ಈ ಲೇಖನದಲ್ಲಿ ಹೇಳಲು ಹೊರಟಿರುವುದು ಶತ್ರುನಿಗ್ರಹ ವಾರಾಹಿ ಹೋಮದ ಬಗ್ಗೆ. ಅಂದಹಾಗೆ ಶ್ರೀ ಮಹಾವಾರಾಹಿಯು ದೇವಿಯು ಪರಾಶಕ್ತಿಯ ಸೇನಾಧಿಪತಿ. ಭಕ್ತರ ಕಷ್ಟಗಳನ್ನು ತಕ್ಷಣವೇ ನಿವಾರಿಸುವ, ದುಷ್ಟ ಶಕ್ತಿಗಳನ್ನು ಮೆಟ್ಟಿ ನಿಲ್ಲುವ ಉಗ್ರ ಹಾಗೂ ಪರಮ ಕರುಣಾಮಯಿ ದೇವತೆ. ವಾರಾಹಿ ದೇವಿಯ ಆರಾಧನೆಗಳಲ್ಲಿ ಅತ್ಯಂತ ಶಕ್ತಿಶಾಲಿಯಾದದ್ದು ಈ “ಶತ್ರುನಿಗ್ರಹ ವಾರಾಹಿ ಹೋಮ”. ಈ ಹೋಮದ ಮಹತ್ವ, ವಿಧಾನ ಮತ್ತು ಪ್ರಯೋಜನಗಳ ಕುರಿತು ಸವಿಸ್ತಾರವಾದ ಲೇಖನ ಇಲ್ಲಿದೆ:
ಮಾನವ ಜೀವನದಲ್ಲಿ ಯಶಸ್ಸು, ಕೀರ್ತಿ ಹೆಚ್ಚುತ್ತಿದ್ದಂತೆ ಸಮಾಜದಲ್ಲಿ ಅದೃಶ್ಯ ಶತ್ರುಗಳು, ಈರ್ಷ್ಯೆ (ಹೊಟ್ಟೆಕಿಚ್ಚು), ದೃಷ್ಟಿ ದೋಷ ಹಾಗೂ ನಕಾರಾತ್ಮಕ ಶಕ್ತಿಗಳ ಕಾಟವೂ ಹೆಚ್ಚಾಗುತ್ತದೆ. ಎಷ್ಟೇ ಕಷ್ಟಪಟ್ಟರೂ ಪ್ರಗತಿ ಸಿಗದೆ, ನಿರಂತರವಾಗಿ ಅಪಪ್ರಚಾರ, ಕಾನೂನು ಸಂಘರ್ಷಗಳು ಅಥವಾ ಉದ್ಯೋಗ-ವ್ಯವಹಾರದಲ್ಲಿ ಗುಪ್ತ ಶತ್ರುಗಳ ಕಾಟ ಎದುರಾದಾಗ ಸನಾತನ ಧರ್ಮದಲ್ಲಿ ಅದಕ್ಕೆ ಅತ್ಯಂತ ಪ್ರಭಾವಶಾಲಿ ಪರಿಹಾರವನ್ನು ಸೂಚಿಸಲಾಗಿದೆ. ಅದೇ ಶತ್ರುನಿಗ್ರಹ ವಾರಾಹಿ ಹೋಮ.
ಯಾರು ಈ ವಾರಾಹಿ ದೇವಿ?
ಸಪ್ತಮಾತೃಕೆಯರಲ್ಲಿ ಐದನೆಯವಳಾದ ವಾರಾಹಿ ದೇವಿಯು ಲಲಿತಾ ಪರಮೇಶ್ವರಿಯ ಸೇನಾ ನಾಯಕಿ. ಹಂದಿಯ ಮುಖ ಮತ್ತು ಮಾನವ ಶರೀರವನ್ನು ಹೊಂದಿರುವ ಈ ದೇವಿಯು ಜ್ಞಾನ ಮತ್ತು ಶಕ್ತಿಯ ಸಂಕೇತ. ಈಕೆಯ ಕೈಯಲ್ಲಿರುವ ಹಲಾಯುಧ ಮತ್ತು ಮುಸಲಗಳು ಶತ್ರುಗಳನ್ನು ಸದೆಬಡಿಯಲು ಮತ್ತು ಭಕ್ತರ ಅಹಂಕಾರವನ್ನು ನಾಶಪಡಿಸಲು ಇರುವ ಆಯುಧಗಳಾಗಿವೆ.
ರಾಜ ಶ್ಯಾಮಲಾ ದೇವಿ: ಜ್ಞಾನ, ವಾಕ್ ಸಿದ್ಧಿ, ಕಲೆ ಮತ್ತು ರಾಜಕೀಯ ಯಶಸ್ಸಿನ ಶಕ್ತಿದೇವತೆ
ಶತ್ರುನಿಗ್ರಹ ವಾರಾಹಿ ಹೋಮ ಎಂದರೇನು?
ವಾರಾಹಿ ದೇವಿಯನ್ನು ತಾಂತ್ರಿಕ ಮತ್ತು ವೈದಿಕ ಎರಡೂ ಮಾರ್ಗಗಳಲ್ಲಿ ಆರಾಧಿಸಲಾಗುತ್ತದೆ. ಶತ್ರುಗಳಿಂದ ನಿರಂತರ ತೊಂದರೆ ಅನುಭವಿಸುತ್ತಿರುವವರು, ಕೋರ್ಟ್- ಕಚೇರಿ ವ್ಯವಹಾರಗಳಲ್ಲಿ ಸಿಲುಕಿಕೊಂಡವರು ಅಥವಾ ವ್ಯವಹಾರದಲ್ಲಿ ತೀವ್ರ ಪೈಪೋಟಿ ಎದುರಿಸುತ್ತಿರುವವರು ತಮ್ಮ ರಕ್ಷಣೆಗಾಗಿ ಮಾಡಿಸುವ ವಿಶೇಷ ಯಜ್ಞವೇ ಈ ಶತ್ರುನಿಗ್ರಹ ಹೋಮ. ಇಲ್ಲಿ ‘ಶತ್ರುನಿಗ್ರಹ’ ಎಂದರೆ ಕೇವಲ ಹೊರಗಿನ ಶತ್ರುಗಳಷ್ಟೇ ಅಲ್ಲ, ನಮ್ಮೊಳಗಿನ ಕಾಮ, ಕ್ರೋಧ, ಲೋಭ, ಮೋಹ, ಮದ, ಮಾತ್ಸರ್ಯಗಳೆಂಬ ಆಂತರಿಕ ಶತ್ರುಗಳ ನಿವಾರಣೆಯೂ ಹೌದು.
ಹೋಮಕ್ಕೆ ಪ್ರಮುಖ ದ್ರವ್ಯಗಳು (ಆಹುತಿಗಳು)
ವಾರಾಹಿ ದೇವಿಗೆ ಉಗ್ರ ಮತ್ತು ತಾಮಸ ಪ್ರಕೃತಿಯ ದ್ರವ್ಯಗಳು ಪ್ರಿಯವಾದವು. ಈ ಹೋಮದಲ್ಲಿ ಬಳಸುವ ಪ್ರಮುಖ ದ್ರವ್ಯಗಳೆಂದರೆ:
- ಕರಿಬೇವಿನ ಎಲೆಗಳು: ಶತ್ರು ಬಾಧೆ ಮತ್ತು ನಕಾರಾತ್ಮಕ ಶಕ್ತಿಗಳ ಉಚ್ಚಾಟನೆಗೆ.
- ಕಪ್ಪು ಎಳ್ಳು: ಶನಿದೋಷ ನಿವಾರಣೆ ಮತ್ತು ದೃಷ್ಟಿ ದೋಷ ಮುಕ್ತಿಗೆ.
- ಒಣ ಮೆಣಸಿನಕಾಯಿ: ತೀವ್ರವಾದ ಶತ್ರುನಾಶ ಮತ್ತು ದೃಷ್ಟಿ ದೋಷ ಪರಿಹಾರಕ್ಕೆ.
- ದಾಳಿಂಬೆ ಹಣ್ಣು ಅಥವಾ ಕೆಂಪು ಹೂವುಗಳು: ದೇವಿಯ ಪ್ರಸನ್ನತೆಗೆ.
- ಬೂದುಗುಂಬಳಕಾಯಿ ಬಲಿ: ಹೋಮದ ಕೊನೆಯಲ್ಲಿ ದೃಷ್ಟಿ ದೋಷ ನಿವಾರಣೆಗೆ ಬಲಿ ಪೂಜೆ ಮಾಡಲಾಗುತ್ತದೆ.
ಶ್ರೀ ಬಗಳಾಮುಖಿ ದೇವಿಯ ಆರಾಧನೆ, ಹೋಮ ವಿಧಾನ ಮತ್ತು ಕರ್ನಾಟಕದ ಪ್ರಸಿದ್ಧ ಕ್ಷೇತ್ರಗಳು
ಹೋಮದ ಸವಿಸ್ತಾರ ವಿಧಾನ
ಈ ಹೋಮವನ್ನು ನುರಿತ ತಾಂತ್ರಿಕ ಅಥವಾ ವೈದಿಕ ವಿದ್ವಾಂಸರ ಮಾರ್ಗದರ್ಶನದಲ್ಲೇ ಮಾಡಬೇಕು.
- ಸಂಕಲ್ಪ: ಯಜಮಾನರು ತಮ್ಮ ಹೆಸರು, ಗೋತ್ರವನ್ನು ಹೇಳಿ, ತಮಗಿರುವ ಶತ್ರು ಬಾಧೆ, ದೃಷ್ಟಿ ದೋಷ ಅಥವಾ ಕೋರ್ಟ್ ಸಮಸ್ಯೆಗಳು ನಿವಾರಣೆಯಾಗಲಿ ಎಂದು ದೃಢ ಸಂಕಲ್ಪ ಮಾಡಬೇಕು.
- ಗಣಪತಿ ಪೂಜೆ ಮತ್ತು ಪುಣ್ಯಾಹವಾಚನ: ಯಾವುದೇ ವಿಘ್ನ ಬರದಂತೆ ಪ್ರಥಮ ಪೂಜಿತ ಗಣೇಶನ ಆರಾಧನೆ ಮತ್ತು ಸ್ಥಳ ಶುದ್ಧಿ.
- ಕಲಶ ಸ್ಥಾಪನೆ: ವಾರಾಹಿ ದೇವಿಯ ಆವಾಹನೆ ಮತ್ತು ಪ್ರಾಣಪ್ರತಿಷ್ಠೆ.
- ಮೂಲ ಮಂತ್ರ ಜಪ: ವಾರಾಹಿ ಗಾಯತ್ರಿ ಮಂತ್ರ ಅಥವಾ “ಐಂ ಗ್ಲೌಂ ಐಂ ನಮೋ ಭಗವತಿ ವಾರ್ತಾಲಿ ವಾರಾಹಿ…” ಎಂಬ ಪ್ರಭಾವಶಾಲಿ ಮೂಲ ಮಂತ್ರಗಳ ಪುರಶ್ಚರಣೆ.
- ಹೋಮದ ಆಹುತಿ: ದೇವಿಯ ವಿವಿಧ ನಾಮಾವಳಿಗಳನ್ನು ಪಠಿಸುತ್ತಾ, ನಿಗದಿತ ದ್ರವ್ಯಗಳಿಂದ ಅಗ್ನಿಗೆ ಆಹುತಿ ನೀಡುವುದು.
- ಮಹಾ ಪೂರ್ಣಾಹುತಿ ಮತ್ತು ಬಲಿ ಪ್ರದಾನ: ಹೋಮದ ಯಶಸ್ಸಿಗಾಗಿ ಪೂರ್ಣಾಹುತಿ ನೀಡಿ, ನಕಾರಾತ್ಮಕ ಶಕ್ತಿಗಳ ಶಾಂತಿಗಾಗಿ ಕುಂಬಳಕಾಯಿ ಅಥವಾ ನಿಂಬೆಹಣ್ಣಿನ ಬಲಿ ಕೊಡುವುದು.
ಹೋಮಕ್ಕೆ ಪ್ರಶಸ್ತ ಸಮಯ
- ರಾತ್ರಿ ಕಾಲ: ವಾರಾಹಿ ದೇವಿಯನ್ನು ‘ರಾತ್ರಿ ದೇವತೆ’ ಎಂದೂ ಕರೆಯುವುದರಿಂದ, ಸಂಜೆ ಅಥವಾ ರಾತ್ರಿಯ ಅವಧಿಯಲ್ಲಿ ಈ ಹೋಮ ಮಾಡುವುದು ಶ್ರೇಷ್ಠ.
- ವಿಶೇಷ ದಿನಗಳು: ಪಂಚಮಿ ತಿಥಿ, ಅಷ್ಟಮಿ, ನವರಾತ್ರಿ ದಿನಗಳು ಹಾಗೂ ಅಮಾವಾಸ್ಯೆಯ ದಿನ ವಾರಾಹಿ ಆರಾಧನೆಗೆ ಸೂಕ್ತ.
ಸೂರ್ಯೋದಯದ ಒಳಗೆ ದರ್ಶನಕ್ಕೆ ಸಿಗುವ ಕಾಶಿಯ ರಹಸ್ಯ ಶಕ್ತಿ ಕೇಂದ್ರ ಪಾತಾಳ ವಾರಾಹಿ ದೇವಸ್ಥಾನ
ಶತ್ರುನಿಗ್ರಹ ವಾರಾಹಿ ಹೋಮದ ಪ್ರಯೋಜನಗಳು
- ಗುಪ್ತ ಶತ್ರುಗಳ ನಾಶ: ನಿಮ್ಮ ಪ್ರಗತಿಯನ್ನು ಸಹಿಸದೆ ಬೆನ್ನಿನ ಹಿಂದೆ ಸಂಚು ರೂಪಿಸುವ ಶತ್ರುಗಳ ತಂತ್ರಗಳು ಫಲಿಸದಂತೆ ಮಾಡುತ್ತದೆ.
- ಕಾನೂನು ವಿವಾದಗಳಲ್ಲಿ ಜಯ: ಸುದೀರ್ಘ ಕಾಲದಿಂದ ನಡೆಯುತ್ತಿರುವ ಕೋರ್ಟ್ ಕಚೇರಿ ಕೇಸುಗಳು, ಆಸ್ತಿ ವಿವಾದಗಳು ನಿಮ್ಮ ಪರವಾಗಲು ನೆರವಾಗುತ್ತದೆ.
- ದೃಷ್ಟಿ ದೋಷ ಮತ್ತು ತಂತ್ರ-ಮಂತ್ರ ಬಾಧೆ ನಿವಾರಣೆ: ಮನೆಯ ಮೇಲಿರುವ ಕೆಟ್ಟ ದೃಷ್ಟಿ, ನಕಾರಾತ್ಮಕ ಶಕ್ತಿಗಳು ಹಾಗೂ ತಾಂತ್ರಿಕ ದೋಷಗಳು ಸಂಪೂರ್ಣವಾಗಿ ಭಸ್ಮವಾಗುತ್ತವೆ.
- ವ್ಯವಹಾರದಲ್ಲಿ ಪ್ರಗತಿ: ಉದ್ಯೋಗದಲ್ಲಿ ಮೇಲಧಿಕಾರಿಗಳ ಕಿರುಕುಳ ತಪ್ಪುತ್ತದೆ ಮತ್ತು ವ್ಯಾಪಾರದಲ್ಲಿ ಎದುರಾಳಿಗಳ ಅಕ್ರಮ ಪೈಪೋಟಿಯನ್ನು ಮೆಟ್ಟಿ ನಿಲ್ಲಬಹುದು.
- ಆತ್ಮವಿಶ್ವಾಸ ವೃದ್ಧಿ: ಭೀತಿ, ಆತಂಕಗಳು ದೂರವಾಗಿ, ಮನಸ್ಸಿಗೆ ಧೈರ್ಯ ಮತ್ತು ಸಕಾರಾತ್ಮಕ ಶಕ್ತಿ ಲಭಿಸುತ್ತದೆ.
ಮುನ್ನೆಚ್ಚರಿಕೆ ಮತ್ತು ನಿಯಮಗಳು
ವಾರಾಹಿ ದೇವಿಯು ಶೀಘ್ರ ಕೋಪಿಯೂ ಹೌದು, ಶೀಘ್ರ ಅನುಗ್ರಹ ನೀಡುವವಳೂ ಹೌದು. ಆದ್ದರಿಂದ,
- ಯಾವುದೇ ಕಾರಣಕ್ಕೂ ಇನ್ನೊಬ್ಬರಿಗೆ ಅನ್ಯಾಯ ಮಾಡಲು ಅಥವಾ ಯಾರನ್ನೋ ದ್ವೇಷದಿಂದ ವಿನಾಶ ಮಾಡಲು ಈ ಹೋಮವನ್ನು ಬಳಸಬಾರದು. ಕೇವಲ ಸ್ವರಕ್ಷಣೆ ಮತ್ತು ಧರ್ಮದ ಹಾದಿಯಲ್ಲಿ ನಡೆಯುವಾಗ ಎದುರಾಗುವ ಅಡೆತಡೆಗಳ ನಿವಾರಣೆಗೆ ಮಾತ್ರ ಇದನ್ನು ಮಾಡಬೇಕು.
- ಹೋಮ ಮಾಡುವ ದಿವಸ ಮತ್ತು ನಂತರದ ಕೆಲವು ದಿನಗಳವರೆಗೆ ಕಡ್ಡಾಯವಾಗಿ ಬ್ರಹ್ಮಚರ್ಯ ಪಾಲನೆ, ಸಾತ್ವಿಕ ಆಹಾರ ಸೇವನೆ ಇರಬೇಕು (ಮಾಂಸಾಹಾರ ಸಂಪೂರ್ಣ ವರ್ಜ್ಯ).
ತಿರುಚೆಂಗೋಡು ದೇವಸ್ಥಾನ: ಜಗತ್ತಿನ ಏಕೈಕ ನವಪಾಷಾಣ ಅರ್ಧನಾರೀಶ್ವರ ಮೂರ್ತಿ
ಕೊನೆಮಾತು:
ನಂಬಿದ ಭಕ್ತರನ್ನು ತಾಯಿಯಂತೆ ಸಲಹುವ ವಾರಾಹಿ ದೇವಿಯ ಈ ಶತ್ರುನಿಗ್ರಹ ಹೋಮವು, ಜೀವನದಲ್ಲಿ ಎದುರಾಗುವ ಎಲ್ಲಾ ರೀತಿಯ ಕಷ್ಟ ಕಾರ್ಪಣ್ಯಗಳ ಕಾರ್ಮೋಡವನ್ನು ಸರಿಸಿ, ಯಶಸ್ಸು ಮತ್ತು ಸುಖ-ಶಾಂತಿಯ ಬೆಳಕನ್ನು ನೀಡುವ ದಿವ್ಯ ಮಾರ್ಗವಾಗಿದೆ.
ಲೇಖನ- ಶ್ರೀನಿವಾಸ ಮಠ
