ಮೇಷ ರಾಶಿಯವರಲ್ಲಿರುವ ಆ ಒಂದು ವಿಶೇಷ ಗುಣ ಯಾವುದು? ತಿಳಿಯಿರಿ ನಿಮ್ಮ ರಾಶಿಯ ಸಂಪೂರ್ಣ ಸ್ವಭಾವ

ಮೇಷ ರಾಶಿಯವರು ಸಹಜ ನಾಯಕರು. ಆದರೆ ನಾಯಕತ್ವದ ಜೊತೆಗೆ ಆತುರ ಮತ್ತು ಹಠ ಕೂಡ ಬರುತ್ತದೆ. ಈ ಗುಣಗಳು ಯಾವಾಗ ಶಕ್ತಿಯಾಗುತ್ತವೆ, ಯಾವಾಗ ಸಮಸ್ಯೆಯಾಗುತ್ತವೆ ಎಂಬುದನ್ನು ಅರಿತರೆ ಜೀವನದ ಅನೇಕ ಗೊಂದಲಗಳಿಗೆ ಉತ್ತರ ಸಿಗುತ್ತದೆ. ಮೇಷ ರಾಶಿಯವರ ಬಗ್ಗೆ ಸವಿಸ್ತಾರ ಲೇಖನ ಇಲ್ಲಿದೆ. ಮೇಷ ರಾಶಿಯು ಅಶ್ವಿನಿ (4 ಪಾದ), ಭರಣಿ (4 ಪಾದ) ಮತ್ತು ಕೃತ್ತಿಕಾ (1ನೇ ಪಾದ) ನಕ್ಷತ್ರಗಳನ್ನು ಒಳಗೊಂಡಿದೆ. ಇದು ಅಗ್ನಿ ತತ್ತ್ವದ ಚರ ರಾಶಿಯಾಗಿದ್ದು, ಇದರ ಅಧಿಪತಿ ಕುಜ (ಮಂಗಳ). 

1. ಗ್ರಹಗತಿ ಮತ್ತು ನಕ್ಷತ್ರ ಅಧಿಪತಿಗಳು

• ರಾಶಿ ಅಧಿಪತಿ: ಕುಜ.
• ನಕ್ಷತ್ರ ಅಧಿಪತಿಗಳು: ಅಶ್ವಿನಿ (ಕೇತು), ಭರಣಿ (ಶುಕ್ರ), ಕೃತ್ತಿಕಾ (ರವಿ).
• ಬಾಧಕಾಧಿಪತಿ: ಶನಿ ಗ್ರಹ.

2. ಸಾಮಾನ್ಯ ಸ್ವಭಾವ ಮತ್ತು ವ್ಯಕ್ತಿತ್ವ

• ಛಲದಂಕಮಲ್ಲರು: ಒಮ್ಮೆ ಪಟ್ಟು ಹಿಡಿದ ಕೆಲಸವನ್ನು ಯಾವುದೇ ಕಾರಣಕ್ಕೂ ಅರ್ಧಕ್ಕೆ ಬಿಡುವುದಿಲ್ಲ. ಕೆಲಸ ಮಾಡಿಸಿಕೊಳ್ಳುವುದರಲ್ಲಿ ಇವರು ನಿಸ್ಸೀಮರು.
• ಮಾತಿನ ಧಾಟಿ: ತಾವು ಹೇಳುವುದನ್ನೇ ಪದೇಪದೇ ಹೇಳುತ್ತಾರೆ, ಆದರೆ ಎದುರಿನವರು ಹೇಳುವುದನ್ನು ಕೇಳಿಸಿಕೊಳ್ಳುವ ವ್ಯವಧಾನ ಇವರಲ್ಲಿ ಕಡಿಮೆ.
• ಛಲ ಮತ್ತು ಶತ್ರುತ್ವ: ಇವರೊಂದಿಗೆ ಸ್ನೇಹ ಮಾಡುವುದು ಸುಲಭ, ಆದರೆ ಶತ್ರುತ್ವ ಕಟ್ಟಿಕೊಂಡರೆ ಅಪಾಯ. ಶತ್ರುವನ್ನು ಹಣಿಯಲು ತಮ್ಮೆಲ್ಲ ಕೆಲಸಗಳನ್ನು ಬದಿಗಿಟ್ಟು ಹೋರಾಡುತ್ತಾರೆ.
• ನಕ್ಷತ್ರವಾರು ವ್ಯತ್ಯಾಸ:
  • ಅಶ್ವಿನಿ: ಶತ್ರುವನ್ನು ದೇವರಿಗೆ ಬಿಡುತ್ತಾರೆ.
  • ಭರಣಿ: ಪ್ರತಿಷ್ಠೆಗಾಗಿ ಹಣವನ್ನು ನೀರಿನಂತೆ ಖರ್ಚು ಮಾಡುತ್ತಾರೆ.
  • ಕೃತ್ತಿಕಾ: ತಮ್ಮ ಪ್ರಭಾವ ಬಳಸಿ ಕಿರಿಕಿರಿ ಉಂಟುಮಾಡುತ್ತಾರೆ.

3. ಆರ್ಥಿಕ ಸ್ಥಿತಿಗತಿ ಮತ್ತು ಹೂಡಿಕೆ

• ಹಣಕಾಸಿನ ಚತುರತೆ: ಹಣ ಎಲ್ಲಿ ಮತ್ತು ಹೇಗೆ ಹುಟ್ಟುತ್ತದೆ ಎಂಬ ಬಗ್ಗೆ ಇವರಿಗೆ ಅಪಾರ ಜ್ಞಾನವಿದೆ.
• ಹೂಡಿಕೆ: ರಿಸ್ಕ್ ತೆಗೆದುಕೊಳ್ಳಲು ಹಿಂಜರಿಯುವುದಿಲ್ಲ. ಬೆಲೆಬಾಳುವ ಲೋಹಗಳು ಮತ್ತು ಷೇರು ಮಾರುಕಟ್ಟೆಯಲ್ಲಿ ಇವರಿಗೆ ಉತ್ತಮ ಲಾಭ ದೊರೆಯುತ್ತದೆ.
• ಸಾಲದ ವಿಚಾರ: ಸಾಲ ಪಡೆಯುವಾಗ ಒಂದು ರೀತಿ, ಮರಳಿಸುವಾಗ ಜಗಳದ ಧಾಟಿ – ಇದು ಇವರ ಮೇಲಿರುವ ಸಾಮಾನ್ಯ ಆಕ್ಷೇಪ.
• ಸಂಪರ್ಕ: ಆರ್ಥಿಕವಾಗಿ ಬಲಿಷ್ಠರಾಗಿರುವವರ ಸ್ನೇಹವನ್ನು ಇವರು ಹೆಚ್ಚು ಬಯಸುತ್ತಾರೆ.

ಪಂಡಿತ್ ವಿಠ್ಠಲ್ ಭಟ್ ಅವರಿಂದ 2026ರ ವರ್ಷ ಭವಿಷ್ಯ: ಶ್ರೀಗುರುಭ್ಯೋ.ಕಾಮ್ ವಿಶೇಷ ಸಂದರ್ಶನ

4. ಕುಟುಂಬ ಮತ್ತು ಸಾಮಾಜಿಕ ಜೀವನ

• ಸಹೋದರರು: ಇವರಿಗಿಂತ ಇವರ ಅಣ್ಣ-ತಮ್ಮ ಅಥವಾ ಅಕ್ಕ-ತಂಗಿಯರು ಹೆಚ್ಚು ಬುದ್ಧಿವಂತರಾಗಿರುತ್ತಾರೆ.
• ಕುಟುಂಬ ನಿರ್ವಹಣೆ: ಕುಟುಂಬದ ವ್ಯವಹಾರವನ್ನು ಮುಂದುವರಿಸಿಕೊಂಡು ಹೋಗುವಲ್ಲಿ ಇವರು ಸದಾ ಮೊದಲಿಗರು.
• ಅನುಭವಿಸುವ ಯೋಗ: ಸ್ವಂತ ಕಷ್ಟದಿಂದ ಕಟ್ಟಿದ ಮನೆ-ಕಾರಿಗಿಂತ, ಸ್ನೇಹಿತರು ಅಥವಾ ಸಂಬಂಧಿಗಳು ಪ್ರೀತಿಯಿಂದ ನೀಡುವ ಸೌಕರ್ಯಗಳನ್ನು ಅನುಭವಿಸುವ ಯೋಗ ಇವರಿಗೆ ಹೆಚ್ಚಿರುತ್ತದೆ.

5. ವೃತ್ತಿ ಮತ್ತು ಅಧಿಕಾರ

• ಸಂಪರ್ಕ ಜಾಲ: ಸರ್ಕಾರದ ಮಟ್ಟದಲ್ಲಿ ಪವರ್‌ಫುಲ್ ವ್ಯಕ್ತಿಗಳನ್ನು ಗುರುತಿಸುವುದರಲ್ಲಿ ಮತ್ತು ಸಂಪರ್ಕ ಸಾಧಿಸುವುದರಲ್ಲಿ ಇವರು ಚತುರರು.
• ಸಲಹೆಗಾರರು: ಕನ್ಸಲ್ಟಂಟ್ ಆಗಿ ಕಾರ್ಯನಿರ್ವಹಿಸುವಾಗ ಇವರು ‘ಔಟ್ ಆಫ್ ದ ಬಾಕ್ಸ್’ (ವಿಭಿನ್ನವಾಗಿ) ಯೋಚಿಸುತ್ತಾರೆ.
• ದೂರದೃಷ್ಟಿ: ಕಷ್ಟದಲ್ಲಿರುವ ಅಧಿಕಾರಸ್ಥರಿಗೆ ನೆರವಾಗಿ, ಜೀವನದುದ್ದಕ್ಕೂ ಅವರಿಂದ ಸಹಾಯ ಪಡೆಯುವ ವ್ಯವಸ್ಥೆ ಮಾಡಿಕೊಳ್ಳುತ್ತಾರೆ.

6. ವೈವಾಹಿಕ ಜೀವನ ಮತ್ತು ಆರೋಗ್ಯ

• ಸಂಗಾತಿ: ಆರ್ಥಿಕ ಬೆಂಬಲ ನೀಡುವ ಸಂಗಾತಿಯನ್ನು ನಿರೀಕ್ಷಿಸುತ್ತಾರೆ. ಸಾಮಾನ್ಯವಾಗಿ ಇವರಿಗೆ ಲೆಕ್ಕಾಚಾರದ ಮತ್ತು ನೇರ ನುಡಿಯ ಸಂಗಾತಿಯೇ ಸಿಗುತ್ತಾರೆ.
• ಆರೋಗ್ಯ ಸಮಸ್ಯೆಗಳು: ಬಿ.ಪಿ., ಮೈಗ್ರೇನ್, ಜ್ವರ, ತಲೆನೋವು ಮತ್ತು ನರಕ್ಕೆ ಸಂಬಂಧಿಸಿದ ತೊಂದರೆಗಳು ಕಾಡುತ್ತವೆ. ತೂಕ ಏರಿಕೆ ಮತ್ತು ಕೊಲೆಸ್ಟ್ರಾಲ್ ಸಮಸ್ಯೆ ಬಗ್ಗೆ ಎಚ್ಚರವಿರಲಿ.
• ಗಂಡಾಂತರ: ಅಪಘಾತಗಳು ಅಥವಾ ಚೂಪಾದ ವಸ್ತುಗಳಿಂದ ಹಲ್ಲೆಯಾಗುವ ಸಂಭವ ಇವರಿಗೆ ಹೆಚ್ಚಿರುತ್ತದೆ.

ಶನಿ ದೋಷವೇ? ಆರ್ಥಿಕ ಸಂಕಷ್ಟವೇ? ನಿಮ್ಮ ರಾಶಿಗೆ ಅನುಗುಣವಾಗಿ ಈ ದೇವಸ್ಥಾನಗಳಿಗೆ ಹೋದರೆ ಶುಭ!

7. ಎಚ್ಚರಿಕೆ ಮತ್ತು ಜೀವನದ ಹಾದಿ

• ಕಾನೂನು ಸಂಘರ್ಷ: ಶಿಸ್ತು ಮತ್ತು ಕಾನೂನು ಪಾಲಿಸುವವರ ಜೊತೆ ಜಗಳ ಮಾಡಿಕೊಂಡು ಕೋರ್ಟ್-ಕಚೇರಿ ಅಲೆಯುವ ಸಾಧ್ಯತೆ ಇರುತ್ತದೆ.
• ಹುಮ್ಮಸ್ಸು: ಸಮಸ್ಯೆಗಳನ್ನು ಮೊದಲೇ ಗುರುತಿಸಿದರೂ, ತಮ್ಮ ಹುಂಬತನದಿಂದ ಕೆಲವು ಬಾರಿ ತೊಂದರೆಗೆ ಸಿಲುಕುತ್ತಾರೆ.
• ಯಶಸ್ಸಿನ ಗ್ರಾಫ್: ವಯಸ್ಸು ಹೆಚ್ಚಾದಂತೆ ಇವರಿಗೆ ಯಶಸ್ಸು ಹೆಚ್ಚಾಗುತ್ತದೆ. ಯೌವನದಲ್ಲಿ ಇತರರ ಸರಿಯಾದ ಸಲಹೆಗಳನ್ನು ಪಾಲಿಸಿದರೆ ಜೀವನದ ಗ್ರಾಫ್ ಅತ್ಯುತ್ತಮವಾಗಿರುತ್ತದೆ.

8. ಆಧ್ಯಾತ್ಮಿಕ ಪರಿಹಾರ ಮತ್ತು ದೇವಾಲಯ ಭೇಟಿ

ಮೇಷ ರಾಶಿಯ ಅಧಿಪತಿ ಕುಜ (ಮಂಗಳ) ಮತ್ತು ಬಾಧಕಾಧಿಪತಿ ಶನಿಯಾಗಿರುವುದರಿಂದ ಈ ಕೆಳಗಿನ ದೈವ ಆರಾಧನೆ ಇವರಿಗೆ ಶ್ರೇಯಸ್ಕರ:

• ಸುಬ್ರಹ್ಮಣ್ಯ ಸ್ವಾಮಿ ಆರಾಧನೆ: ಕುಜ ದೋಷದ ಪ್ರಭಾವ ತಗ್ಗಿಸಲು ಮತ್ತು ಯಶಸ್ಸಿಗಾಗಿ ಸುಬ್ರಹ್ಮಣ್ಯ ಅಥವಾ ಕಾರ್ತಿಕೇಯನ ದರ್ಶನ ಮಾಡುವುದು ಅತ್ಯಗತ್ಯ. ಕನಿಷ್ಠ ವರ್ಷಕ್ಕೊಮ್ಮೆ ಕುಕ್ಕೆ ಸುಬ್ರಹ್ಮಣ್ಯ ಅಥವಾ ಘಾಟಿ ಸುಬ್ರಹ್ಮಣ್ಯದಂತಹ ಕ್ಷೇತ್ರಗಳಿಗೆ ಭೇಟಿ ನೀಡುವುದು ಉತ್ತಮ.
• ನರಸಿಂಹ ಸ್ವಾಮಿ: ಹಠಾತ್ ಸಂಕಷ್ಟಗಳಿಂದ ಪಾರಾಗಲು ಉಗ್ರ ನರಸಿಂಹ ಅಥವಾ ಲಕ್ಷ್ಮೀ ನರಸಿಂಹ ಸ್ವಾಮಿಯ ಪ್ರಾರ್ಥನೆ ಫಲಕಾರಿ.
• ಶನಿ ದೋಷಕ್ಕೆ ಪರಿಹಾರ: ಶನಿಯು ಬಾಧಕಾಧಿಪತಿಯಾಗಿರುವುದರಿಂದ ಪ್ರತಿ ಶನಿವಾರ ಈಶ್ವರನ ಅಥವಾ ಆಂಜನೇಯನ ದೇವಸ್ಥಾನಕ್ಕೆ ಭೇಟಿ ನೀಡುವುದು ಸಂಕಷ್ಟಗಳನ್ನು ಕಡಿಮೆ ಮಾಡುತ್ತದೆ.

9. ಶುಭ ವರ್ಣಗಳು (Lucky Colors)

ಬಣ್ಣಗಳು ವ್ಯಕ್ತಿಯ ಮಾನಸಿಕ ಸ್ಥಿತಿ ಮತ್ತು ಶಕ್ತಿಯ ಮೇಲೆ ಪ್ರಭಾವ ಬೀರುತ್ತವೆ. ಮೇಷ ರಾಶಿಯವರಿಗೆ:

• ಕೆಂಪು (Red): ಇದು ಈ ರಾಶಿಯವರಿಗೆ ಅತ್ಯಂತ ಶುಭದಾಯಕ ಬಣ್ಣ. ಯಾವುದೇ ಪ್ರಮುಖ ಕೆಲಸಗಳಿಗೆ ಹೋಗುವಾಗ ಅಥವಾ ಶುಭ ಕಾರ್ಯಗಳಲ್ಲಿ ಕೆಂಪು ಬಣ್ಣದ ಬಟ್ಟೆ ಧರಿಸುವುದು ಆತ್ಮವಿಶ್ವಾಸವನ್ನು ಹೆಚ್ಚಿಸುತ್ತದೆ.
• ಕಿತ್ತಳೆ ಮತ್ತು ಹಳದಿ: ಇವುಗಳು ಇವರ ವ್ಯಕ್ತಿತ್ವಕ್ಕೆ ಪೂರಕವಾದ ಬಣ್ಣಗಳಾಗಿವೆ.
• ಗಮನಿಸಿ: ಇವರು ಸಾಧ್ಯವಾದಷ್ಟು ಕಪ್ಪು ಮತ್ತು ಗಾಢ ನೀಲಿ ಬಣ್ಣದ ಬಟ್ಟೆಗಳನ್ನು ಪ್ರಮುಖ ಕಾರ್ಯಗಳ ಸಮಯದಲ್ಲಿ ಧರಿಸುವುದನ್ನು ತಪ್ಪಿಸುವುದು ಉತ್ತಮ (ಏಕೆಂದರೆ ಶನಿ ಇವರಿಗೆ ಬಾಧಕಾಧಿಪತಿ).

ಷೇರು ಮಾರುಕಟ್ಟೆ ಹೂಡಿಕೆ: ಯಾವ ರಾಶಿಯವರ ಹೂಡಿಕೆ ಶೈಲಿ ಹೇಗಿರುತ್ತದೆ? ಇಲ್ಲಿದೆ ಪೂರ್ಣ ವಿವರ

10. ಅದೃಷ್ಟ ರತ್ನ (Lucky Gemstone)

ಮೇಷ ರಾಶಿಯವರ ಗ್ರಹಗತಿಗಳ ಪ್ರಕಾರ ಈ ಕೆಳಗಿನ ರತ್ನವು ಅತ್ಯಂತ ಸೂಕ್ತ:

• ಹವಳ (Red Coral): ಮೇಷ ರಾಶಿಯ ಅಧಿಪತಿ ಕುಜನಾಗಿರುವುದರಿಂದ, ಗುಣಮಟ್ಟದ ‘ಹವಳ’ವನ್ನು ಧರಿಸುವುದು ಇವರಿಗೆ ದೈಹಿಕ ಶಕ್ತಿ, ಧೈರ್ಯ ಮತ್ತು ಆರ್ಥಿಕ ಪ್ರಗತಿಯನ್ನು ನೀಡುತ್ತದೆ.
• ಧರಿಸುವ ಕ್ರಮ: ಹವಳವನ್ನು ಚಿನ್ನ ಅಥವಾ ತಾಮ್ರದ ಉಂಗುರದಲ್ಲಿ ಜಡಿಸಿ, ಮಂಗಳವಾರದಂದು ಪೂಜಿಸಿ ಉಂಗುರದ ಬೆರಳಿಗೆ (Ring Finger) ಧರಿಸಬೇಕು.

ಸೂಚನೆ: ರತ್ನಗಳನ್ನು ಧರಿಸುವ ಮೊದಲು ನಿಮ್ಮ ಜಾತಕವನ್ನು ಪರಿಣತ ಜ್ಯೋತಿಷಿಗಳಲ್ಲಿ ತೋರಿಸಿ, ಗ್ರಹಗಳ ಬಲಾಬಲವನ್ನು ಖಚಿತಪಡಿಸಿಕೊಳ್ಳುವುದು ಯಾವಾಗಲೂ ಉತ್ತಮ.

11. ಇತರ ರಾಶಿಗಳೊಂದಿಗೆ ಹೊಂದಾಣಿಕೆ (Compatibility)

ಮೇಷ ರಾಶಿಯವರು ಅಗ್ನಿ ತತ್ತ್ವದವರಾಗಿರುವುದರಿಂದ, ಇವರ ಶಕ್ತಿ ಮತ್ತು ವೇಗಕ್ಕೆ ಸರಿಸಾಟಿಯಾದ ಅಥವಾ ಅವರನ್ನು ಅರ್ಥಮಾಡಿಕೊಳ್ಳಬಲ್ಲ ರಾಶಿಗಳೊಂದಿಗೆ ಉತ್ತಮ ಹೊಂದಾಣಿಕೆ ಹೊಂದುತ್ತಾರೆ.

 ಉತ್ತಮ ಹೊಂದಾಣಿಕೆ (Best Match)

• ಸಿಂಹ (Leo) ಮತ್ತು ಧನು (Sagittarius):
  ಇವೆರಡೂ ಅಗ್ನಿ ತತ್ತ್ವದ ರಾಶಿಗಳಾಗಿರುವುದರಿಂದ, ಮೇಷ ರಾಶಿಯವರ ಉತ್ಸಾಹ ಮತ್ತು ಸಾಹಸ ಪ್ರವೃತ್ತಿಗೆ ಸರಿಯಾಗಿ ಹೊಂದಿಕೆಯಾಗುತ್ತವೆ.
  ಇವರ ನಡುವಿನ ಸ್ನೇಹ ಅಥವಾ ವ್ಯವಹಾರ ದೀರ್ಘಕಾಲ ಬಾಳಿಕೆ ನೀಡುತ್ತದೆ.
• ಮಿಥುನ (Gemini) ಮತ್ತು ಕುಂಭ (Aquarius):
  ಗಾಳಿ (ವಾಯು) ತತ್ತ್ವ ಬೆಂಕಿಯನ್ನು ಪ್ರಜ್ವಲಿಸುವಂತೆ, ಈ ರಾಶಿಯವರು ಮೇಷ ರಾಶಿಯವರಿಗೆ ಹೊಸ ಆಲೋಚನೆಗಳನ್ನು ನೀಡುತ್ತಾರೆ ಮತ್ತು ಬೌದ್ಧಿಕವಾಗಿ ಬೆಂಬಲಿಸುತ್ತಾರೆ.

ಮಧ್ಯಮ ಹೊಂದಾಣಿಕೆ (Moderate Match)

• ತುಲಾ (Libra):
  ಇದು ಮೇಷ ರಾಶಿಗೆ ಸಪ್ತಮ (ಎದುರಾಳಿ) ರಾಶಿ.
  ಇವರ ನಡುವೆ ಆಕರ್ಷಣೆ ಹೆಚ್ಚಿರುತ್ತದೆ, ಆದರೆ ಅಭಿಪ್ರಾಯ ಭೇದಗಳೂ ಅಷ್ಟೇ ಇರುತ್ತವೆ.
  ಪರಸ್ಪರ ಹೊಂದಾಣಿಕೆ ಮಾಡಿಕೊಂಡರೆ ಉತ್ತಮ ಜೋಡಿಯಾಗಬಹುದು.

ರಾವಣ ಸಂಹಿತೆ: ಜೀವನದ ಅದೃಷ್ಟ ಬದಲಿಸಬಲ್ಲ 100 ಜ್ಯೋತಿಷ್ಯ ರಹಸ್ಯಗಳು ಮತ್ತು ಪರಿಹಾರಗಳು!

ಸವಾಲಿನ ಹೊಂದಾಣಿಕೆ (Challenging Match)

• ಕರ್ಕಾಟಕ (Cancer) ಮತ್ತು ಮಕರ (Capricorn):
  • ಕರ್ಕಾಟಕದ ಮೃದು ಸ್ವಭಾವ
  • ಮಕರ ರಾಶಿಯ ಅತಿಯಾದ ಶಿಸ್ತು
    ಮೇಷ ರಾಶಿಯವರ ಹುಂಬತನ ಅಥವಾ ಆತುರಕ್ಕೆ ಅಡ್ಡಿಯಾಗಬಹುದು.
• ಇವರೊಂದಿಗೆ ವ್ಯವಹರಿಸುವಾಗ ಮೇಷ ರಾಶಿಯವರು ಹೆಚ್ಚಿನ ತಾಳ್ಮೆ ವಹಿಸಬೇಕಾಗುತ್ತದೆ.

ಲೇಖನ- ಶ್ರೀನಿವಾಸ ಮಠ