ಜಾತಕದಲ್ಲಿ ಗ್ರಹದೋಷವೇ? ದಶಾಸಂಧಿ ನವಗ್ರಹ ಶಾಂತಿ ಮಾಡಿಸುವ ಮುನ್ನ ಈ ಶಾಸ್ತ್ರೋಕ್ತ ನಿಯಮಗಳು ತಿಳಿದಿರಲಿ!

ನವಗ್ರಹ ಹೋಮ, ದಶಾಸಂಧಿ ಶಾಂತಿ, ಜನ್ಮ ಜಾತಕದಲ್ಲಿ ನೀಚ ಸ್ಥಿತಿಯಲ್ಲಿ ಇರುವ ಗ್ರಹಗಳಿಗೆ ಶಾಂತಿ ಹೀಗೆ ನವಗ್ರಹಗಳಿಗೆ ಸಂಬಂಧಿಸಿದ ವಿವಿಧ ಶಾಂತಿಗಳನ್ನು ಮಾಡಿಸಿಕೊಳ್ಳುತ್ತಾರೆ, ಪುರೋಹಿತರ ಮೂಲಕ ಮಾಡಿಸುತ್ತಾರೆ. ಹೀಗೆ ಗ್ರಹ ಶಾಂತಿ ಮಾಡಿಸುವ ಮುಂಚೆ ತಿಳಿದಿರಬೇಕಾದ ಪ್ರಾಥಮಿಕ ಸಂಗತಿಗಳನ್ನು ತಿಳಿಸಿಕೊಡುವ ಲೇಖನವಿದು. ಯಾವುದೇ ಗ್ರಹದ ಶಾಂತಿ ಪ್ರಕ್ರಿಯೆಯಲ್ಲಿ ಆಯಾ ಗ್ರಹಕ್ಕೆ ನಿಗದಿಪಡಿಸಿದ ನಿರ್ದಿಷ್ಟ ಸಂಖ್ಯೆಯ ಜಪವನ್ನು ಪೂರ್ಣಗೊಳಿಸಿದ ನಂತರವೇ ಹೋಮವನ್ನು ಮಾಡುವುದು ಶಾಸ್ತ್ರೋಕ್ತವಾದ ವಿಧಿ.

ದಶಾಸಂಧಿ ಕಾಲದಲ್ಲಿ (ಒಂದು ಮಹಾದಶೆ ಮುಗಿದು ಮತ್ತೊಂದು ಮಹಾದಶೆ ಆರಂಭವಾಗುವ ಸಂಧಿಕಾಲ) ಎರಡು ಗ್ರಹಗಳ ಹಾಗೂ ಅವುಗಳ ಅಧಿದೇವತೆ, ಪ್ರತ್ಯಧಿದೇವತೆಗಳ ಜಪ-ಹೋಮಗಳನ್ನು ಮಾಡುವುದು ಅನಿವಾರ್ಯ.

ಈ ಜಪಸಂಖ್ಯೆಗಳಿಗೆ ಆಧಾರವಾಗಿರುವ ಶಾಸ್ತ್ರೋಕ್ತ ಶ್ಲೋಕ, ಮೂಲ ಗ್ರಂಥದ ವಿವರ ಇಲ್ಲಿದೆ:

ದಶಾಸಂಧಿ ಶಾಂತಿ ಮತ್ತು ಅಧಿದೇವತೆ-ಪ್ರತ್ಯಧಿದೇವತೆಗಳ ಮಹತ್ವ

ಜ್ಯೋತಿಷ್ಯ ಶಾಸ್ತ್ರದ ಪ್ರಕಾರ, ವ್ಯಕ್ತಿಯೊಬ್ಬನ ಜೀವನದಲ್ಲಿ ಒಂದು ಗ್ರಹದ ದಶೆ ಮುಗಿದು ಮತ್ತೊಂದು ಗ್ರಹದ ದಶೆ ಆರಂಭವಾಗುವ ಸೌಮ್ಯ-ಕ್ರೂರ ಗ್ರಹಗಳ ಸಂಧಿಕಾಲವನ್ನು ‘ದಶಾಸಂಧಿ’ ಎನ್ನಲಾಗುತ್ತದೆ (ಉದಾಹರಣೆಗೆ: ಶುಕ್ರ ದಶೆ ಮುಗಿದು ರವಿ ದಶೆ ಬರುವಾಗ, ಕುಜ ದೋಷ ಮುಗಿದು ರಾಹು ದಶೆಯ ಆರಂಭ ಅಥವಾ ರಾಹು ದಶೆ ಮುಗಿದು ಗುರು ದಶೆ ಬರುವಾಗ). ಈ ಕಾಲಾವಧಿಯು ಸಾಮಾನ್ಯವಾಗಿ ಮಾನಸಿಕ, ದೈಹಿಕ ಅಥವಾ ಆರ್ಥಿಕ ಏರುಪೇರುಗಳಿಗೆ ಕಾರಣವಾಗುತ್ತದೆ.

ದಶಾಸಂಧಿ ಶಾಂತಿ ಮಾಡುವಾಗ ಕೇವಲ ಮೂಲ ಗ್ರಹಗಳಷ್ಟೇ ಅಲ್ಲದೆ, ಅವುಗಳ ಅಧಿದೇವತೆ ಮತ್ತು ಪ್ರತ್ಯಧಿದೇವತೆಗಳನ್ನೂ ಆರಾಧಿಸಬೇಕು ಎಂಬುದು ನಿಯಮ.

ನವಗ್ರಹ ಸ್ತೋತ್ರ ಮಾಲೆ: ಗ್ರಹದೋಷ ನಿವಾರಣೆ, ಜೀವನದಲ್ಲಿ ಸಮೃದ್ಧಿಗೆ ದಿವ್ಯ ಮಾರ್ಗ

ಶಾಸ್ತ್ರ ನಿಯಮ: “ಅಧಿದೇವತಾ ಪ್ರತ್ಯಧಿದೇವತಾ ಸಹಿತ ನವಗ್ರಹ ದೇವತಾಭ್ಯೋ ನಮಃ“ ಎಂದು ಸಂಕಲ್ಪ ಮಾಡಿ, ಮೂಲ ಗ್ರಹದ ಜಪ ಸಂಖ್ಯೆಯ ದಶಮಾಂಶದಷ್ಟು (10%) ಸಂಖ್ಯೆಯಲ್ಲಿ ಅಧಿದೇವತೆ ಮತ್ತು ಪ್ರತ್ಯಧಿದೇವತೆಗಳ ಜಪವನ್ನೂ ಮಾಡಬೇಕು.

ನವಗ್ರಹಗಳ ಅಧಿದೇವತೆ ಮತ್ತು ಪ್ರತ್ಯಧಿದೇವತೆಗಳ ಪಟ್ಟಿ:

ಸಪ್ತಸಹಸ್ರಂ ಸೂರ್ಯಸ್ಯ ಚಂದ್ರಸ್ಯಾಪ್ಯೇಕಾದಶ।
ದಶಸಹಸ್ರಂ ಭೌಮಸ್ಯ ಬುಧಸ್ಯ ಚ ಚತುಃಸಹಸ್ರಕಮ್॥
ಏಕೋನವಿಂಶತಿಸ್ಸಹಸ್ರಂ ಗುರೋಃ ಶುಕ್ರಸ್ಯ ಷೋಡಶ।
ತ್ರಯೋವಿಂಶತಿಸ್ಸಹಸ್ರಂ ಶನೇರಷ್ಟಾದಶೈವ ಚ॥
ರಾಹೋರಷ್ಟಾದಶಸಹಸ್ರಂ ಕೇತೋಃ ಸಪ್ತದಶ ಸ್ಮೃತಮ್॥

ಅರ್ಥ:

• ಸೂರ್ಯ – 7,000 ಜಪ
• ಚಂದ್ರ – 11,000 ಜಪ
• ಕುಜ – 10,000 ಜಪ
• ಬುಧ – 4,000 ಜಪ
• ಗುರು – 19,000 ಜಪ
• ಶುಕ್ರ – 16,000 ಜಪ
• ಶನಿ – 23,000 ಜಪ
• ರಾಹು – 18,000 ಜಪ
• ಕೇತು – 17,000 ಜಪ

ಮೂಲ: ಜ್ಯೋತಿರ್ನಿಬಂಧ, ಕಾಲಪ್ರಕಾಶಿಕಾ (ಗ್ರಹಶಾಂತಿ ಪ್ರಕರಣ)

ಒಟ್ಟು ನವಗ್ರಹಗಳ ಮಹಾಜಪ ಸಂಖ್ಯೆ: 1,25,000 (ಒಂದು ಲಕ್ಷದ ಇಪ್ಪತ್ತೈದು ಸಾವಿರ)

ಸೂರ್ಯನಿಂದ ಕೇತುವಿನವರೆಗೆ: ನಿಮ್ಮ ಜೀವನದ ಮೇಲೆ ಒಂಬತ್ತು ಗ್ರಹಗಳ ಪರಿಣಾಮ ಹೇಗಿರುತ್ತದೆ?

ಜಪ ಮತ್ತು ಹೋಮದ ಕ್ರಮವಿಧಿ (ಶಾಸ್ತ್ರೋಕ್ತ ನಿಯಮಗಳು)

ಶಾಸ್ತ್ರಗಳ ಪ್ರಕಾರ ಜಪ ಮತ್ತು ಹೋಮಗಳನ್ನು ಮಾಡುವಾಗ ಈ ಕೆಳಗಿನ ಕ್ರಮವನ್ನು ಕಡ್ಡಾಯವಾಗಿ ಪಾಲಿಸಬೇಕು:

1. ಸಂಕಲ್ಪ ಮತ್ತು ಅಂಗನ್ಯಾಸ-ಕರನ್ಯಾಸ: ದಶಾಸಂಧಿ ನಿವಾರಣೆಗಾಗಿ ಆಯಾ ಗ್ರಹಗಳ ಪ್ರೀತ್ಯರ್ಥವಾಗಿ ಜಪ ಮಾಡುತ್ತಿರುವುದಾಗಿ ಬ್ರಾಹ್ಮಣರ ಮುಖೇನ ಸಂಕಲ್ಪ ಮಾಡಬೇಕು.
2. ಪೂರ್ಣ ಜಪ ಸಂಖ್ಯೆ: ಹೋಮದ ಕುಂಡಕ್ಕೆ ಅಗ್ನಿಸ್ಪರ್ಶ ಮಾಡುವ ಮುನ್ನವೇ ಮೇಲೆ ತಿಳಿಸಿದ ಪೂರ್ಣ ಸಂಖ್ಯೆಯ ಜಪ ಮುಗಿದಿರಬೇಕು. ಸ್ವತಃ ಜಪ ಮಾಡಲು ಸಾಧ್ಯವಾಗದಿದ್ದಲ್ಲಿ, ಯೋಗ್ಯರಾದ ಬ್ರಾಹ್ಮಣರ ಕೈಯಲ್ಲಿ ಜಪ ಮಾಡಿಸಬೇಕು.
3. ದಶಮಾಂಶ ಹೋಮ: ಜಪ ಮುಗಿದ ನಂತರ, ಒಟ್ಟು ಜಪ ಸಂಖ್ಯೆಯ ಹತ್ತನೇ ಒಂದು ಭಾಗದಷ್ಟು (1/10th – ದಶಮಾಂಶ) ಸಂಖ್ಯೆಯಲ್ಲಿ ಆಯಾ ಗ್ರಹಕ್ಕೆ ಪ್ರಿಯವಾದ ಸಮಿಧೆ (ನವಗ್ರಹ ಸಮಿಧೆಗಳು), ಹವಿಸ್ಸು ಮತ್ತು ದ್ರವ್ಯಗಳನ್ನು ಬಳಸಿ ಹೋಮ ಮಾಡಬೇಕು. (ಉದಾಹರಣೆಗೆ: ರವಿಗೆ 7,000 ಜಪ ಮಾಡಿದರೆ, 700 ಆಹುತಿಗಳ ಹೋಮ ಮಾಡಬೇಕು).
4. ತರ್ಪಣ ಮತ್ತು ಮಾರ್ಜನ: ಹೋಮದ ನಂತರ ಹೋಮ ಸಂಖ್ಯೆಯ ದಶಮಾಂಶದಷ್ಟು ತರ್ಪಣ ಹಾಗೂ ಮಾರ್ಜನ ಕ್ರಿಯೆಗಳನ್ನು ನೆರವೇರಿಸುವುದರಿಂದ ಶಾಂತಿ ಪ್ರಕ್ರಿಯೆಯು ಸಂಪೂರ್ಣವಾಗುತ್ತದೆ.

ಸಂಗ್ರಹ ರೂಪದಲ್ಲಿ ಹೇಳುವುದಾದರೆ, ಗ್ರಹಗಳ ದೋಷ ಪರಿಹಾರಕ್ಕೆ ಶ್ರದ್ಧೆ ಮತ್ತು ಶಾಸ್ತ್ರೋಕ್ತ ಸಂಖ್ಯೆಯ ಜಪವೇ ಮೂಲ ಬುನಾದಿ. ನಿಯಮಬದ್ಧವಾಗಿ ದಶಾಸಂಧಿ ಹಾಗೂ ನವಗ್ರಹ ಶಾಂತಿ ಮಾಡಿಸುವುದರಿಂದ ಗ್ರಹಗಳ ಕ್ರೂರ ದೃಷ್ಟಿ ನಿವಾರಣೆಯಾಗಿ, ದೇವತಾ ಅನುಗ್ರಹ ಲಭಿಸುತ್ತದೆ.

ಲೇಖನ- ಶ್ರೀನಿವಾಸ ಮಠ