ವರ್ಷದ 364 ದಿನ ಶ್ರೀಗಂಧದ ಲೇಪನದಲ್ಲಿರುವ ನರಸಿಂಹ! ಸಿಂಹಾಚಲಂ ಕ್ಷೇತ್ರದ ಪೌರಾಣಿಕ ಹಿನ್ನೆಲೆ ನಿಮಗೆ ಗೊತ್ತೇ?

ಆಂಧ್ರಪ್ರದೇಶದ ವಿಶಾಖಪಟ್ಟದಲ್ಲಿರುವ ಶ್ರೀ ವರಾಹ ಲಕ್ಷ್ಮಿ ನರಸಿಂಹ ಸ್ವಾಮಿ ದೇವಸ್ಥಾನ (ಸಿಂಹಾಚಲಂ) ದಕ್ಷಿಣ ಭಾರತದ ಅತ್ಯಂತ ಪವಿತ್ರ ಮತ್ತು ಪುರಾತನ ನರಸಿಂಹ ಕ್ಷೇತ್ರಗಳಲ್ಲಿ ಒಂದಾಗಿದೆ. ಈ ದೇವಾಲಯದ ಬಗ್ಗೆ ಸಂಪೂರ್ಣ ಮಾಹಿತಿ ಇಲ್ಲಿದೆ:

ಪೌರಾಣಿಕ ಹಿನ್ನೆಲೆ 

ಪುರಾಣಗಳ ಪ್ರಕಾರ, ಈ ಬೆಟ್ಟವು ಭಕ್ತ ಪ್ರಹ್ಲಾದನಿಗೆ ಸಂಬಂಧಿಸಿದ್ದು. ಹಿರಣ್ಯಕಶಿಪು ತನ್ನ ಮಗ ಪ್ರಹ್ಲಾದನನ್ನು ಕೊಲ್ಲಲು ಬೆಟ್ಟದ ಮೇಲಿಂದ ಸಮುದ್ರಕ್ಕೆ ಎಸೆದಾಗ, ಭಗವಾನ್ ವಿಷ್ಣುವು ಪ್ರಹ್ಲಾದನನ್ನು ರಕ್ಷಿಸಲು ಇಲ್ಲಿ ನೆಲೆಸಿದನು ಎಂಬ ನಂಬಿಕೆಯಿದೆ.

ಮತ್ತೊಂದು ಕಥೆಯ ಪ್ರಕಾರ, ಕೃತಯುಗದಲ್ಲಿ ವಿಷ್ಣುವು ತನ್ನ ಭಕ್ತನನ್ನು ರಕ್ಷಿಸಲು ವರಾಹ (ಹಂದಿ) ಮತ್ತು ನರಸಿಂಹ (ಸಿಂಹ) ರೂಪಗಳ ಸಂಯೋಗದೊಂದಿಗೆ ಇಲ್ಲಿ ಉದ್ಭವಿಸಿದನು. ಆದ್ದರಿಂದ ಇಲ್ಲಿನ ದೇವರಿಗೆ ‘ವರಾಹ ಲಕ್ಷ್ಮಿ ನರಸಿಂಹ ಸ್ವಾಮಿ’ ಎಂದು ಹೆಸರು.

ಸಿಂಹಾಚಲಂ ದೇವಸ್ಥಾನದ ಇತಿಹಾಸ ಮತ್ತು ಶಾಸನಗಳು

ಸಿಂಹಾಚಲಂ ದೇವಸ್ಥಾನವು ಕೇವಲ ಧಾರ್ಮಿಕ ಕೇಂದ್ರವಲ್ಲ, ಇದು ಐತಿಹಾಸಿಕ ದಾಖಲೆಗಳ ಭಂಡಾರವೂ ಹೌದು. ಇದರ ಇತಿಹಾಸದ ಪ್ರಮುಖ ಮೈಲುಗಲ್ಲುಗಳು ಇಲ್ಲಿವೆ:

• ಚೋಳರ ಕೊಡುಗೆ: ತಮಿಳುನಾಡಿನ ರಾಜ ಮೊದಲನೇ ಕುಲೋತ್ತುಂಗ ಚೋಳ ಈ ದೇವಸ್ಥಾನಕ್ಕೆ ದಾನದತ್ತಿಗಳನ್ನು ನೀಡಿದ್ದನು. ಇದಕ್ಕೆ ಸಾಕ್ಷಿಯಾಗಿ ಕ್ರಿ.ಶ. 1087ರ ಕಾಲದ ಶಾಸನಗಳು ಇಲ್ಲಿ ಲಭ್ಯವಿವೆ.
• ಚಾಲುಕ್ಯರ ನವೀಕರಣ: ಆಂಧ್ರಪ್ರದೇಶದ ವೆಂಗಿ ಚಾಲುಕ್ಯರು 11ನೇ ಶತಮಾನದಲ್ಲಿ ದೇವಸ್ಥಾನದ ಮೂಲ ಗರ್ಭಗುಡಿಯನ್ನು ನವೀಕರಿಸಿದರು.
• ಪೂರ್ವ ಗಂಗಾ ರಾಜವಂಶ: ಇಂದು ನಾವು ನೋಡುತ್ತಿರುವ ದೇವಸ್ಥಾನದ ಬಹುಪಾಲು ರಚನೆಯು ಕ್ರಿ.ಶ. 13ನೇ ಶತಮಾನದ ದ್ವಿತೀಯಾರ್ಧದಲ್ಲಿ ಪೂರ್ವ ಗಂಗಾ ರಾಜವಂಶದ ಮೊದಲನೇ ನರಸಿಂಹ ಎಂಬ ರಾಜನು ಮಾಡಿದ ನವೀಕರಣದ ಫಲವಾಗಿದೆ.
• ಶ್ರೀಕೃಷ್ಣದೇವರಾಯನ ಭೇಟಿ: ವಿಜಯನಗರದ ಸುಪ್ರಸಿದ್ಧ ಸಾಮ್ರಾಟ ಶ್ರೀಕೃಷ್ಣದೇವರಾಯನು ಕ್ರಿ.ಶ. 1516 ರಲ್ಲಿ ಈ ದೇವಸ್ಥಾನಕ್ಕೆ ಭೇಟಿ ನೀಡಿದ್ದನು. ಅಲ್ಲಿನ ಶಾಸನಗಳಲ್ಲಿ ಈ ಭೇಟಿಯ ಬಗ್ಗೆ ಸ್ಪಷ್ಟವಾದ ಉಲ್ಲೇಖಗಳಿವೆ.
• ಶಾಸನಗಳ ಸಂಖ್ಯೆ: ಈ ದೇವಸ್ಥಾನದ ಗೋಡೆಗಳ ಮೇಲೆ ಸುಮಾರು 525 ಶಾಸನಗಳು ಕೆತ್ತಲಾಗಿವೆ. ಇದು ಆ ಕಾಲದ ರಾಜಕೀಯ ಮತ್ತು ಸಾಮಾಜಿಕ ಇತಿಹಾಸಕ್ಕೆ ಕನ್ನಡಿ ಹಿಡಿದಿದೆ.
• ಪ್ರಾಚೀನತೆ: ದೇವಸ್ಥಾನದ ಕೆಲವು ಶಾಸನಗಳು ಕ್ರಿ.ಶ. 1098ರಷ್ಟು ಹಳೆಯದಾಗಿದ್ದು, ಈ ದೇವಸ್ಥಾನವು ಭಾರತದ ಅತ್ಯಂತ ವಿಶಿಷ್ಟ ಮತ್ತು ಐತಿಹಾಸಿಕ ವಾಸ್ತುಶಿಲ್ಪದ ಮಾದರಿಗಳಲ್ಲಿ ಒಂದಾಗಿದೆ.

 ದೇವಸ್ಥಾನದ ವಿಶೇಷತೆ ಮತ್ತು ಪೂಜೆ

ಸಿಂಹಾಚಲಂ ದೇವಸ್ಥಾನದ ಅತ್ಯಂತ ದೊಡ್ಡ ವಿಶೇಷತೆಯೆಂದರೆ ಇಲ್ಲಿನ ವಿಗ್ರಹದ ರೂಪ.

• ಶ್ರೀಗಂಧದ ಲೇಪನ: ಇಲ್ಲಿನ ವಿಗ್ರಹವು ವರ್ಷದ 364 ದಿನಗಳು ದಪ್ಪನೆಯ ಶ್ರೀಗಂಧದ ಲೇಪನದಿಂದ ಮುಚ್ಚಲ್ಪಟ್ಟಿರುತ್ತದೆ. ಇದು ನೋಡಲು ಒಂದು ದೊಡ್ಡ ‘ಶಿವಲಿಂಗ’ದಂತೆ ಕಾಣಿಸುತ್ತದೆ.
• ಚಂದನೋತ್ಸವ (ನಿಜರೂಪ ದರ್ಶನ): ವರ್ಷಕ್ಕೆ ಒಮ್ಮೆ ಮಾತ್ರ, ಅಂದರೆ ವೈಶಾಖ ಮಾಸದ ಅಕ್ಷಯ ತೃತೀಯ ದಿನದಂದು ಮಾತ್ರ ಈ ಶ್ರೀಗಂಧವನ್ನು ತೆಗೆಯಲಾಗುತ್ತದೆ. ಅಂದು ಕೇವಲ 12 ಗಂಟೆಗಳ ಕಾಲ ಭಕ್ತರಿಗೆ ಸ್ವಾಮಿಯ ಮೂಲ ರೂಪ ಅಥವಾ ‘ನಿಜರೂಪ ದರ್ಶನ’ ಭಾಗ್ಯ ಲಭಿಸುತ್ತದೆ.
• ವಾಸ್ತುಶಿಲ್ಪ: ಇದು ಕಳಿಂಗ, ಚೋಳ ಮತ್ತು ಚಾಲುಕ್ಯ ಶೈಲಿಯ ವಾಸ್ತುಶಿಲ್ಪದ ಸುಂದರ ಮಿಶ್ರಣವಾಗಿದೆ.

ಸಿಂಹಾಚಲಂ ದೇವಸ್ಥಾನದಲ್ಲಿನ ಪ್ರಮುಖ ಹಬ್ಬಗಳು

ಈ ದೇವಸ್ಥಾನವು ವರ್ಷಪೂರ್ತಿ ವಿವಿಧ ಹಬ್ಬಗಳಿಂದ ಕಂಗೊಳಿಸುತ್ತಿರುತ್ತದೆ. ಅತ್ಯಂತ ಭಕ್ತಿ ಮತ್ತು ವೈಭವದಿಂದ ಆಚರಿಸಲಾಗುವ ಪ್ರಮುಖ ಹಬ್ಬಗಳು ಈ ಕೆಳಗಿನಂತಿವೆ:

• ಚಂದನೋತ್ಸವ (ಅಕ್ಷಯ ತೃತೀಯ): ಇದು ಈ ಕ್ಷೇತ್ರದ ಅತ್ಯಂತ ಮಹತ್ವದ ಹಬ್ಬ. ವರ್ಷವಿಡೀ ವಿಗ್ರಹವನ್ನು ಮುಚ್ಚಿರುವ ಶ್ರೀಗಂಧದ ಲೇಪನವನ್ನು ಈ ದಿನ ತೆಗೆಯಲಾಗುತ್ತದೆ ಮತ್ತು ಭಕ್ತರಿಗೆ ಸ್ವಾಮಿಯ ಮೂಲ ವಿಗ್ರಹದ (ನಿಜರೂಪ) ದರ್ಶನ ಸಿಗುತ್ತದೆ. ಈ ಅಪರೂಪದ ದರ್ಶನಕ್ಕಾಗಿ ಲಕ್ಷಾಂತರ ಭಕ್ತರು ಇಲ್ಲಿಗೆ ಆಗಮಿಸುತ್ತಾರೆ.
• ನರಸಿಂಹ ಜಯಂತಿ: ನರಸಿಂಹ ಅವತರಿಸಿದ ದಿನವನ್ನು ಇದು ನೆನಪಿಸುತ್ತದೆ. ಈ ದಿನದಂದು ದೇವಸ್ಥಾನದಲ್ಲಿ ವಿಶೇಷ ಪ್ರಾರ್ಥನೆಗಳು, ಅಭಿಷೇಕ ಮತ್ತು ವೈವಿಧ್ಯಮಯ ಧಾರ್ಮಿಕ ವಿಧಿವಿಧಾನಗಳನ್ನು ನೆರವೇರಿಸಲಾಗುತ್ತದೆ.
• ವೈಕುಂಠ ಏಕಾದಶಿ: ಈ ಪವಿತ್ರ ದಿನದಂದು ಭಕ್ತರು ಸಾಗರೋಪಾದಿಯಲ್ಲಿ ಹರಿದು ಬರುತ್ತಾರೆ. ಅಂದು ದೇವಸ್ಥಾನದ ‘ವೈಕುಂಠ ದ್ವಾರ’ದ ಮೂಲಕ ಪ್ರವೇಶಿಸಿ ದರ್ಶನ ಪಡೆಯುವುದರಿಂದ ಮೋಕ್ಷ ಪ್ರಾಪ್ತಿಯಾಗುತ್ತದೆ ಎಂಬ ನಂಬಿಕೆಯಿದೆ.
• ಕಲ್ಯಾಣೋತ್ಸವ: ಇದು ದೇವರಿಗೆ ನಡೆಯುವ ದಿವ್ಯ ವಿವಾಹ ಮಹೋತ್ಸವ. ಈ ದೈವಿಕ ವಿವಾಹವನ್ನು ಕಣ್ಣಾರೆ ನೋಡುವುದು ಅತ್ಯಂತ ಮಂಗಳಕರವೆಂದು ಪರಿಗಣಿಸಲಾಗುತ್ತದೆ. ಇದು ಭಕ್ತರ ಜೀವನದಲ್ಲಿ ಸಮೃದ್ಧಿ ಮತ್ತು ಶಾಂತಿಯನ್ನು ತರುತ್ತದೆ ಎಂಬ ನಂಬಿಕೆಯಿದೆ.

ಪವಾಡಸದೃಶ ನಾಮಕ್ಕಲ್ ನರಸಿಂಹ ದೇವಸ್ಥಾನ: ಇಲ್ಲಿದೆ ಸಂಪೂರ್ಣ ದರ್ಶನ ಮಾಹಿತಿ ಮತ್ತು ವಿಶೇಷತೆಗಳು

ಭಕ್ತರ ಇಷ್ಟಾರ್ಥಗಳು 

ಭಕ್ತರ ನಂಬಿಕೆಯ ಪ್ರಕಾರ, ಈ ಕ್ಷೇತ್ರಕ್ಕೆ ಭೇಟಿ ನೀಡುವುದರಿಂದ ಈ ಕೆಳಗಿನ ಫಲಗಳು ದೊರೆಯುತ್ತವೆ:

• ಇಷ್ಟಾರ್ಥ ಸಿದ್ಧಿ: ಇಲ್ಲಿ ಪ್ರಾರ್ಥನೆ ಮಾಡುವುದರಿಂದ ಮನಸ್ಸಿನ ಇಚ್ಛೆಗಳು ಈಡೇರುತ್ತವೆ ಎಂಬ ದೃಢ ನಂಬಿಕೆಯಿದೆ.
• ದೋಷ ನಿವಾರಣೆ: ನರಸಿಂಹ ಸ್ವಾಮಿಯ ದರ್ಶನದಿಂದ ಶತ್ರು ಭಯ, ಗ್ರಹ ದೋಷಗಳು ಮತ್ತು ಮಾನಸಿಕ ಅಶಾಂತಿ ದೂರವಾಗುತ್ತದೆ.
• ಸಂತಾನ ಭಾಗ್ಯ: ದಂಪತಿಗಳು ಇಲ್ಲಿನ ಪೂಜೆಗಳಲ್ಲಿ ಭಾಗವಹಿಸುವುದರಿಂದ ಸಂತಾನ ಪ್ರಾಪ್ತಿಯಾಗುತ್ತದೆ ಎಂದು ನಂಬಲಾಗುತ್ತದೆ.

ಸಿಂಹಾಚಲಂ ಗಿರಿಪ್ರದಕ್ಷಿಣೆ 

ಸಿಂಹಾಚಲಂ ದೇವಸ್ಥಾನದ ಮತ್ತೊಂದು ವಿಶಿಷ್ಟ ಹಾಗೂ ರೋಮಾಂಚಕ ಆಚರಣೆಯೆಂದರೆ ಅದು ‘ಗಿರಿಪ್ರದಕ್ಷಿಣೆ’.

• ಸಮಯ: ಈ ಉತ್ಸವವು ಸಾಮಾನ್ಯವಾಗಿ ಜೂನ್ ಮತ್ತು ಜುಲೈ ತಿಂಗಳ ನಡುವೆ ಬರುವ ಆಷಾಢ ಮಾಸದ ಪೂರ್ಣಿಮೆಯಂದು (ಹುಣ್ಣಿಮೆ)ನಡೆಯುತ್ತದೆ.
• ವಿಶೇಷತೆ: ಈ ಶುಭ ದಿನದಂದು ಶ್ರೀ ವರಾಹ ಲಕ್ಷ್ಮಿ ನರಸಿಂಹ ಸ್ವಾಮಿಯು ಸಿಂಹಾಚಲಂ ಮತ್ತು ಕೈಲಾಸಗಿರಿ ಬೆಟ್ಟಗಳ ಸುತ್ತ ಭಕ್ತರಿಗೆ ದರ್ಶನ ನೀಡಲು ಹೊರಬರುತ್ತಾನೆ ಎಂಬ ನಂಬಿಕೆಯಿದೆ.
• ದೂರ ಮತ್ತು ಅವಧಿ: ಗಿರಿಪ್ರದಕ್ಷಿಣೆಯು ಒಟ್ಟು 40 ಕಿಲೋಮೀಟರ್‌ಗಳ ಪಾದಯಾತ್ರೆಯಾಗಿದೆ. ಸಿಂಹಾಚಲಂನಿಂದ ಪ್ರಾರಂಭವಾಗಿ ಕೈಲಾಸಗಿರಿ ಬೆಟ್ಟಗಳ ಮೂಲಕ ಸಾಗಿ ಮತ್ತೆ ದೇವಸ್ಥಾನಕ್ಕೆ ಹಿಂದಿರುಗುವ ಈ ಒಂದು ಸುತ್ತು ಪೂರ್ಣಗೊಳಿಸಲು ಸುಮಾರು 8 ಗಂಟೆಗಳ ಸಮಯ ಬೇಕಾಗುತ್ತದೆ.
• ನಂಬಿಕೆ: ಸಾವಿರಾರು ಭಕ್ತರು ಕಾಲ್ನಡಿಗೆಯ ಮೂಲಕ ಈ ದೀರ್ಘ ದೂರವನ್ನು ಕ್ರಮಿಸುತ್ತಾರೆ. ಹೀಗೆ ಬೆಟ್ಟವನ್ನು ಸುತ್ತುವರೆಯುವುದರಿಂದ ಭಗವಂತನ ಸಂಪೂರ್ಣ ಕೃಪೆ ಲಭಿಸುತ್ತದೆ ಮತ್ತು ಪಾಪಕರ್ಮಗಳು ದೂರವಾಗುತ್ತವೆ ಎಂಬುದು ಭಕ್ತರ ನಂಬಿಕೆ.

ದೇವಸ್ಥಾನದ ಸಮಯ (Temple Timings)

ದೇವಸ್ಥಾನವು ಪ್ರತಿದಿನ ಈ ಕೆಳಗಿನ ಸಮಯದಲ್ಲಿ ತೆರೆದಿರುತ್ತದೆ:

• ಬೆಳಗ್ಗೆ 7 ರಿಂದ 11.30 ವರೆಗೆ.
• ಮಧ್ಯಾಹ್ನ 12.30 ರಿಂದ 3 ವರೆಗೆ.
• ಮಧ್ಯಾಹ್ನ 3.30ರಿಂದ 7.30 ವರೆಗೆ (ವಿಶೇಷ ದಿನಗಳಲ್ಲಿ ಬದಲಾಗಬಹುದು).

ತಲುಪುವುದು ಹೇಗೆ? (How to Reach)

• ವಿಮಾನ: ಹತ್ತಿರದ ವಿಮಾನ ನಿಲ್ದಾಣ ವಿಶಾಖಪಟ್ಟಣಂ (Vizag). ಅಲ್ಲಿಂದ ದೇವಸ್ಥಾನಕ್ಕೆ ಸುಮಾರು 16 ಕಿ.ಮೀ ದೂರ.
• ರೈಲು: ವಿಶಾಖಪಟ್ಟಣಂ ರೈಲ್ವೆ ನಿಲ್ದಾಣವು ಹತ್ತಿರದ ಪ್ರಮುಖ ನಿಲ್ದಾಣವಾಗಿದೆ. ಇಲ್ಲಿಂದ ಟ್ಯಾಕ್ಸಿ ಅಥವಾ ಬಸ್ ಮೂಲಕ ಸುಲಭವಾಗಿ ಹೋಗಬಹುದು.
• ರಸ್ತೆ: ವಿಶಾಖಪಟ್ಟಣಂ ನಗರದಿಂದ ಸಿಂಹಾಚಲಂಗೆ ಹಗಲು ಪೂರ್ತಿ ನಿರಂತರವಾಗಿ ನಗರ ಬಸ್ಸುಗಳು ಲಭ್ಯವಿವೆ.

ಕೆರೆ ತೊಂಡನೂರು: ನೆಗೆಟಿವ್ ಎನರ್ಜಿ ದೂರ ಮಾಡುವ ಯೋಗ ನರಸಿಂಹ ಮತ್ತು ಸಾವಿರ ತಲೆಯ ಸರ್ಪವಾಗಿ ರಾಮಾನುಜರು ದರ್ಶನ ನೀಡಿದ ಪುಣ್ಯಭೂಮಿ!

ಶ್ರೀ ವರಾಹ ಲಕ್ಷ್ಮಿ ನರಸಿಂಹ ಸ್ವಾಮಿ ದೇವಸ್ಥಾನದ ಸಮಗ್ರ ಮಾಹಿತಿ

ಲೇಖನ- ಶ್ರೀನಿವಾಸ ಮಠ