ಭಾವಿ ವಾಯು ಸಮೀರರರಾದ ವಾದಿರಾಜ ವೈಭವೋತ್ಸವ ಕಾರ್ಯಕ್ರಮವನ್ನು ಕುಂದಾಪುರದಲ್ಲಿ ಇರುವ ರಾಜರ ಜನ್ಮ ಸ್ಥಳ ಹೂವಿನಕೆರೆಯಲ್ಲಿ ಕಳೆದ ಮಾರ್ಚ್ ನಲ್ಲಿ ಆಯೋಜನೆ ಮಾಡಲಾಗಿತ್ತು. ಆ ಕಾರ್ಯಕ್ರಮದ ಭಾಗವಾಗಿಯೇ ಧರ್ಮ- ಆಯುರ್ವೇದ ಎರಡಕ್ಕೂ ಸಂಬಂಧಪಟ್ಟಂತೆ ದೈನಂದಿನ ಜೀವನದಲ್ಲಿ ಬರುವಂಥ ಪ್ರಶ್ನೆಗಳಿಗೆ ಉತ್ತರ ಸಿಗುವಂಥ ಪ್ರಶ್ನೋತ್ತರ ಕಾರ್ಯಕ್ರಮ ಸಹ ಇತ್ತು. ಇದನ್ನು ಆಯೋಜನೆ ಮಾಡಿದ್ದು ಸೋದೆ ವಾದಿರಾಜ ಮಠದಿಂದ. ಸ್ವತಃ ವಿಶ್ವವಲ್ಲಭ ತೀರ್ಥರ ಸಾನ್ನಿಧ್ಯದಲ್ಲಿ ನಡೆದಂಥ ಅತ್ಯುತ್ತಮ ಕಾರ್ಯಕ್ರಮ ಇದಾಗಿತ್ತು. ಯೂಟ್ಯೂಬ್ ನಲ್ಲಿ ಇರುವಂಥ ಈ ವಿಡಿಯೋದಿಂದ ಪ್ರಮುಖಾಂಶಗಳನ್ನು ನಿಮ್ಮೆದುರು ಇಡಲಾಗಿದೆ. ದಯವಿಟ್ಟು ಇಲ್ಲಿರುವ ಅಂಶಗಳನ್ನು ಮಾಧ್ವ ಸಿದ್ಧಾಂತ ಅನುಸರಿಸುವ ಮಠದ ಪರಂಪರೆಯ ಹಿನ್ನೆಲೆಯಿಂದ ಮೊದಲಿಗೆ ನೋಡಬೇಕು. ಈ ಲೇಖನದ ಉದ್ದೇಶ ಯಾವುದೇ ಪರಂಪರೆಯನ್ನು, ಆಹಾರ ಕ್ರಮವನ್ನು, ಪದ್ಧತಿಯನ್ನು ಹೀಗಳೆಯುವುದಲ್ಲ.
ಇನ್ನು ಇಲ್ಲಿ ವೇದಿಕೆಯಲ್ಲಿ ಇರುವವರು ಸೋದೆ ವಾದಿರಾಜ ಮಠದ ಈಗಿನ ಯತಿಗಳಾದ ವಿಶ್ವವಲ್ಲಭ ತೀರ್ಥರು ಹಾಗೂ ಆಯುರ್ವೇದ ವೈದ್ಯರಾದ ಡಾ. ಪ್ರಾಣದೇವ ಉಪಾಧ್ಯಾಯರು. ಮತ್ತು ಧರ್ಮಕ್ಕೆ ಸಂಬಂಧಿಸಿದ ಪ್ರಶ್ನೆಗಳಲ್ಲಿ ಪೂರಕವಾದ ಉತ್ತರವನ್ನು ನೀಡಿದವರು ಪಂಡಿತರಾದ ಡಾ. ಬೆ.ನಾ. ವಿಜಯೀಂದ್ರಾಚಾರ್ಯರು.
ಧರ್ಮ, ಆಯುರ್ವೇದ ಮತ್ತು ಜೀವನಶೈಲಿ: ಡಾ. ಪ್ರಾಣದೇವ ಉಪಾಧ್ಯಾಯ ಅವರೊಂದಿಗೆ ಪ್ರಶ್ನೋತ್ತರ
ಈರುಳ್ಳಿ-ಬೆಳ್ಳುಳ್ಳಿ ನಿಷೇಧ ಮತ್ತು ಔಷಧೀಯ ಬಳಕೆ
ಪ್ರಶ್ನೆ 1: ಈರುಳ್ಳಿ ಮತ್ತು ಬೆಳ್ಳುಳ್ಳಿ ತುಂಬಾ ರುಚಿಯಾಗಿರುತ್ತವೆ ಮತ್ತು ಆರೋಗ್ಯಕ್ಕೆ ಒಳ್ಳೆಯದು ಎಂದು ಆಯುರ್ವೇದದಲ್ಲೂ ಹೇಳುತ್ತಾರೆ. ಆದರೆ ಶಾಸ್ತ್ರದಲ್ಲಿ ಇದನ್ನು ನಿಷೇಧಿಸಲು ಕಾರಣವೇನು? ಔಷಧ ರೂಪದಲ್ಲಿ ಇದನ್ನು ತೆಗೆದುಕೊಳ್ಳಬಹುದೇ?
ಉತ್ತರ (ಡಾ. ಪ್ರಾಣದೇವ ಉಪಾಧ್ಯಾಯ):
ಆಯುರ್ವೇದದಲ್ಲಿ ದ್ರವ್ಯಗಳನ್ನು ಎರಡು ರೀತಿಯಾಗಿ ವಿಂಗಡಣೆ ಮಾಡಿದ್ದಾರೆ:
- ಆಹಾರ ದ್ರವ್ಯ
- ಔಷಧ ದ್ರವ್ಯ
ಈರುಳ್ಳಿ (ಪಲಾಂಡು) ಮತ್ತು ಬೆಳ್ಳುಳ್ಳಿ (ಲಶುನ) ಅತ್ಯಂತ ರುಚಿಕರವಾದದ್ದು ಮತ್ತು ಎಲ್ಲರೂ ಇದನ್ನು ಬಯಸುತ್ತಾರೆ. ಆಯುರ್ವೇದದಲ್ಲಿ ಬೆಳ್ಳುಳ್ಳಿಯನ್ನು ಒಂದು ದೊಡ್ಡ ರಸಾಯನ ಎಂದು ಪರಿಗಣಿಸಲಾಗಿದೆ. ವಾತ ವ್ಯಾಧಿಗಳಲ್ಲಿ (ವಾತದ ಕಾಯಿಲೆಗಳು) ಬೆಳ್ಳುಳ್ಳಿಯ ಬಳಕೆ ಇಲ್ಲದೆ ಚಿಕಿತ್ಸೆ ಮುಂದೆ ಹೋಗುವುದೇ ಇಲ್ಲ. ಆದರೆ ಇದು ಕೇವಲ ಔಷಧದ ವಿಧಿಯಲ್ಲಿ ಮಾತ್ರ ಹೇಳಿರುವುದೇ ಹೊರತು ಆಹಾರ ರೂಪದಲ್ಲಲ್ಲ.
- ಪೌರಾಣಿಕ ಹಿನ್ನೆಲೆ: ಭೋಜರಾಜನ ‘ಚಾರುಚರ್ಯ’ ಎಂಬ ಆಯುರ್ವೇದ ಗ್ರಂಥದಲ್ಲಿ ಉಲ್ಲೇಖವಿರುವಂತೆ – ಬೆಳ್ಳುಳ್ಳಿಯು ಅಮೃತದಿಂದ ಉತ್ಪನ್ನವಾದದ್ದು ನಿಜ, ಆದರೆ ಅದು ರಾಹುವಿನ ಕತ್ತರಿಸಿದ ತಲೆಯಿಂದ ಬಿದ್ದ ಅಮೃತದ ಹನಿಗಳಿಂದ ಭೂಮಿಯಲ್ಲಿ ಮೊಳಕೆಯೊಡೆಯಿತು. ರಾಹು ಎಂಬುದು ತಮೋಗುಣದ ಪ್ರತೀಕ. ಆದ್ದರಿಂದ ಇದನ್ನು ತಿಂದರೆ ತಮೋಗುಣ ಹೆಚ್ಚುತ್ತದೆ ಮತ್ತು ಮಾನಸಿಕ ಸ್ಥಿರತೆ ತಪ್ಪುತ್ತದೆ ಎಂದು ನಿಷೇಧಿಸಲಾಗಿದೆ. ಅನಿವಾರ್ಯವಾದಾಗ ಗೃಹಸ್ಥರು ಔಷಧವಾಗಿ ಇದನ್ನು ಸ್ವೀಕರಿಸಬಹುದು, ಆದರೆ ಸನ್ಯಾಸಿಗಳಿಗೆ ಇದು ಸಂಪೂರ್ಣ ನಿಷಿದ್ಧ.
- ಧರ್ಮಶಾಸ್ತ್ರದ ದೃಷ್ಟಿಕೋನ: ಧರ್ಮಶಾಸ್ತ್ರದ ಪ್ರಕಾರ, ನಾವು ಕೇವಲ ರುಚಿಗಾಗಿ ಅಥವಾ ರಸಸ್ವಾದನೆಗೋಸ್ಕರ ನಿಷಿಧ್ಹ ಪದಾರ್ಥಗಳನ್ನು ತಿಂದು ದೇವರ ಪೂಜೆ ಮಾಡಿದರೆ ಅದಕ್ಕೆ ಅರ್ಹರಾಗುವುದಿಲ್ಲ. ಆದರೆ ವೈದ್ಯರು ರೋಗ ನಿವಾರಣೆಗಾಗಿ ಕೊಟ್ಟಾಗ ಅದು ‘ಔಷಧಾರ್ಥಂ’ ಆಗಿ ತೀರ್ಥಕ್ಕೆ ಸಮಾನವಾಗುತ್ತದೆ.
ವೈದ್ಯರು ಕೊಟ್ಟ ಔಷಧವಾಗಿ ತಿಂದರೆ ಸಾಲಿಗ್ರಾಮ ಪೂಜೆ ಮಾಡಲು ಯಾವುದೇ ದೋಷ ಬರುವುದಿಲ್ಲ, ಪುಣ್ಯವೇ ಬರುತ್ತದೆ. ಆದರೆ ನಾವೇ ಸ್ವತಃ ರುಚಿಗಾಗಿ ಚಟ್ನಿ ಮಾಡಿಕೊಂಡು ತಿಂದರೆ ದೋಷ ಬರುತ್ತದೆ.
ಶ್ರೀದಧಿವಾಮನ ಸ್ತೋತ್ರಮ್: ಮನೆಯಲ್ಲಿ ಸದಾ ಅನ್ನ, ಐಶ್ವರ್ಯ ತುಂಬಿರಲು ಈ ಸಣ್ಣ ಸ್ತೋತ್ರ ದಿನವೂ ಪಠಿಸಿ
ಆಯುರ್ವೇದದಲ್ಲಿ ಮದ್ಯ ಮತ್ತು ಮಾಂಸ ವರ್ಗಗಳ ಉಲ್ಲೇಖ
ಪ್ರಶ್ನೆ 2: ಆಯುರ್ವೇದದಲ್ಲಿ ಮದ್ಯ ವರ್ಗ ಮತ್ತು ಮಾಂಸ ವರ್ಗಗಳ ಬಗ್ಗೆ ವಿಧವಿಧವಾಗಿ ವರ್ಣನೆ ಇದೆಯಲ್ಲಾ? ಹಾಗಿದ್ದರೆ ಎಲ್ಲವನ್ನೂ ಸ್ವೀಕರಿಸಬಹುದೇ?
ಉತ್ತರ:
ಎಷ್ಟೋ ಜನರಿಗೆ ಆಯುರ್ವೇದದ ಮೇಲೆ ಈ ಆಕ್ಷೇಪ ಉಂಟು. ಆದರೆ ಆಯುರ್ವೇದದ ಪ್ರಸಿದ್ಧ ವ್ಯಾಖ್ಯಾನಕಾರರಾದ ಚಕ್ರಪಾಣಿ ಅವರು ಸ್ಪಷ್ಟಪಡಿಸುತ್ತಾರೆ – ಇವೆಲ್ಲವೂ ಕೇವಲ ರೋಗಗ್ರಸ್ತನಿಗೆ (ರೋಗಿಗೆ) ಅನಿವಾರ್ಯತೆ ಇದ್ದಾಗ ಮಾತ್ರ ಬಳಸತಕ್ಕದ್ದು.
- ಉದಾಹರಣೆ: ‘ಕ್ಷಯ’ (ಟಿ.ಬಿ) ರೋಗ ಬಂದಾಗ ಅನಿವಾರ್ಯವಾಗಿದ್ದರೆ ಮಾತ್ರ ಮಾಂಸದ ರಸವನ್ನು ಕೊಡಬೇಕು. ಕೇವಲ ರಸಸ್ವಾದನೆಗೋಸ್ಕರ ಅಥವಾ ಭೋಗ ಪಡಲಿಕ್ಕೋಸ್ಕರ ಮಾಂಸ ಸ್ವೀಕಾರ ಮಾಡುವ ಹಾಗಿಲ್ಲ.
ಆಯುರ್ವೇದದಲ್ಲೂ ಔಪಾಸನ ವಿಧಿ ಮತ್ತು ವೈಶ್ವದೇವ ವಿಧಿಯನ್ನು ಉಲ್ಲೇಖಿಸುವಾಗ ಎಲ್ಲರೂ ಸಸ್ಯಾಹಾರವನ್ನೇ ಸ್ವೀಕಾರ ಮಾಡಬೇಕು ಎಂದು ಹೇಳಲಾಗಿದೆ. ಮಾಂಸದ ಉಲ್ಲೇಖ ಕೇವಲ ರೋಗ ಪರಿಹಾರಕ್ಕೋಸ್ಕರ ಮಾತ್ರ.
ಮಕ್ಕಳಲ್ಲಿ ‘ಆಲ್ಫಾ ವೇವ್ಸ್’ ಜಾಗೃತಿ ಮತ್ತು ಬೆಳಗಿನ ಸಂಸ್ಕಾರ
ಪ್ರಶ್ನೆ 3 (ಒಬ್ಬ ಶಿಕ್ಷಕಿಯ ಪ್ರಶ್ನೆ): ಬೆಳಗ್ಗೆ 6 ರಿಂದ 8 ಗಂಟೆಯ ಅವಧಿಯಲ್ಲಿ ಪೋಷಕರು ಮಕ್ಕಳನ್ನು ಶಾಲೆಗೆ ಕಳುಹಿಸುವ ಧಾವಂತದಲ್ಲಿರುತ್ತಾರೆ. ಇಂತಹ ಸಂದರ್ಭದಲ್ಲಿ ಮೆದುಳಿನ ‘ಆಲ್ಫಾ ವೇವ್ಸ್’ (Alpha Waves) ಆಕ್ಟಿವೇಟ್ ಮಾಡಲು ಮಕ್ಕಳಿಗೆ ಯಾವ ಸಂಸ್ಕಾರ ನೀಡಬಹುದು? ಇದನ್ನು ಶಾಲೆಗಳಲ್ಲಿ ಹೇಗೆ ತರಬಹುದು?
ಉತ್ತರ:
ಮಕ್ಕಳಿಗೆ ನಾವು ಬೇಸಿಕ್ಸ್ ಹೇಳಿಕೊಡಬೇಕಾದರೆ ಮೊದಲು ಪ್ರಾಣಾಯಾಮದ ಬಗ್ಗೆ ಹೇಳಿಕೊಡಬೇಕು.
- ದೀರ್ಘ ಶ್ವಾಸಕ್ರಿಯೆ: ಬೆಳಗ್ಗೆ ಕೇವಲ 5 ನಿಮಿಷಗಳ ಕಾಲ ಜಸ್ಟ್ ‘ಲಾಂಗ್ ಬ್ರೀದಿಂಗ್’ (ದೀರ್ಘವಾಗಿ ಉಸಿರಾಟ ಮಾಡುವುದು) ರೂಢಿಸಬೇಕು. ಇದಕ್ಕೆ ಮೂಗು ಹಿಡಿದುಕೊಳ್ಳುವ ಕಷ್ಟದ ಪ್ರಕ್ರಿಯೆಗಳೇನು ಬೇಡ. ಶಾಲೆಗೆ ಹೋಗುವ ಎಲ್ಲಾ ಮಕ್ಕಳೂ ಇದನ್ನು ಸುಲಭವಾಗಿ ಕಲಿಯಬಹುದು.
- ಸೌಮ್ಯ ಸ್ತೋತ್ರಗಳು: ನಂತರ ಯಾವುದಾದರೂ ಸಂಕೀರ್ತನೆ ಅಥವಾ ಪದ್ಯಗಳನ್ನು ಹೇಳಿಕೊಡಿ. ಬೆಳಗ್ಗೆ ಎದ್ದ ತಕ್ಷಣ ಒಂದೇ ಬಾರಿಗೆ ಉಗ್ರವಾದ ಸ್ತೋತ್ರಗಳನ್ನು ಹೇಳಬಾರದು (ಉದಾಹರಣೆಗೆ ಬೆಳಗ್ಗೆ ನರಸಿಂಹ ಸ್ತೋತ್ರ ಹೇಳುವ ಕ್ರಮ ಸಾಮಾನ್ಯ ಇರುವುದಿಲ್ಲ). ಬದಲಾಗಿ ‘ದಧಿವಾಮನ ಸ್ತೋತ್ರ’ ಅಥವಾ ‘ಉದಯರಾಗ’ ಹೇಳಿಕೊಡಬೇಕು.
ದಧಿವಾಮನ ಸ್ತೋತ್ರದಲ್ಲಿ ಬರುವ “ವಾಮನೋ ಬುದ್ಧಿದಾತ” ಎಂಬ ಸಾಲುಗಳು ಬೆಳಗಿನ ಜಾವ ಮೆದುಳಿಗೆ ಶಾಂತ ಮತ್ತು ಮೈಲ್ಡ್ ಥಿಂಕಿಂಗ್ (ಸೌಮ್ಯ ಆಲೋಚನೆ) ನೀಡುತ್ತವೆ. ಇದು ಸ್ಪೆಸಿಫಿಕ್ ಆಗಿ ಬ್ರೈನ್ ವೇವ್ಸ್ ಸ್ಟಿಮುಲೇಟ್ ಮಾಡಲು ಇರುವಂತದ್ದು. ಶಾಲೆಗಳಲ್ಲೂ ಪ್ರಾಣಾಯಾಮವನ್ನು ಜಾಸ್ತಿ ಎಜುಕೇಟ್ ಮಾಡುವುದು ತುಂಬಾ ಒಳ್ಳೆಯದು.
ಸೋಂದಾ ಕ್ಷೇತ್ರದಲ್ಲಿ ವೈಭವದ ಆರಾಧನೆ ಮಾರ್ಚ್ 6ಕ್ಕೆ: ಶ್ರೀ ವಾದಿರಾಜರ ಸ್ತುತಿ ಮತ್ತು ಮಠದ ಪರಂಪರೆಯ ಸ್ಮರಣೆ
ಬೆಳ್ಳುಳ್ಳಿ ಹಾಗೂ ಮಾಂಸಕ್ಕೆ ಪರ್ಯಾಯ ಆಯುರ್ವೇದ ಆಹಾರಗಳು
ಪ್ರಶ್ನೆ 4: ಬೆಳ್ಳುಳ್ಳಿಗೆ ಪರ್ಯಾಯವಾಗಿ ಆಯುರ್ವೇದದಲ್ಲಿ ಬೇರೆ ಏನಾದರೂ ಇದೆಯೇ? ಎಲ್ಲರಿಗೂ ಒಂದೇ ರೀತಿಯ ಔಷಧ ಕೊಡಬಹುದೇ?
ಉತ್ತರ:
ಆಯುರ್ವೇದ ಚರಕ ಸಂಹಿತೆಯಲ್ಲಿ ಇದಕ್ಕೆ ಉತ್ತರವಿದೆ. ಆಯುರ್ವೇದದಲ್ಲಿ ‘ಸಾತ್ಮ್ಯ’ ಮತ್ತು ‘ಅಸಾತ್ಮ್ಯ’ (ದೇಹಕ್ಕೆ ಒಗ್ಗಿಕೊಳ್ಳುವುದು ಮತ್ತು ಒಗ್ಗದಿರುವುದು) ಎಂಬ ಪರಿಕಲ್ಪನೆ ಇದೆ. ವ್ಯಕ್ತಿಯ ಹಿನ್ನೆಲೆಗೆ ತಕ್ಕಂತೆ ಪರ್ಯಾಯಗಳನ್ನು ನೀಡಬಹುದು:
| ರೋಗ / ಸಂದರ್ಭ | ಸಾಮಾನ್ಯ ವ್ಯಕ್ತಿಗೆ | ವೈದಿಕರು / ನಿಷ್ಠಾವಂತರಿಗೆ (ಪರ್ಯಾಯ) |
| ಹೊಟ್ಟೆನೋವು (ಉದರ ಶೂಲೆ) | ಲಶುನಾದಿ ವಟಿ (ಬೆಳ್ಳುಳ್ಳಿಯ ಮಾತ್ರೆ) | ಹಿಂಗ್ಯಾದಿ ವಟಿ (ಇಂಗಿನಿಂದ ಮಾಡುವ ಮಾತ್ರೆ) |
| ಕ್ಷಯ ರೋಗ (T.B.) | ಅಜಮಾಂಸ ರಸಾಯನ | ಕೂಷ್ಮಾಂಡ ರಸಾಯನ (ಬೂದುಗುಂಬಳಕಾಯಿ) ಅಥವಾ ಸ್ವರ್ಣ ಭಸ್ಮ |
ನಾವು ಸಣ್ಣ ವಯಸ್ಸಿನಿಂದ ಯಾವ ಆಹಾರ ತಿಂದು ಬೆಳೆದಿದ್ದೇವೋ (ಜನ್ಮಸಾತ್ಮ್ಯ), ಅದಕ್ಕೆ ಸಂಬಂಧಪಟ್ಟ ಹಾಗೆ ಆಹಾರ ಮತ್ತು ಔಷಧ ಇರಬೇಕು. ಒಬ್ಬ ವೈದಿಕನಿಗೆ ಬೆಳ್ಳುಳ್ಳಿಯ ಮಾತ್ರೆ ಕೊಟ್ಟರೆ ವೈದ್ಯನ ಪ್ರಿಸ್ಕ್ರಿಪ್ಷನ್ ತಪ್ಪಾಗುತ್ತದೆ.
ಮುಟ್ಟಿನ ಸಮಯದ ನಿಯಮಗಳು ಮತ್ತು ಆಧುನಿಕ ಕುಟುಂಬಗಳು
ಪ್ರಶ್ನೆ 5: ಮುಟ್ಟಾದಾಗ (ರಜಸ್ವಲೆ) ಮಹಿಳೆಯರನ್ನು ದೂರ ಕುಳ್ಳಿರಿಸುವ ಆಚರಣೆ ಇದೆ. ಆದರೆ ಇಂದಿನ ‘ಮೈಕ್ರೋ ಫ್ಯಾಮಿಲಿ’ (ವಿಭಕ್ತ ಕುಟುಂಬ) ವ್ಯವಸ್ಥೆಯಲ್ಲಿ ಗಂಡ-ಹೆಂಡತಿ ಮಾತ್ರ ಇರುತ್ತಾರೆ, ಸಹಾಯಕ್ಕೆ ಯಾರೂ ಇರುವುದಿಲ್ಲ. ಇಂತಹ ಸಂದರ್ಭದಲ್ಲೂ ಈ ಅಸ್ಪೃಶ್ಯತೆ/ದೂರವಿಡುವ ನಿಯಮ ಪಾಲಿಸುವುದು ಕಡ್ಡಾಯವೇ? ಇದಕ್ಕೆ ಏನಾದರೂ ಉಪಾಯವಿದೆಯೇ?
ಉತ್ತರ:
ನಾವು ಮನಸ್ಸು ಮಾಡಿದರೆ ಖಂಡಿತವಾಗಿಯೂ ಇಂದಿನ ಕಾಲದಲ್ಲೂ ಇದನ್ನು ಮಾಡಲು ಸಾಧ್ಯವಿದೆ. ನೀವು ಬೆಂಗಳೂರಿನಂತಹ ಮಹಾನಗರಗಳಲ್ಲಿರುವ ಅನೇಕ ವಿದ್ವಾಂಸರ ಮನೆಗಳನ್ನು ನೋಡಬಹುದು; ಅವರ ಮನೆಗಳು ತುಂಬಾ ಚಿಕ್ಕದಾಗಿದ್ದರೂ ಅತ್ಯಂತ ಶಿಸ್ತಿನಿಂದ ಎಲ್ಲ ವ್ಯವಸ್ಥೆಗಳನ್ನು ಮಾಡಿಕೊಂಡು ಆಚರಣೆ ಮಾಡುತ್ತಿದ್ದಾರೆ. ಇನ್ನು ಸೋದೆ ಗುರುಕುಲದ ಅಧ್ಯಾಪಕರ ಮನೆಗಳನ್ನು ನೋಡಿದರೆ ಆಶ್ಚರ್ಯವಾಗುತ್ತದೆ, ಅಷ್ಟು ಸಣ್ಣ ಜಾಗದಲ್ಲೂ ಅವರು ಎಲ್ಲವನ್ನೂ ಸಾಧಿಸಿಕೊಂಡಿದ್ದಾರೆ.
ಮನಸ್ಸಿದ್ದರೆ ಖಂಡಿತ ಮಾರ್ಗವಿದೆ. “ಆರು ಗಂಟೆಗೆ ಟ್ಯೂಷನ್ ಇದೆ, ಜಪ ಮಾಡಲು ಆಗಲ್ಲ” ಎಂದು ಪ್ರತಿಯೊಂದಕ್ಕೂ ಕಾರಣ ಹೇಳುತ್ತಾ ಹೋದರೆ ಧರ್ಮ ಉಳಿಯುವುದಿಲ್ಲ. ಧರ್ಮಶಾಸ್ತ್ರವು ಮನುಷ್ಯನಿಗೆ ಸಾಧ್ಯವಿರುವುದನ್ನೇ ಹೇಳಿದೆ. ಮೂಲತಃ ನಾವು ‘ಮೈಕ್ರೋ ಫ್ಯಾಮಿಲಿ’ ಸಿಸ್ಟಮ್ ಮಾಡಿಕೊಂಡಿದ್ದೇ ತಪ್ಪು ಎಂಬುದು ಇಲ್ಲಿ ಗಮನಿಸಬೇಕಾದ ಅಂಶ.
ಕರಾವಳಿಯ ವೈಕುಂಠ ಉಂಡಾರು: ವಾದಿರಾಜರು ಮೆಚ್ಚಿದ, ವಿಶ್ವವಲ್ಲಭ ತೀರ್ಥರು ಜೀರ್ಣೋದ್ಧಾರಗೊಳಿಸಿದ ಪವಿತ್ರ ಕ್ಷೇತ್ರ
ಗಾಯತ್ರಿ ಜಪದ ನಿಯಮಗಳು ಮತ್ತು ಸಂಖ್ಯೆ
ಪ್ರಶ್ನೆ 6: ದಿನಕ್ಕೆ ಎಷ್ಟು ಗಾಯತ್ರಿ ಜಪ ಮಾಡಬೇಕು? ಒಂದು ಪಟ್ಟು ಗಾಯತ್ರಿ ಮಾಡಿದರೆ ಅದಕ್ಕೆ ಅರ್ಧ ಪಟ್ಟು ಶಿವ ಪಂಚಾಕ್ಷರಿ ಜಪ ಮತ್ತು ಮೂರು ಪಟ್ಟು ನಾರಾಯಣ ಅಷ್ಟಾಕ್ಷರ ಜಪ ಮಾಡಬೇಕೆಂಬ ಲಿಮಿಟೇಷನ್ಸ್ ಇದೆಯೇ?
ಉತ್ತರ:
ಶಾಸ್ತ್ರದಲ್ಲಿ “ಸಂಖ್ಯಾಹೀನಂತು ಯಜ್ಜಪ್ಯಂ ತತ್ಸರ್ವಂ ನಿಷ್ಫಲಂ ಭವೇತ್” ಎಂದು ಹೇಳಲಾಗಿದೆ; ಅಂದರೆ ಜಪಕ್ಕೆ ಸಂಖ್ಯೆಯ ನಿಯಮವಿದೆ.
- ಶ್ರೀಮದಾಚಾರ್ಯರ ನಿಯಮ: ಪ್ರಾತಃಕಾಲದಲ್ಲಿ 1000 ಗಾಯತ್ರಿ ಜಪ ಮಾಡಲು ಹೇಳಿದ್ದಾರೆ. 1000 ಗಾಯತ್ರಿ ಮಾಡಿದರೆ ಅದಕ್ಕೆ ಮೂರು ಪಟ್ಟು ಅಂದರೆ 3000 ನಾರಾಯಣ ಅಷ್ಟಾಕ್ಷರ ಜಪವಾಗುತ್ತದೆ. ಆದರೆ ಒಬ್ಬ ಗೃಹಸ್ಥನಿಗೆ ಮೂರು ಹೊತ್ತೂ ತಲಾ 1000 ಗಾಯತ್ರಿ ಜಪ ಮಾಡಲು ಸಾಧ್ಯವಿಲ್ಲ, ಏಕೆಂದರೆ ಅದಕ್ಕೆ ದಿನಕ್ಕೆ ಕನಿಷ್ಠ 9 ಗಂಟೆ ಸಮಯ ಬೇಕಾಗುತ್ತದೆ. ಇದು ಕೇವಲ ಪ್ರಾತಃಕಾಲದ (ಬೆಳಗಿನ) ನಿಯಮಕ್ಕೆ ಅನ್ವಯಿಸುತ್ತದೆ.
- ಶಿವ ಪಂಚಾಕ್ಷರಿ ಜಪ: ಆಚಾರ್ಯರು ಶಿವ ಮಂತ್ರ ಜಪ ಮಾಡಲು ಹೇಳಿದ್ದಾರೆ. ಆದರೆ ಅದು ಗಾಯತ್ರಿಯ ಅರ್ಧ ಪಟ್ಟು ಅಥವಾ ಇಷ್ಟೇ ಪಟ್ಟು ಇರಬೇಕೆಂಬ ಕಡ್ಡಾಯದ ನಿಯಮವಿಲ್ಲ. ಅವರವರ ಶಕ್ತಿ ಮತ್ತು ಮನೋಬಲದ ಮೇಲೆ ಐದು ಪಟ್ಟು ಅಥವಾ ಹತ್ತು ಪಟ್ಟು ಎಷ್ಟು ಬೇಕಾದರೂ ಜಪಿಸಬಹುದು. ವಿಷ್ಣು ಮಂತ್ರ ಜಪಿಸುವ ಮಧ್ವಾಚಾರ್ಯರೇ ಶಿವ ಮಂತ್ರವನ್ನೂ ಜಪಿಸಲು ಹೇಳುವ ಮೂಲಕ ಹಿಂದೂ ಧರ್ಮದ ಸಾಮರಸ್ಯವನ್ನು ಘೋಷಿಸಿದ್ದಾರೆ.
ಮುಖ್ಯವಾಗಿ, ಇಂದು ಯೂಟ್ಯೂಬ್ ನೋಡಿ ಅಥವಾ ಕೇವಲ ಪ್ರಶ್ನೆಗಾಗಿ ಕೇಳುವವರೇ ಹೆಚ್ಚು, ಯಾರೂ 1000 ಜಪ ಮಾಡುತ್ತಿಲ್ಲ, ಕೇವಲ 10 ಜಪ ಮಾಡುತ್ತಾರೆ. ಮೊದಲು ಪ್ರತಿಯೊಬ್ಬ ಬ್ರಾಹ್ಮಣನೂ ದಿನಕ್ಕೆ ಕನಿಷ್ಠ 108 ಗಾಯತ್ರಿ ಜಪ ಮಾಡುವ ಪ್ರತಿಜ್ಞೆ ಮಾಡುವುದು ಇಂದಿನ ತುರ್ತು ಅಗತ್ಯವಾಗಿದೆ.
ಇತರರಿಗೆ ಬ್ರೈನ್ ವೇವ್ಸ್ ಎಫೆಕ್ಟ್ ಮತ್ತು ಕೆಲವು ತರಕಾರಿಗಳ ನಿಷೇಧದ ಕಾರಣ
ಪ್ರಶ್ನೆ 7: ಬ್ರಾಹ್ಮಣರಲ್ಲದ ಇತರರಿಗೆ ಗಾಯತ್ರಿ ಜಪದ ಅಧಿಕಾರ ಇರುವುದಿಲ್ಲ. ಹಾಗಿದ್ದರೆ ಅವರಿಗೆ ಈ ‘ಆಲ್ಫಾ ವೇವ್ಸ್’ ಮತ್ತು ‘ಬೀಟಾ ವೇವ್ಸ್’ ಎಫೆಕ್ಟ್ ಹೇಗೆ ಸಿಗುತ್ತದೆ? ಮತ್ತು ಕ್ಯಾರೆಟ್, ಬೀಟ್ರೂಟ್, ಟೊಮೆಟೊ, ಕ್ಯಾಬೇಜ್ ಮುಂತಾದ ತರಕಾರಿಗಳನ್ನು ತಿನ್ನಬಾರದು ಎನ್ನುತ್ತಾರಲ್ಲ, ಏಕೆ?
ಉತ್ತರ:
ಆಯುರ್ವೇದ ಮತ್ತು ಶಾಸ್ತ್ರದ ಪ್ರಕಾರ, ಆಲ್ಫಾ ಮತ್ತು ಬೀಟಾ ತರಂಗಗಳು ಪ್ರತಿಯೊಬ್ಬ ಮನುಷ್ಯನಿಗೂ ಬೇಕು. ಗಾಯತ್ರಿ ಜಪಕ್ಕೆ ಯಾರಿಗೆ ಅಧಿಕಾರವಿದೆಯೋ ಅವರು ಆ ಮಾರ್ಗದಲ್ಲಿ ಪಡೆಯುತ್ತಾರೆ.
- ಪರ್ಯಾಯ ಮಾರ್ಗಗಳು: ಇತರರು ಬೆಳಗ್ಗೆ ಬೇಗ ಏಳುವುದು, ಪ್ರಾಣಾಯಾಮ ಮಾಡುವುದು ಮತ್ತು ಹರಿನಾಮ ಸ್ಮರಣೆ (ನಾಮಸ್ಮರಣೆ) ಮಾಡುವುದರಿಂದ ಇದೇ ಎಫೆಕ್ಟ್ ಪಡೆಯಬಹುದು. ಶ್ರೀಮದಾಚಾರ್ಯರು “ಸ್ಮೃತ್ವಾ ವಿಷ್ಣುಂ ಸಮುತ್ತಾಯ“ ಎಂದು ಹೇಳಿದ್ದಾರೆ, ಅಂದರೆ ಬೆಳಗ್ಗೆ ಎದ್ದು ಭಗವಂತನ ಸ್ಮರಣೆ ಪ್ರತಿಯೊಬ್ಬರೂ ಮಾಡಬೇಕು.
- ಮನಸ್ಸಿನ ಏಕಾಗ್ರತೆ: ಉದಾಹರಣೆಗೆ, ನೀವು ಬೆಳಗ್ಗೆ ಎದ್ದು ಹಿಂದಿನ ದಿನ ಕೇಳಿದ ಒಂದು ಒಳ್ಳೆಯ ಆಧ್ಯಾತ್ಮಿಕ ಉಪನ್ಯಾಸವನ್ನು ಕೇವಲ ಅರ್ಧ ಗಂಟೆ ಮನಸ್ಸಿನಲ್ಲಿ ರೀಕಾಲ್ (ಸ್ಮರಣೆ) ಮಾಡಿ ನೋಡಿ, ನಿಮ್ಮ ಇಡೀ ದಿನದ ಕೆಲಸದಲ್ಲಿ ಅದ್ಭುತವಾದ ಪರ್ಫೆಕ್ಷನ್ (Perfection in Profession) ಬರುತ್ತದೆ.
ಜೀವನಶೈಲಿ ಮತ್ತು ಸಂತಾನೋತ್ಪತ್ತಿ: ಇತ್ತೀಚೆಗೆ ಐಟಿ ಫೀಲ್ಡ್ನಲ್ಲಿ ನೈಟ್ ಶಿಫ್ಟ್ ಮಾಡುವ ದಂಪತಿಗಳಲ್ಲಿ ‘ನಾನ್-ಸ್ಪೆಸಿಫಿಕ್ ಇನ್ಫರ್ಟಿಲಿಟಿ’ (ಕಾರಣವಿಲ್ಲದ ಬಂಜೆತನ) ಹೆಚ್ಚಾಗುತ್ತಿದೆ. ವೈದ್ಯಕೀಯ ರಿಪೋರ್ಟ್ಗಳು ನಾರ್ಮಲ್ ಇದ್ದರೂ ಸಂತಾನ ಆಗುವುದಿಲ್ಲ. ಏಕೆಂದರೆ ಅವರಲ್ಲಿ ಬ್ರೈನ್ ವೇವ್ಸ್ ಸ್ಟಿಮುಲೇಟ್ ಮಾಡುವ ಜೀವನಶೈಲಿ ಇರುವುದಿಲ್ಲ. ಅಂತಹವರು ಸೋದೆ ಕ್ಷೇತ್ರದಂತಹ ಪವಿತ್ರ ಸ್ಥಳಕ್ಕೆ ಬಂದು ಬೆಳಗ್ಗೆ ಪ್ರದಕ್ಷಿಣೆ ನಮಸ್ಕಾರ ಮಾಡಿದಾಗ ಆಲ್ಫಾ ವೇವ್ಸ್ ಉತ್ತೇಜನಗೊಂಡು, ಹಾರ್ಮೋನುಗಳು ಸಮತೋಲನಕ್ಕೆ ಬಂದು ಸಂತಾನ ಪ್ರಾಪ್ತಿಯಾಗುತ್ತದೆ.
- ತರಕಾರಿಗಳ ನಿಷೇಧಕ್ಕೆ ಕಾರಣ: ಕ್ಯಾರೆಟ್, ಬೀಟ್ರೂಟ್ ಆಹಾರಗಳ ನಿಷೇಧದ ವಿಷಯಕ್ಕೆ ಬಂದರೆ, ಆಹಾರದ ‘ವರ್ಣ’ (ಬಣ್ಣ) ಮತ್ತು ‘ಆಕಾರ’ಕೂಡ ನಮ್ಮ ಮನಸ್ಸಿನ ಮೇಲೆ ಪ್ರಭಾವ ಬೀರುತ್ತದೆ. ರಕ್ತವರ್ಣದ (ಕೆಂಪು ಬಣ್ಣದ) ಆಹಾರವನ್ನು ನೋಡಿದಾಗ ಅಥವಾ ಸೇವಿಸಿದಾಗ ನಮ್ಮ ಒಳಗಿನ ಬ್ರೈನ್ ವೇವ್ಸ್ ಮತ್ತು ಭಾವನೆಗಳು ಬದಲಾಗುತ್ತವೆ (ತಾಮಸಿಕ/ರಾಜಸಿಕ ಭಾವನೆಗಳು ಬರಬಹುದು). ಆದ್ದರಿಂದ ಅತಿಯಾದ ಕೆಂಪು ಬಣ್ಣದ ಹಾಗೂ ಕೆಲವು ನಿರ್ದಿಷ್ಟ ಆಕಾರದ ಆಹಾರಗಳನ್ನು ಜಪ-ಅನುಷ್ಠಾನ ಮಾಡುವವರು ವರ್ಜಿಸಬೇಕು ಎಂದು ಶಾಸ್ತ್ರಕಾರರು ನಿಯಮ ಮಾಡಿದ್ದಾರೆ.
ಉಡುಪಿ ಪರ್ಯಾಯ 2026: ಎರಡು ವರ್ಷದ ಪದ್ಧತಿ ತಂದ ಕ್ರಾಂತಿಕಾರಿ ಯತಿ ಶ್ರೀ ವಾದಿರಾಜ ತೀರ್ಥರ ಅಪೂರ್ವ ಜೀವನ ಚರಿತ್ರೆ
(ಈ ಮೇಲ್ಕಂಡ ಮಾಹಿತಿಯು ಯೂಟ್ಯೂಬ್ ನಲ್ಲಿ ವಿಡಿಯೋ ರೂಪದಲ್ಲಿ ಇದ್ದು, ಅದನ್ನು ಪ್ರಶ್ನೋತ್ತರ ರೂಪದಲ್ಲಿ ನಿಮ್ಮೆದುರು ಇರಿಸಲಾಗಿದೆ. ಹಾಗಂತ ಇದು ಯಥಾವತ್ ರೂಪದಲ್ಲಿ ಇಲ್ಲ. ಯಾರಿಗೆ ಈ ಪ್ರಶ್ನೋತ್ತರದ ಸಂಪೂರ್ಣ ಮಾಹಿತಿ ಕೇಳುವ ಆಸಕ್ತಿ ಇದೆಯೋ ಅಂಥವರು ಯೂಟ್ಯೂಬ್ ಲಿಂಕ್– https://www.youtube.com/watch?v=stEjUuSx3gs ಕ್ಲಿಕ್ ಮಾಡಿ ನೋಡಿ.)
- ಶ್ರೀನಿವಾಸ ಮಠ
