ಇದೇ ಜುಲೈ 19ನೇ ತಾರೀಕು ಗುರು ಗ್ರಹ (Planet Jupiter) ಅಸ್ತ ಆಗುತ್ತದೆ. ಹೀಗೆ ಅಸ್ತವಾದ ಬೃಹಸ್ಪತಿ ಮತ್ತೆ ಉದಯ ಆಗುವುದು ಆಗಸ್ಟ್ 9ನೇ ತಾರೀಕು. ಹೀಗೆ ಗುರು ಅಸ್ತವಾಗುವುದನ್ನು ‘ಗುರು ಮೌಢ್ಯ’ ಅಂತಲೂ ಜ್ಯೋತಿಷ್ಯದಲ್ಲಿ ಕರೆಯಲಾಗುತ್ತದೆ. ಗುರು ಮೌಢ್ಯ ಆಗುವುದು ಹೇಗೆ ನಿರ್ಧಾರ ಆಗುತ್ತದೆ, ಅದನ್ನು ತಿಳಿದುಕೊಳ್ಳುವುದು ಹೇಗೆ ಮತ್ತು ಯಾಕೆ ತಿಳಿದುಕೊಳ್ಳಬೇಕು? ಅಸ್ತ ಗುರುವಿನಿಂದ ಏನೇನು ಬದಲಾವಣೆ, ಫಲಿತಾಂಶಗಳನ್ನು ನಿರೀಕ್ಷೆ ಮಾಡಬಹುದು ಎಂಬಿತ್ಯಾದಿ ಪ್ರಶ್ನೆಗಳಿಗೆ ಉತ್ತರ ಈ ಲೇಖನದಲ್ಲಿದೆ. ಇದರಲ್ಲಿಯೇ ಮುಹೂರ್ತದ ಬಗ್ಗೆ ಕೂಡ ತಿಳಿಸಲಾಗುವುದು.
ಜ್ಯೋತಿಷ್ಯದಲ್ಲಿ ಅತ್ಯಂತ ಮಂಗಳಕರ ಗ್ರಹ ಎಂದು ಕರೆಸಿಕೊಳ್ಳುವ ಬೃಹಸ್ಪತಿಯು ಇದೇ ಜುಲೈ 19 ರಂದು ಅಸ್ತನಾಗಿ, ಮುಂದಿನ ಆಗಸ್ಟ್ 9 ರಂದು ಪುನಃ ಉದಯಿಸಲಿದ್ದಾನೆ. ಈ 20ಕ್ಕೂ ಹೆಚ್ಚು ದಿನಗಳ ಕಾಲವನ್ನು ಜ್ಯೋತಿಷ್ಯ ಪರಿಭಾಷೆಯಲ್ಲಿ ‘ಗುರು ಮೌಢ್ಯ’ ಎಂದು ಕರೆಯಲಾಗುತ್ತದೆ. ಈ ಸಮಯದಲ್ಲಿ ಶುಭ ಕಾರ್ಯಗಳನ್ನು ಮಾಡಬಾರದು ಎಂಬ ಶಾಸ್ತ್ರ ಪ್ರಮಾಣ ಇದೆ. ಏನಿದು ಗುರು ಮೌಢ್ಯ? ಇದನ್ನು ಹೇಗೆ ಲೆಕ್ಕ ಹಾಕಲಾಗುತ್ತದೆ? ಇತ್ಯಾದಿ ವಿಚಾರಗಳನ್ನು ತಿಳಿಯೋಣ.
ಗುರು ಮೌಢ್ಯ ಎಂದರೇನು?
ಖಗೋಳ ವಿಜ್ಞಾನ ಮತ್ತು ಜ್ಯೋತಿಷ್ಯ ಎರಡರ ಪ್ರಕಾರವೂ ಗ್ರಹಗಳು ಸೂರ್ಯನಿಗೆ ತೀರಾ ಹತ್ತಿರ ಬಂದಾಗ ಅವುಗಳ ತೇಜಸ್ಸು ಸೂರ್ಯನ ಪ್ರಖರ ಬೆಳಕಿನಲ್ಲಿ ಮರೆಯಾಗುತ್ತದೆ. ಇದನ್ನೇ ಅಸ್ತಂಗತ (Combustion) ಎನ್ನಲಾಗುತ್ತದೆ. ಕಾಲಪುರುಷನ ಚಕ್ರದಲ್ಲಿ ಹನ್ನೆರಡು ರಾಶಿಗಳಿವೆ. ಒಂದು ರಾಶಿಗೆ 30 ಡಿಗ್ರಿಯಂತೆ, ಒಟ್ಟು 360 ಡಿಗ್ರಿಗಳ ಲೆಕ್ಕ. ಇನ್ನು ರವಿ ಪ್ರತಿ ಮೂವತ್ತು ದಿನಗಳಿಗೆ ಒಮ್ಮೆ ಒಂದರಿಂದ ಮತ್ತೊಂದು ರಾಶಿಗೆ ಸಂಚಾರ ಮಾಡುತ್ತಾನೆ. ಹೀಗೆ ಸಂಚಾರ ಮಾಡುತ್ತಾ ಜುಲೈ ಹದಿನಾರನೇ ತಾರೀಕು ಕರ್ಕಾಟಕ ರಾಶಿಗೆ ಪ್ರವೇಶ ಮಾಡುತ್ತದೆ.
- ನಿರ್ಧಾರವಾಗುವ ವಿಧಾನ: ಸೂರ್ಯನು ಅದಾಗಲೇ ಕರ್ಕಾಟಕ ರಾಶಿಯಲ್ಲಿ ಇರುವ ಗುರು ಗ್ರಹಕ್ಕೆ ಹತ್ತಿರ ಬರುತ್ತಾ, ಈ ಎರಡೂ ಗ್ರಹಗಳ ನಡುವಿನ ಅಂತರವು 11 ಡಿಗ್ರಿ (ಅಂಶ) ಅಥವಾ ಅದಕ್ಕಿಂತ ಕಡಿಮೆಯಾದಾಗ ಗುರುವು ಅಸ್ತನಾಗುತ್ತಾನೆ. ಅಂದರೆ ಸೂರ್ಯನ ತೇಜಸ್ಸಿನ ಮುಂದೆ ಗುರುವಿನ ಶುಭ ಕಿರಣಗಳು ಭೂಮಿಗೆ ತಲುಪುವುದಿಲ್ಲ.
- ತಿಳಿದುಕೊಳ್ಳುವುದು ಹೇಗೆ?: ಇದನ್ನು ಪಂಚಾಂಗದ ಸಹಾಯದಿಂದ ಸುಲಭವಾಗಿ ತಿಳಿಯಬಹುದು. ಪಂಚಾಂಗದಲ್ಲಿ ‘ಗುರು ಅಸ್ತ ಆರಂಭ’ ಮತ್ತು ‘ಗುರು ಉದಯ’ದ ದಿನ ಹಾಗೂ ಸಮಯವನ್ನು ಸ್ಪಷ್ಟವಾಗಿ ಬರೆದಿರುತ್ತಾರೆ.
ಯಾಕೆ ತಿಳಿದುಕೊಳ್ಳಬೇಕು?
ಗುರುವನ್ನು ‘ಜೀವ ಕಾರಕ’ (ಬದುಕಿನ ಬೆಳವಣಿಗೆಯ ಸಂಕೇತ) ಎನ್ನಲಾಗುತ್ತದೆ. ಗುರುವು ಅಸ್ತನಾದಾಗ ಅವನ ಸೌಮ್ಯ ಮತ್ತು ಶುಭ ಶಕ್ತಿಗಳು ತಾತ್ಕಾಲಿಕವಾಗಿ ದುರ್ಬಲಗೊಳ್ಳುತ್ತವೆ. ನಾವು ಮಾಡುವ ತಪ್ಪು ನಿರ್ಧಾರಗಳಿಂದ ಪಾರಾಗಲು ಮತ್ತು ಶುಭ ಕಾರ್ಯಗಳಿಗೆ ದೈವಿಕ ಬಲವಿದೆಯೇ ಎಂದು ತಿಳಿಯಲು ಈ ಕಾಲವನ್ನು ಅರಿತುಕೊಳ್ಳುವುದು ಅತ್ಯಗತ್ಯ.
ಜಾತಕದಲ್ಲಿ ಶಕಟ ಯೋಗವಿದ್ದರೆ ಜೀವನ ಬಂಡಿ ಏರಿಳಿತದ ಹಾದಿಯೇ? ಇಲ್ಲಿದೆ ಸಮಗ್ರ ಮಾಹಿತಿ ಮತ್ತು ಪರಿಹಾರ!
ಮುಹೂರ್ತದ ಮೇಲಾಗುವ ಪರಿಣಾಮಗಳೇನು?
ಜ್ಯೋತಿಷ್ಯದಲ್ಲಿ ಯಾವುದೇ ಒಂದು ದೊಡ್ಡ ಶುಭ ಕಾರ್ಯಕ್ಕೆ ಮುಹೂರ್ತ ಇಡಬೇಕಾದರೆ ‘ಗುರು ಬಲ’ ಮತ್ತು ‘ಶುಕ್ರ ಬಲ’ ಇರಲೇಬೇಕು. ಗುರು ಮೌಢ್ಯದ ಅವಧಿಯಲ್ಲಿ ಶಾಸ್ತ್ರ ಪ್ರಮಾಣದಂತೆ ಶುಭ ಮುಹೂರ್ತಗಳು ಸಂಪೂರ್ಣವಾಗಿ ನಿಷೇಧಿಸಲಾಗಿದೆ.
- ಯಾವ ಕಾರ್ಯಗಳನ್ನು ಮಾಡಬಾರದು?: ಮದುವೆ, ಉಪನಯನ, ಗೃಹಪ್ರವೇಶ, ಹೊಸ ಉದ್ಯಮ ಆರಂಭ, ನಾಮಕರಣ, ಆಸ್ತಿ ಖರೀದಿ, ಮತ್ತು ದೀಕ್ಷೆ ತೆಗೊಳ್ಳುವುದು ಮುಂತಾದ ದೀರ್ಘಕಾಲೀನ ಸೌಭಾಗ್ಯ ನೀಡುವ ಕಾರ್ಯಗಳನ್ನು ಈ ಅವಧಿಯಲ್ಲಿ ಮಾಡುವುದಿಲ್ಲ. ಮುಹೂರ್ತ ಶಾಸ್ತ್ರದ ಪ್ರಕಾರ, ಮೌಢ್ಯದಲ್ಲಿ ಮಾಡಿದ ಮದುವೆ ಅಥವಾ ಗೃಹಪ್ರವೇಶಗಳು ಸುಖ-ಶಾಂತಿಯನ್ನು ತರುವುದಿಲ್ಲ ಎನ್ನಲಾಗುತ್ತದೆ.
- ಯಾವ ಕಾರ್ಯಗಳನ್ನು ಮಾಡಬಹುದು?: ದೈನಂದಿನ ಪೂಜೆಗಳು, ಸೀಮಂತ (ಬಸುರಿ ಉಡುಗೊರೆ), ಈಗಾಗಲೇ ನಿಶ್ಚಯವಾಗಿರುವ ಅನಿವಾರ್ಯ ಕಾರ್ಯಗಳು, ಅನಾರೋಗ್ಯಕ್ಕೆ ಚಿಕಿತ್ಸೆ ಪಡೆಯುವುದು, ವಿದ್ಯಾಭ್ಯಾಸದ ಮುಂದುವರಿಕೆ ಮತ್ತು ದಾನ-ಧರ್ಮಾದಿ ಕಾರ್ಯಗಳಿಗೆ ಯಾವುದೇ ಅಡ್ಡಿಯಿರುವುದಿಲ್ಲ.
ಆದರೆ, ಬದಲಾದ ಕಾಲಮಾನಕ್ಕೆ ಕೆಲವರು ಗುರು ಶಾಂತಿಯನ್ನು ಮಾಡಿ, ಶುಭ ಕಾರ್ಯಗಳನ್ನು ಮಾಡುತ್ತಾರೆ. ಇನ್ನು ಗುರು ಅಸ್ತದಲ್ಲಿ ಉಪನಯನ ಮಾಡಲೇಬಾರದು ಎಂದಿದೆ, ವಿವಾಹಕ್ಕೆ ರಿಯಾಯಿತಿ ಇದೆ. ಶುಕ್ರಾಸ್ತವಾದರೆ ವಿವಾಹಕ್ಕೆ ಕೂಡ ಈ ಅವಧಿಯಲ್ಲಿ ಮುಹೂರ್ತ ಇಡಬಾರದು. ಶಾಸ್ತ್ರದಲ್ಲಿ ಏನು ಹೇಳಿದೆಯೋ ಅದನ್ನು ವಿವರಿಸುವ ಲೇಖನ ಇದು. ಆದ್ದರಿಂದ ಶಾಂತಿ ಮಾಡಿಸಿಕೊಳ್ಳುವುದು, ಆ ನಂತರ ಮುಹೂರ್ತ ಇಡುವುದು ಇದೆಲ್ಲ ಆಯಾ ವ್ಯಕ್ತಿಗಳ ಅನುಕೂಲಕ್ಕೆ ಮಾಡಿಕೊಂಡಂತೆ. ಆಪದ್ಧರ್ಮ ಎಂಬುದು ಒಂದಿದೆ. ಆದರೆ ಆ ಬಗ್ಗೆ ವಿವೇಚನೆ ಸರಿಯಾಗಿ ಮಾಡಿಕೊಂಡು ಮುಂದುವರಿಯಬೇಕು. ತಮಗೆ ಯಾವುದು ಅನುಕೂಲವೋ ಅದೇ ಆಪದ್ಧರ್ಮ ಎಂದು ಆಲೋಚಿಸುವುದು ಸಮಂಜಸ ಅಲ್ಲ. ಗುರು ಗ್ರಹದ ಅಸ್ತ ಕಾಲದಲ್ಲಿ ಮುಹೂರ್ತಗಳನ್ನು ಇಡುವುದು ಸಮ್ಮತವಲ್ಲ.
ಗುರು ಗ್ರಹದ ಕರ್ಕಾಟಕ ರಾಶಿ ಪ್ರವೇಶ: ಜಾತಕದಲ್ಲಿ ಗುರುವಿನ ಬಲ ಹೆಚ್ಚಿಸಲು ಈ ದೇವಸ್ಥಾನಗಳಿಗೆ ಭೇಟಿ ನೀಡಿ
ಅಸ್ತ ಗುರುವಿನ ಫಲಿತಾಂಶಗಳು
ಯಾವುದೇ ಗ್ರಹ ಅಸ್ತ ಆದಾಗ ಅದರ ಕಾರಕತ್ವದ ಫಲ ಪರಿಣಾಮಕಾರಿಯಾಗಿ ಕೊಡುವುದಿಲ್ಲ. ಈ ಅವಧಿಯಲ್ಲಿ ಕರ್ಕಾಟಕ ರಾಶಿಯಲ್ಲಿ ಉಚ್ಚ ಸ್ಥಿತಿಯಲ್ಲಿ ಇದ್ದರೂ ಅಸ್ತನಾಗಿರುವುದರಿಂದ ಸ್ವತಃ ಗುರು ಗ್ರಹಕ್ಕೆ ಬಲ ಇರುವುದಿಲ್ಲ. ಈ ಅವಧಿಯಲ್ಲಿ ಗುರು ಗ್ರಹದ ಸ್ಥಿತಿಯ ಆಧಾರದ ಮೇಲೇ ಮುಹೂರ್ತ ನಿಗದಿ ಮಾಡಿಕೊಳ್ಳುವವರು ಮುಖ್ಯವಾಗಿ ಈ ಅಂಶ ಅರಿತಿರಬೇಕು. ಇನ್ನು ಈ ಅವಧಿಯಲ್ಲಿ ಜನಿಸಿದ ಮಕ್ಕಳ ಜಾತಕಕ್ಕೂ ಇದೇ ಮಾತು ಅನ್ವಯ. ಯಾಕೆಂದರೆ ಈಚೆಗೆ ಸಿಸೇರಿಯನ್ ಆಪರೇಷನ್ ಗಳನ್ನು ಮಾಡಿಸುವ ಮುನ್ನ ಜಾತಕ ನೋಡಿ, ಒಳ್ಳೆ ಗ್ರಹಸ್ಥಿತಿಯಲ್ಲಿ ಹೆರಿಗೆ ಮಾಡಿಸುವವರ ಪ್ರಮಾಣ ಹೆಚ್ಚಾಗಿದೆ. ತಾಯಿ-ಮಗುವಿನ ಆರೋಗ್ಯವೇ ಮುಖ್ಯ ಹಾಗೂ ಪ್ರಾಶಸ್ತ್ಯ ಎಂಬುದು ಸಹ ಗಮನದಲ್ಲಿ ಇರಲಿ. ಇನ್ನು ಗುರು ಅಸ್ತನಾಗುವುದರಿಂದ ಜಾಗತಿಕವಾಗಿ ಮತ್ತು ವೈಯಕ್ತಿಕವಾಗಿ ಕೆಲವು ಪ್ರಮುಖ ಬದಲಾವಣೆಗಳನ್ನು ನಿರೀಕ್ಷಿಸಬಹುದು:
ಜಾಗತಿಕ ಬದಲಾವಣೆಗಳು
- ಆರ್ಥಿಕ ಮಾರುಕಟ್ಟೆಯಲ್ಲಿ ಏರುಪೇರುಗಳು ಉಂಟಾಗಬಹುದು. ಚಿನ್ನದ ಬೆಲೆಯಲ್ಲಿ ಹಠಾತ್ ಬದಲಾವಣೆಗಳು ಕಾಣಿಸಿಕೊಳ್ಳಬಹುದು.
- ಧಾರ್ಮಿಕ ಮತ್ತು ಶೈಕ್ಷಣಿಕ ಕ್ಷೇತ್ರಗಳಲ್ಲಿ ಕೆಲವು ಗೊಂದಲಗಳು ಅಥವಾ ವಿವಾದಗಳು ಏಳಬಹುದು.
- ಬ್ಯಾಂಕಿಂಗ್ ಮತ್ತು ಕಾನೂನು ವ್ಯವಸ್ಥೆಯಲ್ಲಿ ಪ್ರಮುಖ ನಿರ್ಧಾರಗಳು ವಿಳಂಬವಾಗಬಹುದು.
ನಿಮ್ಮ ಜಾತಕದಲ್ಲಿ ಹಂಸ ಯೋಗವಿದೆಯೇ? ಸುಖ, ಶಾಂತಿ, ಅಖಂಡ ಭಾಗ್ಯದ ರಾಜಯೋಗ
ದ್ವಾದಶ ರಾಶಿಗಳ ಮೇಲೆ ಪ್ರಭಾವ
ಗುರು ಅಸ್ತನಾದಾಗ ಎಲ್ಲ ರಾಶಿಗಳ ಮೇಲೆಯೂ ಒಂದಲ್ಲ ಒಂದು ರೀತಿಯ ಪ್ರಭಾವ ಬೀರುತ್ತದೆ. ಮುಖ್ಯವಾಗಿ ಧನು ಮತ್ತು ಮೀನ (ಗುರುವಿನ ಸ್ವಂತ ರಾಶಿಗಳು) ಹಾಗೂ ಪ್ರಸ್ತುತ ಗುರು ಸಂಚಾರ ಇರುವ ರಾಶಿಯವರಿಗೆ ಹೆಚ್ಚಿನ ಜಾಗ್ರತೆ ಅಗತ್ಯ.
| ಪ್ರಭಾವದ ಸ್ವರೂಪ | ಬಾಧಿತವಾಗುವ ರಾಶಿಗಳು | ನಿರೀಕ್ಷಿಸಬಹುದಾದ ಫಲಿತಾಂಶಗಳು |
| ಹೆಚ್ಚಿನ ಜಾಗ್ರತೆ ಅಗತ್ಯ | ಮೇಷ, ಮಿಥುನ, ಸಿಂಹ, ಧನು, ಮೀನ | ಹಣಕಾಸಿನ ನಷ್ಟ, ಉದ್ಯೋಗದಲ್ಲಿ ನಿರಾಸಕ್ತಿ, ಹಿರಿಯರೊಂದಿಗೆ ಭಿನ್ನಾಭಿಪ್ರಾಯ, ಆರೋಗ್ಯದಲ್ಲಿ ಏರುಪೇರು (ವಿಶೇಷವಾಗಿ ಲಿವರ್ ಅಥವಾ ಹೊಟ್ಟೆಗೆ ಸಂಬಂಧಿಸಿ ಬಾಧೆ). |
| ಮಿಶ್ರ ಫಲಿತಾಂಶ | ವೃಷಭ, ಕನ್ಯಾ, ತುಲಾ, ಕುಂಭ | ದಕೆಲಸ ಕಾರ್ಯಗಳಲ್ಲಿ ವಿಳಂಬವಾದರೂ ಅಂತಿಮವಾಗಿ ಯಶಸ್ಸು. ಖರ್ಚುಗಳ ಮೇಲೆ ನಿಯಂತ್ರಣವಿರಲಿ. |
| ಸಾಮಾನ್ಯ ಫಲ | ಕರ್ಕಾಟಕ, ವೃಶ್ಚಿಕ, ಮಕರ | ತಟಸ್ಥ ವಾತಾವರಣ ಇರಲಿದ್ದು, ಹಠಾತ್ ನಿರ್ಧಾರಗಳನ್ನು ತೆಗೆದುಕೊಳ್ಳದಿದ್ದರೆ ಯಾವುದೇ ದೊಡ್ಡ ತೊಂದರೆ ಇರುವುದಿಲ್ಲ. |
ಪರಿಹಾರಗಳು
ಗುರು ಅಸ್ತನಾಗಿದ್ದಾನೆ ಎಂದರೆ ಮಾರ್ಗದರ್ಶನ ನೀಡುವ ಶಕ್ತಿ ಸ್ವಲ್ಪ ಕ್ಷೀಣಿಸಿದೆ ಎಂದರ್ಥ. ಈ ಸಮಯದಲ್ಲಿ ಗುರುವಿನ ಕೃಪೆಗಾಗಿ ಸರಳ ಪರಿಹಾರಗಳನ್ನು ಮಾಡಬಹುದು:
- ಗುರು ಮಂತ್ರ ಜಪ: ಪ್ರತಿದಿನ ಬೆಳಗ್ಗೆ ದಕ್ಷಿಣಾಮೂರ್ತಿ ಅಥವಾ ರಾಘವೇಂದ್ರ ಸ್ವಾಮಿ, ಸಾಯಿಬಾಬಾರಂತಹ ಗುರುಗಳ ಸ್ಮರಣೆ ಮಾಡಿ, ಓಂ ಬ್ರಂ ಬೃಹಸ್ಪತಯೇ ನಮಃ ಮಂತ್ರವನ್ನು ಜಪಿಸಿ.
- ದಾನ ಧರ್ಮ: ಗುರುವಾರಗಳಂದು ಬಡವರಿಗೆ ಅಥವಾ ವಿದ್ಯಾರ್ಥಿಗಳಿಗೆ ಹಳದಿ ಬಣ್ಣದ ಧಾನ್ಯಗಳು (ಕಡಲೆಬೇಳೆ), ಹಳದಿ ಬಟ್ಟೆ ಅಥವಾ ಪುಸ್ತಕಗಳನ್ನು ದಾನ ಮಾಡಿ.
- ಹಿರಿಯರ ಗೌರವ: ನಿಮ್ಮ ತಂದೆ, ಶಿಕ್ಷಕರು ಮತ್ತು ಹಿರಿಯರ ಆಶೀರ್ವಾದವನ್ನು ಪಡೆಯಿರಿ. ಅವರ ಮನಸ್ಸಿಗೆ ನೋವುಂಟು ಮಾಡಬೇಡಿ.
ಗುರು ಗೋಚಾರ ಫಲ 2026: ಕರ್ಕಾಟಕ-ಸಿಂಹ ರಾಶಿಯಲ್ಲಿ ಗುರುವಿನ ವಕ್ರ ನಡೆ; ಯಾರಿಗೆ ದೋಷ? ಇಲ್ಲಿದೆ ನಿಖರ ಪರಿಹಾರ!
ಕೊನೆಮಾತು: ಜುಲೈ 19 ರಿಂದ ಆಗಸ್ಟ್ 9 ರವರೆಗಿನ ಗುರು ಮೌಢ್ಯದ ಅವಧಿಯು ಹೊಸ ಸಾಹಸಗಳಿಗೆ ಅಥವಾ ಶುಭ ಕಾರ್ಯಗಳಿಗೆ ಸೂಕ್ತವಲ್ಲದಿದ್ದರೂ ಆತ್ಮಾವಲೋಕನಕ್ಕೆ ಮತ್ತು ಆಧ್ಯಾತ್ಮಿಕ ಸಾಧನೆಗೆ ಅತ್ಯುತ್ತಮ ಸಮಯವಾಗಿದೆ. ಆಗಸ್ಟ್ 9 ರಂದು ಗುರು ಉದಯವಾದ ನಂತರ ಮರಳಿ ಶುಭ ಮುಹೂರ್ತಗಳು ಆರಂಭವಾಗಲಿದೆ.
ಲೇಖನ- ಶ್ರೀನಿವಾಸ ಮಠ
