಾನುವಾರಗಳಂದು ಭಕ್ತರ ಸಂಖ್ಯೆ ಹೆಚ್ಚಿರುವುದರಿಂದ ದರ್ಶನದ ಸಮಯ ಸ್ವಲ್ಪ ಬದಲಾಗಬಹುದು ಅಥವಾ ವಿಸ್ತರಣೆ ಆಗಬಹುದು.

ಮದುವೆ ವಿಳಂಬವಾಗುತ್ತಿದೆಯೇ? ಶೀಘ್ರ ವಿವಾಹಕ್ಕಾಗಿ ಪಠಿಸಿ ‘ಸ್ವಯಂವರ ಪಾರ್ವತಿ ಮಂತ್ರ’

ತಲುಪುವುದು ಹೇಗೆ?

ನಿತ್ಯ ಕಲ್ಯಾಣ ಪೆರುಮಾಳ್ ದೇವಸ್ಥಾನವು ತಮಿಳುನಾಡಿನ ರಾಜಧಾನಿ ಚೆನ್ನೈನಿಂದ ಸುಮಾರು 40 ಕಿ.ಮೀ ದೂರದಲ್ಲಿ, ಈಸ್ಟ್ ಕೋಸ್ಟ್ ರೋಡ್ (ECR) ಮಾರ್ಗದಲ್ಲಿ ಇದೆ.

• ರಸ್ತೆ ಮಾರ್ಗ: ಚೆನ್ನೈನಿಂದ ಮಹಾಬಲಿಪುರಂಗೆ ಹೋಗುವ ಎಲ್ಲಾ ಬಸ್ಸುಗಳು ತಿರುವಿಡಂದೈ ಮೂಲಕವೇ ಹಾದುಹೋಗುತ್ತವೆ. ಚೆನ್ನೈನ ಪ್ರಮುಖ ಬಸ್ ನಿಲ್ದಾಣಗಳಿಂದ (CMBT ಅಥವಾ ತರಮಣಿ) ನಿಯಮಿತ ಬಸ್ ಸೌಕರ್ಯವಿದೆ. ಟ್ಯಾಕ್ಸಿ ಅಥವಾ ಸ್ವಂತ ವಾಹನದಲ್ಲೂ ಸುಲಭವಾಗಿ ತಲುಪಬಹುದು.
• ರೈಲು ಮಾರ್ಗ: ಹತ್ತಿರದ ಪ್ರಮುಖ ರೈಲು ನಿಲ್ದಾಣವೆಂದರೆ ಚೆನ್ನೈ ಸೆಂಟ್ರಲ್ ಅಥವಾ ಎಗ್ಮೋರ್. ಅಲ್ಲಿಂದ ಸ್ಥಳೀಯ ರೈಲಿನ ಮೂಲಕ ತರಮಣಿ ಅಥವಾ ಪೆರುಂಗುಡಿಯವರೆಗೆ ಬಂದು, ನಂತರ ಬಸ್ ಅಥವಾ ಟ್ಯಾಕ್ಸಿ ಹಿಡಿಯಬಹುದು.
• ವಿಮಾನ ಮಾರ್ಗ: ಚೆನ್ನೈ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣ (MAA) ಇದಕ್ಕೆ ಅತ್ಯಂತ ಹತ್ತಿರದ ವಿಮಾನ ನಿಲ್ದಾಣವಾಗಿದೆ (ಸುಮಾರು 35 ಕಿ.ಮೀ ದೂರ). ಅಲ್ಲಿಂದ ನೇರವಾಗಿ ಕ್ಯಾಬ್ ಮಾಡಿಕೊಂಡು ದೇವಾಲಯಕ್ಕೆ ಬರಬಹುದು.

ಲೇಖನ- ಶ್ರೀನಿವಾಸ ಮಠ