ಆಗಸ್ಟ್ 22ನೇ ತಾರೀಕಿನಿಂದ ಸೆಪ್ಟೆಂಬರ್ 7ರ ತನಕ ಗ್ರಹಗಳ ರಾಜನಾದ ಸೂರ್ಯನ ಸ್ವಕ್ಷೇತ್ರವಾದ ಸಿಂಹ ರಾಶಿಯಲ್ಲಿ ಮಹತ್ವದ ಗ್ರಹಗಳ ಸಂಚಾರ ಆಗುತ್ತದೆ. ಈ ಅವಧಿಯಲ್ಲಿ ಬುಧನು ಸಿಂಹ ರಾಶಿ ಪ್ರವೇಶಿಸುವುದರಿಂದ, ಅದಾಗಲೇ ಅಲ್ಲಿ ಸಂಚರಿಸುತ್ತಿರುವ ಸೂರ್ಯ ಮತ್ತು ಕೇತುಗಳೊಂದಿಗೆ ಸೇರಿ ‘ರವಿ-ಬುಧ-ಕೇತು ತ್ರಿಗ್ರಹ ಯೋಗ’ ಆಗಲಿದೆ. ಜ್ಯೋತಿಷ್ಯದಲ್ಲಿ ಮೂರು ಪ್ರಮುಖ ಗ್ರಹಗಳು ಒಂದೇ ರಾಶಿಯಲ್ಲಿ ಸೇರುವುದು ಅತ್ಯಂತ ಮಹತ್ವದಾಗಿದ್ದು, ಇದು ವ್ಯಕ್ತಿಗಳ ಜೀವನ ಹಾಗೂ ಜಾಗತಿಕ ಮಟ್ಟದಲ್ಲಿ ದೊಡ್ಡ ಮಟ್ಟದ ಬದಲಾವಣೆಗಳನ್ನು ತರಲಿದೆ. ಈ ಅಪರೂಪದ ಸಂಯೋಗದ ಫಲಗಳು ಮತ್ತು ಹನ್ನೆರಡು ರಾಶಿಗಳ ಮೇಲೆ ಇದರ ಪ್ರಭಾವ ಹೇಗಿರಲಿದೆ ಎಂಬುದರ ವಿಶ್ಲೇಷಣೆ ಇಲ್ಲಿದೆ.
ತ್ರಿಗ್ರಹ ಯೋಗದ ಫಲಗಳು (ರವಿ + ಬುಧ + ಕೇತು)
- ಬುಧಾದಿತ್ಯ ಯೋಗದ ಬಲ: ಸಿಂಹ ರಾಶಿಯಲ್ಲಿ ಸೂರ್ಯ ಮತ್ತು ಬುಧ ಒಟ್ಟಿಗೆ ಇರುವುದರಿಂದ ‘ಬುಧಾದಿತ್ಯ ರಾಜಯೋಗ’ ಉಂಟಾಗುತ್ತದೆ. ಇದು ಬುದ್ಧಿವಂತಿಕೆ, ನಿರ್ಧಾರ ಕೈಗೊಳ್ಳುವ ಸಾಮರ್ಥ್ಯ ಮತ್ತು ಆಡಳಿತಾತ್ಮಕ ಚಾತುರ್ಯವನ್ನು ಹೆಚ್ಚಿಸುತ್ತದೆ.
- ಕೇತುವಿನ ಪ್ರಭಾವ: ಕೇತುವು ಆಧ್ಯಾತ್ಮಿಕತೆ, ವಿಶ್ಲೇಷಣೆ ಮತ್ತು ವೈರಾಗ್ಯದ ಕಾರಕ. ಸೂರ್ಯ-ಬುಧರೊಂದಿಗೆ ಕೇತು ಸೇರುವುದರಿಂದ ಕೆಲವೊಮ್ಮೆ ನಿರ್ಧಾರಗಳಲ್ಲಿ ಗೊಂದಲ, ಅತಿಯಾದ ಯೋಚನೆ ಅಥವಾ ಮಾತಿನಲ್ಲಿ ತೀಕ್ಷ್ಣತೆ ಕಾಣಿಸಿಕೊಳ್ಳಲಿದೆ.
- ಮಾತು ಮತ್ತು ಕೌಶಲ: ಬುಧನು ವಾಕ್ ಶಕ್ತಿಯ ಪ್ರತೀಕ. ಕೇತುವಿನ ಸಂಯೋಗವಿದ್ದಾಗ ಮಾತಿನಲ್ಲಿ ನೇರವಂತಿಕೆ ಹಾಗೂ ನಿಖರತೆ ಇರುತ್ತದೆ. ಸಂಶೋಧನಾ ರಂಗದಲ್ಲಿ ಇರುವವರಿಗೆ ಇದು ಅತ್ಯುತ್ತಮ ಕಾಲ.
ಸಿಂಹ ರಾಶಿಯಲ್ಲಿ ಯೋಗದ ವಿಶೇಷ ಫಲಗಳು
ಸಿಂಹ ರಾಶಿಯು ಧೈರ್ಯ, ನಾಯಕತ್ವ, ಅಧಿಕಾರ ಮತ್ತು ಅಹಂಕಾರದ ಪ್ರತೀಕವಾದ ರವಿಯ ಸ್ವಂತ ಕ್ಷೇತ್ರ. ಈ ರಾಶಿಯಲ್ಲಿ ಈ ಮೂರು ಗ್ರಹಗಳು ಕೂಡುವುದು ಜಾಗತಿಕವಾಗಿ ಮತ್ತು ವ್ಯಕ್ತಿಗತವಾಗಿ ಈ ಕೆಳಗಿನ ಫಲಗಳನ್ನು ನೀಡುತ್ತದೆ:
- ಆಡಳಿತ ಮತ್ತು ರಾಜಕೀಯ: ರಾಜಕೀಯ ನಾಯಕರು, ಉನ್ನತ ಅಧಿಕಾರಿಗಳು ಹಾಗೂ ಆಡಳಿತ ವರ್ಗದವರಿಗೆ ಕಠಿಣ ಹಾಗೂ ದಿಢೀರ್ ನಿರ್ಧಾರಗಳನ್ನು ಕೈಗೊಳ್ಳುವ ಅನಿವಾರ್ಯ ಎದುರಾಗುತ್ತದೆ.
- ಮಾಧ್ಯಮ ಹಾಗೂ ಸೃಜನಶೀಲತೆ: ಪತ್ರಕರ್ತರು, ಲೇಖಕರು, ಸಂಪಾದಕರು ಮತ್ತು ಮಾಧ್ಯಮ ಕ್ಷೇತ್ರದಲ್ಲಿರುವವರಿಗೆ ಹೊಸ ಆಲೋಚನೆಗಳು ಹೊಳೆಯಲಿವೆ. ಆದರೆ ಸಾರ್ವಜನಿಕವಾಗಿ ಮಾತನಾಡುವಾಗ ಅಥವಾ ಪದಗಳ ಬಳಕೆಯಲ್ಲಿ ಎಚ್ಚರಿಕೆ ಅವಶ್ಯಕ.
- ಆತ್ಮಾವಲೋಕನ: ಕೇವಲ ಹೊರಗಿನ ಸಾಧನೆಗಿಂತ ಆತ್ಮಾವಲೋಕನ ಮಾಡಿಕೊಳ್ಳಲು ಮತ್ತು ಗುಪ್ತ ಪ್ರತಿಭೆಗಳನ್ನು ಹೊರಹಾಕಲು ಈ ಕಾಲಘಟ್ಟವು ಅನುಕೂಲಕರವಾಗಿದೆ.
ಸಿಂಹ ರಾಶಿ ಫಲ: ಇವರ ಆರೋಗ್ಯ, ಹಣಕಾಸು ಮತ್ತು ಸಂಸಾರದಲ್ಲಿನ ಏರಿಳಿತಗಳಿಗೆ ಸರಳ ಪರಿಹಾರಗಳು
ದ್ವಾದಶ ರಾಶಿಗಳ ಮೇಲೆ ತ್ರಿಗ್ರಹ ಯೋಗದ ಪ್ರಭಾವ
ಈ ತ್ರಿಗ್ರಹ ಯೋಗವು ಹನ್ನೆರಡು ರಾಶಿಗಳ ಮೇಲೆ ಬೀರುವ ಫಲಗಳು ಇಲ್ಲಿವೆ:
- ಮೇಷ ರಾಶಿ: ಸೃಜನಶೀಲತೆ ಹೆಚ್ಚಾಗುತ್ತದೆ. ಮಕ್ಕಳ ವಿದ್ಯಾಭ್ಯಾಸದ ಬಗ್ಗೆ ಹೆಚ್ಚಿನ ಗಮನ ಹರಿಸಬೇಕಾಗುತ್ತದೆ. ಅಂದಾಜಿಗೂ ಮೀರಿದ ಧನಲಾಭದ ಸಾಧ್ಯತೆ ಇದೆ.
- ವೃಷಭ ರಾಶಿ: ಕುಟುಂಬದಲ್ಲಿ ಸಣ್ಣಪುಟ್ಟ ಭಿನ್ನಾಭಿಪ್ರಾಯಗಳು ಮೂಡಲಿವೆ. ವಾಹನ ಅಥವಾ ಆಸ್ತಿ ಖರೀದಿ ವಿಚಾರದಲ್ಲಿ ಎಚ್ಚರಿಕೆಯ ಹೆಜ್ಜೆ ಇಡುವುದು ಉತ್ತಮ.
- ಮಿಥುನ ರಾಶಿ: ನಿಮ್ಮ ಧೈರ್ಯ ಮತ್ತು ಪರಾಕ್ರಮ ಹೆಚ್ಚಾಗುತ್ತದೆ. ಕೃಷಿ, ಮಾಧ್ಯಮ ಹಾಗೂ ಬರವಣಿಗೆ ವಲಯದಲ್ಲಿ ಇರುವವರಿಗೆ ಯಶಸ್ಸು ಸಿಗಲಿದೆ. ಪ್ರಯಾಣಗಳಿಂದ ಲಾಭವಿದೆ.
- ಕರ್ಕಾಟಕ ರಾಶಿ: ಮಾತಿನ ಮೇಲೆ ಹಿಡಿತವಿರಲಿ. ಆರ್ಥಿಕ ವ್ಯವಹಾರಗಳಲ್ಲಿ ಎಚ್ಚರಿಕೆ ಅಗತ್ಯ. ಅನಗತ್ಯ ಖರ್ಚುಗಳನ್ನು ನಿಯಂತ್ರಿಸುವುದು ಉತ್ತಮ.
- ಸಿಂಹ ರಾಶಿ: ನಿಮ್ಮದೇ ರಾಶಿಯಲ್ಲಿ ಈ ಯೋಗ ಇರುವುದರಿಂದ ಆತ್ಮವಿಮರ್ಶೆ ಹೆಚ್ಚಾಗುತ್ತದೆ. ಆರೋಗ್ಯದ ಕಡೆಗೆ ವಿಶೇಷ ಕಾಳಜಿ ವಹಿಸಿ. ಉದ್ಯೋಗದಲ್ಲಿ ಹೊಸ ಜವಾಬ್ದಾರಿಗಳು ಬರಲಿವೆ.
- ಕನ್ಯಾ ರಾಶಿ: ದೂರ ಪ್ರಯಾಣ ಮಾಡುವ ಯೋಗವಿದೆ. ಖರ್ಚು- ವೆಚ್ಚಗಳು ಸ್ವಲ್ಪ ಹೆಚ್ಚಾಗಬಹುದು. ಆಧ್ಯಾತ್ಮಿಕ ಚಿಂತನೆಗಳಲ್ಲಿ ಒಲವು ಮೂಡುವುದು.
- ತುಲಾ ರಾಶಿ: ಆದಾಯದ ಮಾರ್ಗಗಳಲ್ಲಿ ಏರಿಳಿತವಿರಲಿದೆ. ಸ್ನೇಹಿತರ ಸಹಕಾರ ದೊರೆಯಲಿದೆ. ಹಿರಿಯರ ಆರೋಗ್ಯದ ಬಗ್ಗೆ ಕಾಳಜಿ ಇರಲಿ.
- ವೃಶ್ಚಿಕ ರಾಶಿ: ವೃತ್ತಿಜೀವನದಲ್ಲಿ ಉನ್ನತ ಸ್ಥಾನಮಾನ ದೊರೆಯುವ ಸಮಯ. ಸಮಾಜದಲ್ಲಿ ನಿಮ್ಮ ಗೌರವ-ಪ್ರತಿಷ್ಠೆ ಹೆಚ್ಚಾಗುತ್ತದೆ. ಹೊಸ ಯೋಜನೆಗಳಿಗೆ ಚಾಲನೆ ಸಿಗಲಿದೆ.
- ಧನು ರಾಶಿ: ಅದೃಷ್ಟದ ಸಂಪೂರ್ಣ ಬೆಂಬಲ ಸಿಗಲಿದೆ. ಧಾರ್ಮಿಕ ಹಾಗೂ ಶೈಕ್ಷಣಿಕ ಕಾರ್ಯಗಳಲ್ಲಿ ಆಸಕ್ತಿ ಹೆಚ್ಚಾಗಲಿದೆ. ದೂರದ ಊರುಗಳ ಪ್ರಯಾಣ ಫಲಪ್ರದವಾಗಲಿದೆ.
- ಮಕರ ರಾಶಿ: ಅನಿರೀಕ್ಷಿತ ಸವಾಲುಗಳು ಎದುರಾಗಲಿವೆ. ಆರೋಗ್ಯದ ವಿಷಯದಲ್ಲಿ ಯಾವುದೇ ನಿರ್ಲಕ್ಷ್ಯ ಬೇಡ. ಹಣಕಾಸಿನ ವಿಚಾರದಲ್ಲಿ ಎಚ್ಚರಿಕೆಯಿಂದ ನಡೆದುಕೊಳ್ಳಿ.
- ಕುಂಭ ರಾಶಿ: ವೈವಾಹಿಕ ಜೀವನದಲ್ಲಿ ಹೊಂದಾಣಿಕೆ ಅಗತ್ಯ. ಪಾಲುದಾರಿಕೆ ವ್ಯವಹಾರಗಳಲ್ಲಿ ಸ್ಪಷ್ಟತೆ ಇರಲಿ. ಸಾರ್ವಜನಿಕ ಸಂಪರ್ಕ ವಿಸ್ತಾರಗೊಳ್ಳಲಿದೆ.
- ಮೀನ ರಾಶಿ: ಶತ್ರುಗಳ ಕಾಟ ನಿವಾರಣೆಯಾಗುತ್ತದೆ. ದೀರ್ಘಕಾಲದ ಅನಾರೋಗ್ಯ ಸಮಸ್ಯೆಗಳಿಂದ ಮುಕ್ತಿ ಪಡೆಯುವಿರಿ. ಸಾಲಬಾಧೆಗಳು ತಗ್ಗಲಿವೆ.
ದಶರಥ ಕೃತ ಶನಿ ಸ್ತೋತ್ರ: ಸಾಡೇಸಾತಿ ಕಷ್ಟಗಳಿಂದ ಮುಕ್ತಿ ಪಡೆಯಲು ಇಲ್ಲಿದೆ ರಾಮಬಾಣ!
ಕೊನೆಮಾತು:
ಆಗಸ್ಟ್ 22ರಿಂದ ಸೆಪ್ಟೆಂಬರ್ 7ರವರೆಗಿನ ಈ ಅವಧಿಯು ಸವಾಲುಗಳ ಜೊತೆಗೆ ಹೊಸ ಆಲೋಚನೆ- ದೃಷ್ಟಿಕೋನ ನೀಡಲಿದೆ. ಕೇತುವಿನ ಪ್ರಭಾವ ಇರುವುದರಿಂದ ಆತುರದ ನಿರ್ಧಾರಗಳನ್ನು ಕೈಗೊಳ್ಳದೆ ಸೂರ್ಯ ಮತ್ತು ಬುಧನ ಬಲದಿಂದ ವಿವೇಚನೆಯಿಂದ ಮುನ್ನಡೆದರೆ ಈ ತ್ರಿಗ್ರಹ ಯೋಗವು ಜೀವನದಲ್ಲಿ ಹೊಸ ದಿಕ್ಕನ್ನು ತೋರಿಸಲು ಸಹಕಾರಿ ಆಗುತ್ತದೆ.
ಲೇಖನ- ಶ್ರೀನಿವಾಸ ಮಠ
