ಕೇಮದ್ರುಮ ಯೋಗ: ರಾಜವಂಶದಲ್ಲಿ ಹುಟ್ಟಿದರೂ ದಾರಿದ್ರ್ಯ ತರುವ ದೋಷವೇ? ವೈದಿಕ ಜ್ಯೋತಿಷ್ಯದ ಶಾಸ್ತ್ರೋಕ್ತ ವಿವರಣೆ

ಜನ್ಮ ಜಾತಕದಲ್ಲಿ ಇರುವಂಥ ಯೋಗಗಳು ಇಡೀ ವ್ಯಕ್ತಿಯ ಜೀವನದಲ್ಲಿ ನೆರಳಿನಂತೆ ಹಿಂಬಾಲಿಸುತ್ತವೆ. ಒಳ್ಳೆಯ ಯೋಗ ಇದ್ದರೆ ಒಳ್ಳೆಯ ಫಲ ಅಥವಾ ಕೆಟ್ಟ- ಅಶುಭ ಯೋಗಗಳಿದ್ದರೆ ಅದಕ್ಕೆ ತಕ್ಕಂತೆ ಫಲ. ಈ ಲೇಖನದಲ್ಲಿ ‘ಕೇಮದ್ರುಮ ಯೋಗ’ದ ಬಗ್ಗೆ ಸರಳವಾಗಿ ವಿವರಿಸುವ ಪ್ರಯತ್ನವನ್ನು ಮಾಡಲಾಗುತ್ತಿದೆ. ಜನ್ಮಜಾತಕವನ್ನು ನೋಡಿಕೊಂಡಲ್ಲಿ ತುಂಬ ಸುಲಭವಾಗಿ ಪತ್ತೆ ಹಚ್ಚಬಹುದಾದ ದೋಷಕಾರಿ ಯೋಗ ಇದು. ವೈದಿಕ ಜ್ಯೋತಿಷ್ಯ ಶಾಸ್ತ್ರದ ಅತ್ಯಂತ ಪ್ರಾಚೀನ ಮತ್ತು ಪ್ರಮಾಣಿತ ಗ್ರಂಥಗಳಾದ ಬೃಹತ್ ಪರಾಶರ ಹೋರಾಶಾಸ್ತ್ರ, ಫಲದೀಪಿಕಾ ಮತ್ತು ಸಾರಾವಳಿ ಆಧಾರದ ಮೇಲೆ ಕೇಮದ್ರುಮ ಯೋಗದ ಕುರಿತಾದ ವಿವರವಾದ ಲೇಖನ ಇಲ್ಲಿದೆ.

ವೈದಿಕ ಜ್ಯೋತಿಷ್ಯದಲ್ಲಿ ಚಂದ್ರನನ್ನು ‘ಮನಸೋ ಜಾತಃ’ (ಮನಸ್ಸಿನ ಅಧಿಪತಿ) ಎಂದು ಕರೆಯಲಾಗುತ್ತದೆ. ಅಂಥ ಚಂದ್ರನ ಸ್ಥಿತಿಯೇ ಜಾತಕದ ಶುಭಾಶುಭ ಫಲಗಳನ್ನು ನಿರ್ಧರಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ.

ಶಾಸ್ತ್ರೋಕ್ತ ವ್ಯಾಖ್ಯಾನ 

ಪರಾಶರ ಮಹರ್ಷಿಗಳ ಪ್ರಕಾರ, ಜನ್ಮ ಜಾತಕದಲ್ಲಿ ಚಂದ್ರನಿರುವ ಮನೆಯಿಂದ ಹಿಂದಿನ (12ನೇ) ಮತ್ತು ಮುಂದಿನ (2ನೇ) ಮನೆಯಲ್ಲಿ ಸೂರ್ಯನನ್ನು ಹೊರತುಪಡಿಸಿ ಬೇರೆ ಯಾವುದೇ ಗ್ರಹಗಳು ಇಲ್ಲದಿದ್ದರೆ ಅದು ಕೇಮದ್ರುಮ ಯೋಗವಾಗುತ್ತದೆ. ಉದಾಹರಣೆಗೆ, ಒಬ್ಬ ವ್ಯಕ್ತಿಯದು ಮಕರ ರಾಶಿ ಎಂದುಕೊಳ್ಳಿ. ಜನನ ಸಮಯದಲ್ಲಿ ಧನುಸ್ಸು ಹಾಗೂ ಕುಂಭ ರಾಶಿಯಲ್ಲಿ ಯಾವುದೇ ಗ್ರಹಗಳು ಇಲ್ಲ ಎಂದಾದಲ್ಲಿ ಈ ಕೇಮದ್ರುಮ ಯೋಗ ಸೃಷ್ಟಿ ಆಗುತ್ತದೆ

ನ ಲಗ್ನಾಚ್ಚಂದ್ರಕೇಂದ್ರೇ ವಾ ಗ್ರಹೇ ಸತಿ ವಿಚಕ್ಷಣೈಃ |

ಕೇಮದ್ರುಮೋ ವಿಜಾನೀಯಾದ್ ಯೋಗೋಽಯಂ ಭಾಷಿತೋ ಮುನಿಭಿಃ ||

ನಿಯಮಗಳು:

• ಚಂದ್ರನ 2ನೇ ಮತ್ತು 12ನೇ ಮನೆಯಲ್ಲಿ ಮಂಗಳ, ಬುಧ, ಗುರು, ಶುಕ್ರ ಅಥವಾ ಶನಿ ಇರಬಾರದು.
• ಸೂರ್ಯ, ರಾಹು ಮತ್ತು ಕೇತುಗಳನ್ನು ಈ ಯೋಗದ ಲೆಕ್ಕಾಚಾರಕ್ಕೆ ಪರಿಗಣಿಸಲಾಗುವುದಿಲ್ಲ.
• ಕೇವಲ ಚಂದ್ರನ ಅಕ್ಕಪಕ್ಕದ ಮನೆಗಳು ಮಾತ್ರವಲ್ಲದೆ, ಲಗ್ನ ಕೇಂದ್ರಗಳಲ್ಲಿಯೂ (1, 4, 7, 10) ಗ್ರಹಗಳಿಲ್ಲದಿದ್ದರೆ ಈ ಯೋಗದ ತೀವ್ರತೆ ಹೆಚ್ಚಿರುತ್ತದೆ ಎಂದು ಶಾಸ್ತ್ರ ಹೇಳುತ್ತದೆ.

ವೈದಿಕ ಗ್ರಂಥಗಳ ಪ್ರಕಾರ ಫಲಶ್ರುತಿ

ಪ್ರಾಚೀನ ಗ್ರಂಥಗಳು ಕೇಮದ್ರುಮ ಯೋಗವನ್ನು ಅತ್ಯಂತ ಕಷ್ಟಕರವಾದ ಯೋಗವೆಂದು ವರ್ಣಿಸಿವೆ. ‘ಫಲದೀಪಿಕಾ’ ಗ್ರಂಥದ ಪ್ರಕಾರ ಇದರ ಫಲಗಳು ಹೀಗಿವೆ:

• ರಾಜಕುಲಜಾತೋಽಪಿ ದರಿದ್ರಃ: ರಾಜಮನೆತನದಲ್ಲಿ ಹುಟ್ಟಿದವನಾದರೂ ಈ ಯೋಗವಿದ್ದರೆ ಅವನು ದಾರಿದ್ರ್ಯವನ್ನು ಅನುಭವಿಸುತ್ತಾನೆ.
• ಮಾನಸಿಕ ಕ್ಷೋಭೆ: ಚಂದ್ರನಿಗೆ ಅಕ್ಕಪಕ್ಕದ ಗ್ರಹಗಳ ಬೆಂಬಲವಿಲ್ಲದ ಕಾರಣ, ವ್ಯಕ್ತಿಯು ಆಶ್ರಯವಿಲ್ಲದವನಂತೆ ಭಾಸವಾಗುತ್ತಾನೆ. ಇದು ಬುದ್ಧಿಮಾಂದ್ಯತೆ ಅಥವಾ ವಿಪರೀತ ಮಾನಸಿಕ ಅಸ್ಥಿರತೆಗೆ ಕಾರಣವಾಗಬಹುದು.
• ಶೀಲಹೀನತೆ ಮತ್ತು ಮಲಿನತೆ: ವ್ಯಕ್ತಿಯು ತನ್ನ ಕುಲದ ಗೌರವಕ್ಕೆ ಧಕ್ಕೆ ತರುವ ಕೆಲಸಗಳಲ್ಲಿ ತೊಡಗಬಹುದು ಮತ್ತು ಅಶುಚಿಯಾಗಿರಬಹುದು ಎಂದು ಶ್ಲೋಕಗಳು ತಿಳಿಸುತ್ತವೆ.
• ಜೀವನ ಪರ್ಯಂತ ಸಂಘರ್ಷ: ಜೀವನೋಪಾಯಕ್ಕಾಗಿ ಕಠಿಣ ಪರಿಶ್ರಮ ಪಡಬೇಕಾಗುತ್ತದೆ ಮತ್ತು ಶತ್ರುಗಳಿಂದ ಪೀಡಿತನಾಗುತ್ತಾನೆ.

ಕೇಮದ್ರುಮ ಭಂಗ ಯೋಗ (ವೈದಿಕ ವಿನಾಯಿತಿಗಳು)

ಕೇಮದ್ರುಮ ಯೋಗ ಭಂಗ ಆಗುವ ಗ್ರಹ ಸ್ಥಿತಿಯೂ ಇದೆ. ಅದರ ಪ್ರಕಾರವಾಗಿ ಕೆಲವು ‘ಭಂಗ’ (ರದ್ದಾಗುವ) ನಿಯಮಗಳನ್ನು ಹೇಳಲಾಗಿದೆ:

1. ಕೇಂದ್ರ ಗ್ರಹ ಸ್ಥಿತಿ: ಚಂದ್ರನಿಂದ ಅಥವಾ ಲಗ್ನದಿಂದ 1, 4, 7, 10ನೇ ಮನೆಗಳಲ್ಲಿ ಗುರು ಗ್ರಹವಿದ್ದರೆ ಕೇಮದ್ರುಮ ಯೋಗ ಭಂಗವಾಗುತ್ತದೆ.
2. ಗುರು ದೃಷ್ಟಿ: ಚಂದ್ರನ ಮೇಲೆ ಗುರುವಿನ ದೃಷ್ಟಿ ಇದ್ದರೆ ಅಥವಾ ಚಂದ್ರನು ಗುರುವಿನೊಂದಿಗೆ ಯುತಿಯಾಗಿದ್ದರೆ ಈ ದೋಷವು ಸಂಪೂರ್ಣವಾಗಿ ನಿವಾರಣೆಯಾಗಿ ‘ಗಜಕೇಸರಿ’ಯಂತಹ ಶುಭ ಫಲವನ್ನು ನೀಡುತ್ತದೆ.
3. ಸಪೂರ್ಣ ಚಂದ್ರ: ಹುಣ್ಣಿಮೆಯ ಹತ್ತಿರದ ಬಲಶಾಲಿ ಚಂದ್ರನಿದ್ದಾಗ ದೋಷದ ಪ್ರಭಾವ ತೀರಾ ಕಡಿಮೆ ಇರುತ್ತದೆ.
4. ನವಾಂಶ ಕುಂಡಲಿ: ಜನ್ಮ ಕುಂಡಲಿಯಲ್ಲಿ ದೋಷವಿದ್ದರೂ ನವಾಂಶ ಕುಂಡಲಿಯಲ್ಲಿ ಚಂದ್ರನು ಶುಭ ಗ್ರಹಗಳ ರಾಶಿಯಲ್ಲಿದ್ದರೆ ಅಥವಾ ದೃಷ್ಟಿ ಪಡೆದಿದ್ದರೆ ದೋಷ ಪರಿಹಾರವಾಗುತ್ತದೆ.

ದುರ್ಗಾ ದೀಪ ನಮಸ್ಕಾರ ಪೂಜೆ ಹಿನ್ನೆಲೆ, ಮಹತ್ವ, ಜ್ಯೋತಿಷ್ಯದ ವಿಶೇಷ ಪ್ರಯೋಜನಗಳು

ಶಾಸ್ತ್ರೋಕ್ತ ಪರಿಹಾರ ಮಾರ್ಗಗಳು

ವೇದ ಮತ್ತು ಪುರಾಣಗಳ ಆಧಾರದ ಮೇಲೆ ಚಂದ್ರನಿಂದ ಉಂಟಾಗುವ ಈ ದೋಷಕ್ಕೆ ಈ ಕೆಳಗಿನ ಪರಿಹಾರಗಳನ್ನು ಸೂಚಿಸಲಾಗಿದೆ:

• ಶ್ರೀ ಸೂಕ್ತ ಪಠಣ: ದಾರಿದ್ರ್ಯ ನಿವಾರಣೆಗಾಗಿ ಮಹಾಲಕ್ಷ್ಮಿಯ ಆರಾಧನೆ ಮತ್ತು ಶ್ರೀ ಸೂಕ್ತದ ಪಾರಾಯಣ.
• ಶಿವ ಪಂಚಾಕ್ಷರಿ ಮಂತ್ರ: ಚಂದ್ರನು ಶಿವನ ಶಿರದ ಮೇಲಿರುವುದರಿಂದ ‘ಓಂ ನಮಃ ಶಿವಾಯ’ ಜಪವು ಮನಸ್ಸಿಗೆ ಶಾಂತಿ ಮತ್ತು ಸ್ಥಿರತೆ ನೀಡುತ್ತದೆ.
• ಅರ್ಘ್ಯ ಪ್ರದಾನ: ಸೋಮವಾರ ಅಥವಾ ಹುಣ್ಣಿಮೆಯ ರಾತ್ರಿ ಹಾಲನ್ನು ಬೆರೆಸಿದ ನೀರಿನಿಂದ ಚಂದ್ರನಿಗೆ ಅರ್ಘ್ಯ ನೀಡುವುದು.
• ರುದ್ರಾಭಿಷೇಕ: ಜನ್ಮ ನಕ್ಷತ್ರದ ದಿನದಂದು ಶಿವನಿಗೆ ರುದ್ರಾಭಿಷೇಕ ಮಾಡಿಸುವುದು ಗ್ರಂಥೋಕ್ತ ಪರಿಹಾರವಾಗಿದೆ.

ಲೇಖನ- ಶ್ರೀನಿವಾಸ ಮಠ