ರಾತ್ರಿ ವೇಳೆ ಗೃಹಪ್ರವೇಶ ಮಾಡಬಹುದೇ? ಶಾಸ್ತ್ರ ಏನು ಹೇಳುತ್ತದೆ? ಇಲ್ಲಿವೆ ಪ್ರಮಾಣಗಳು

ಗೃಹಪ್ರವೇಶವನ್ನು ರಾತ್ರಿ ವೇಳೆಯೂ ಮಾಡಬಹುದು ಎಂಬ ವಿಚಾರದ ಬಗ್ಗೆ ಹಲವರಲ್ಲಿ ಗೊಂದಲ ಇದೆ. ಆದರೆ ರಾತ್ರಿ ವೇಳೆ ಗೃಹಪ್ರವೇಶ ಮಾಡುವುದಾದರೆ ವಾರದೋಷ ಕೂಡ ಅನ್ವಯ ಆಗುವುದಿಲ್ಲ ಎಂಬುದು ಇಲ್ಲಿ ಗಮನಿಸಬೇಕಾದ ಸಂಗತಿ. ರಾತ್ರಿ ಕಾಲವು ಗೃಹಪ್ರವೇಶಕ್ಕೆ ಪ್ರಶಸ್ತ ಎಂಬುದನ್ನು ರಾಘವೇಂದ್ರ ಸ್ವಾಮಿ ಮಠದಿಂದ ಹೊರತರುವ ಪಂಚಾಂಗದಲ್ಲಿಯೇ ಮುದ್ರಿಸಲಾಗಿದೆ. ಈ ಬಗ್ಗೆ ವಿವರವಾದ ಲೇಖನ ಇಲ್ಲಿದೆ. 

ರವಿ ಮತ್ತು ಚಂದ್ರನ ಬಲದ ಸಿದ್ಧಾಂತ

ಜ್ಯೋತಿಷ್ಯ ಶಾಸ್ತ್ರದ ಪ್ರಕಾರ, ಕಾಲಕ್ಕೆ ಅಧಿಪತಿಗಳಾದ ಸೂರ್ಯ ಮತ್ತು ಚಂದ್ರರ ಬಲವು ಕಾರ್ಯದ ಯಶಸ್ಸನ್ನು ನಿರ್ಧರಿಸುತ್ತದೆ.

• ಹಗಲಿನ ಮುಹೂರ್ತ: ಹಗಲಿನಲ್ಲಿ ಮಾಡುವಂಥ ಕಾರ್ಯಕ್ರಮ- ಸಮಾರಂಭಗಳ ಮುಹೂರ್ತ ಲಗ್ನಕ್ಕೆ ‘ರವಿ ಬಲ’ ಮುಖ್ಯ. 
• ರಾತ್ರಿ ಮುಹೂರ್ತ: ಸೂರ್ಯಾಸ್ತದ ನಂತರ ಚಂದ್ರನು ಬಲಿಷ್ಠನಾಗುತ್ತಾನೆ (ನಿಶಾಬಲ). ರಾತ್ರಿ ಗೃಹಪ್ರವೇಶಕ್ಕೆ ಚಂದ್ರನು ಶುಭ ಸ್ಥಾನದಲ್ಲಿದ್ದು (ಲಗ್ನದಿಂದ 3, 6, 7, 10, 11ನೇ ಮನೆ), ಲಗ್ನವು ಸ್ಥಿರವಾಗಿದ್ದರೆ ಅದು ವಾರದೋಷವನ್ನು ಸಂಪೂರ್ಣವಾಗಿ ಪರಿಹರಿಸುತ್ತದೆ.

ಪ್ರಮಾಣ ಶ್ಲೋಕ:

“ದಿವಾ ಸೂರ್ಯಬಲಂ ಪ್ರೋಕ್ತಂ ರಾತ್ರೌ ಚಂದ್ರಬಲಂ ತಥಾ | ಲಗ್ನಂ ಸರ್ವತ್ರ ಬಲವತ್ ಸರ್ವದೋಷ ನಿವಾರಕಮ್ ||” 

ಅರ್ಥ: ಹಗಲಿನಲ್ಲಿ ಸೂರ್ಯನ ಬಲವು ಪ್ರಮುಖವಾದರೆ, ರಾತ್ರಿಯಲ್ಲಿ ಚಂದ್ರನ ಬಲವು ಮುಖ್ಯ. ಆದರೆ ಲಗ್ನವು ಸರ್ವಕಾಲದಲ್ಲೂ ಬಲಿಷ್ಠವಾಗಿದ್ದು, ಸಕಲ ದೋಷಗಳನ್ನು ನಿವಾರಿಸುವ ಶಕ್ತಿ ಹೊಂದಿದೆ.

ರಾತ್ರಿ ಮುಹೂರ್ತಕ್ಕೆ ವಾರದೋಷ ಏಕೆ ಇಲ್ಲ?

ವಾರವು ಸೂರ್ಯೋದಯಕ್ಕೆ ಸಂಬಂಧಿಸಿದ ಕಾಲಗಣನೆ. ಸೂರ್ಯಾಸ್ತದ ನಂತರ ಕಾಲದ ಸ್ವರೂಪ ಬದಲಾಗಿ ‘ಲಗ್ನ’ ಮತ್ತು ‘ಚಂದ್ರ’ನ ಆಧಿಪತ್ಯ ಆರಂಭವಾಗುತ್ತದೆ. ಆದ್ದರಿಂದಲೇ ರಾತ್ರಿ ಲಗ್ನವು ಬಲಿಷ್ಠವಾಗಿದ್ದಾಗ ಅಂದು ಶನಿವಾರ ಅಥವಾ ಮಂಗಳವಾರವಾಗಿದ್ದರೂ ಆ ವಾರದ ದೋಷವು ಗೃಹಪ್ರವೇಶಕ್ಕೆ ತಟ್ಟುವುದಿಲ್ಲ.

ತಾರಾ ಬಲ ಎಂದರೇನು? ನಕ್ಷತ್ರಗಳ ಲೆಕ್ಕಾಚಾರ, ದೋಷ ಪರಿಹಾರದ ಸಮಗ್ರ ಮಾಹಿತಿ

ಶಾಸ್ತ್ರ ಪ್ರಮಾಣ:

“ರಾತ್ರೌ ವಾರಗುಣೋ ನಾಸ್ತಿ ಲಗ್ನಂ ಚಂದ್ರಬಲಂ ತಥಾ | ಲಗ್ನಂ ದೋಷ ವಿನಾಶಕಂ ಸರ್ವಸಿದ್ಧಿ ಪ್ರದಾಯಕಮ್ ||” (ಅರ್ಥ: ರಾತ್ರಿಯ ವೇಳೆಯಲ್ಲಿ ವಾರದೋಷಗಳು ಬಾಧಿಸುವುದಿಲ್ಲ. ಅಲ್ಲಿ ಲಗ್ನ ಮತ್ತು ಚಂದ್ರಬಲಗಳೇ ಪ್ರಧಾನ. ಬಲಿಷ್ಠವಾದ ಲಗ್ನವು ಸಾವಿರಾರು ದೋಷಗಳನ್ನು ನೀಗಿಸಿ ಸಕಲ ಸಿದ್ಧಿಯನ್ನು ನೀಡುತ್ತದೆ.)

ಮುಹೂರ್ತ ಮಾರ್ತಾಂಡ ಮತ್ತು ಮುಹೂರ್ತ ಚಿಂತಾಮಣಿ ಗ್ರಂಥಗಳ ಪ್ರಕಾರ:

“ನಕ್ಷತ್ರಂ ಸರ್ವದಾ ಬಲಿಷ್ಠಂ, ಲಗ್ನಂ ದೋಷ ವಿನಾಶಕಂ”

ಇದರರ್ಥ: ಮುಹೂರ್ತ ನಿರ್ಣಯದಲ್ಲಿ ವಾರಕ್ಕಿಂತ ನಕ್ಷತ್ರಕ್ಕೆ ಹೆಚ್ಚಿನ ಬಲವಿದೆ. ರಾತ್ರಿ ಸಮಯದಲ್ಲಿ ಶುಭ ನಕ್ಷತ್ರ (ರೋಹಿಣಿ, ಮೃಗಶಿರಾ ಇತ್ಯಾದಿ) ಇದ್ದರೆ ಅದು ವಾರದ ದೋಷವನ್ನು ಮೆಟ್ಟಿ ನಿಲ್ಲುತ್ತದೆ.

ಹೀಗಾಗಿ, ಶನಿವಾರ ಅಥವಾ ಮಂಗಳವಾರದಂತಹ ದಿನಗಳಲ್ಲಿ ಹಗಲು ಹೊತ್ತು ದೋಷವಿದ್ದರೂ, ರಾತ್ರಿಯ ಶುಭ ಲಗ್ನದಲ್ಲಿ ಗೃಹಪ್ರವೇಶ ಮಾಡುವುದು ಶಾಸ್ತ್ರಸಮ್ಮತವಾಗಿದೆ.

“ಸ್ಥಿರೇ ಸ್ಥಿರತ್ವಂ” – ಅಂದರೆ ಸ್ಥಿರ ವಾರದಲ್ಲಿ ಮಾಡುವ ಕಾರ್ಯವು ದೀರ್ಘಕಾಲಿಕವಾಗಿ ಉಳಿಯುತ್ತದೆ.

“ಶನೈಶ್ಚರ ವಾರೇ ಸ್ಥಿರಲಗ್ನೇ ಗೃಹಪ್ರವೇಶಂ ಸುಖಾವಹಮ್ |” (ಅರ್ಥ: ಶನಿವಾರದ ಸ್ಥಿರ ಗುಣವು ಮನೆಯಲ್ಲಿ ವಾಸಿಸುವವರಿಗೆ ಸ್ಥಿರವಾದ ಸುಖ ಮತ್ತು ಆಸ್ತಿಯನ್ನು ಉಳಿಸಿಕೊಡುತ್ತದೆ.)

• ಸ್ಥಿರವಾಸರ (ಶನಿವಾರ): ಶನಿವಾರವನ್ನು ಸ್ಥಿರವಾಸರ ಎನ್ನಲಾಗುತ್ತದೆ. ರಾತ್ರಿ ಮುಹೂರ್ತದಲ್ಲಿ ಶನಿವಾರ ಮನೆ ಪ್ರವೇಶಿಸುವುದರಿಂದ ಆ ಆಸ್ತಿಯು ನಿಮ್ಮಲ್ಲಿ ಸ್ಥಿರವಾಗಿ ಉಳಿಯುತ್ತದೆ (Stability of Property).
• ಮಂಗಳವಾರ: ಮಂಗಳನು ಭೂಮಿಪುತ್ರನಾದ್ದರಿಂದ, ಭೂಮಿಗೆ ಸಂಬಂಧಿಸಿದ ಕಾರ್ಯಕ್ಕೆ ಆತನ ಅನುಗ್ರಹವೂ ರಾತ್ರಿ ಮುಹೂರ್ತದಲ್ಲಿ ಪೂರಕವಾಗಿರುತ್ತದೆ.

ಪೂರ್ಣ ಮುಹೂರ್ತ ಮತ್ತು ಲಗ್ನ ಬಲ

ಪೂರ್ಣ ಮುಹೂರ್ತ ಎಂದರೆ ಕೇವಲ ದಿನವಲ್ಲ, ಅದು ಕಾಲದ ಸಂಪೂರ್ಣತೆ. ರಾತ್ರಿ ವೇಳೆ ಬರುವ ವೃಷಭ, ಸಿಂಹ, ವೃಶ್ಚಿಕ ಅಥವಾ ಕುಂಭದಂತಹ ಸ್ಥಿರ ಲಗ್ನಗಳು ಪೂರ್ಣ ಮುಹೂರ್ತದ ಫಲವನ್ನು ನೀಡುತ್ತವೆ. ಈ ಸಮಯದಲ್ಲಿ ಗೃಹಪ್ರವೇಶ ಮಾಡುವುದರಿಂದ ಮನೆಯಲ್ಲಿ ಐಶ್ವರ್ಯ ಮತ್ತು ನೆಮ್ಮದಿ ಅಖಂಡವಾಗಿ ಉಳಿಯುತ್ತದೆ.

ಸಾಡೇತೀನ್ ಮುಹೂರ್ತಗಳ ವಿಶೇಷ (ಮೂರೂವರೆ ದಿನಗಳು ಪೂರ್ಣಮುಹೂರ್ತ)

ವರ್ಷದ ಮೂರೂವರೆ ದಿನಗಳನ್ನು ‘ಸಾಡೇತೀನ್ ಮುಹೂರ್ತ’ (ಸ್ವಯಂಸಿದ್ಧ ಮುಹೂರ್ತಗಳು) ಎಂದು ಕರೆಯಲಾಗುತ್ತದೆ. ಇವುಗಳ ಮಹಿಮೆಯೇ ಬೇರೆ:

1. ಯುಗಾದಿ (ಚೈತ್ರ ಪಾಡ್ಯಮಿ) – ಪೂರ್ಣ ಮುಹೂರ್ತ
2. ಅಕ್ಷಯ ತೃತೀಯ (ವೈಶಾಖ ತೃತೀಯ) – ಪೂರ್ಣ ಮುಹೂರ್ತ
3. ವಿಜಯದಶಮಿ (ದಸರಾ) – ಪೂರ್ಣ ಮುಹೂರ್ತ
4. ಬಲಿಪಾಡ್ಯಮಿ (ದೀಪಾವಳಿ) – ಅರ್ಧ ಮುಹೂರ್ತ

ಈ ವಿಶೇಷ ದಿನಗಳಲ್ಲಿ ಗೃಹಪ್ರವೇಶ ಸೇರಿದಂತೆ ಶುಭ ಕಾರ್ಯಗಳನ್ನು ಮಾಡುವುದು ಕೋಟಿ ಮುಹೂರ್ತಗಳಿಗೆ ಸಮಾನವಾದ ಫಲವನ್ನು ನೀಡುತ್ತದೆ.

ವಾಸ್ತು ಪ್ರಕಾರ ಯಾವ ದಿಕ್ಕಿಗೆ ತಲೆ ಹಾಕಿ ಮಲಗಬೇಕು? ಮಲಗುವ ದಿಕ್ಕು ನಿಮ್ಮ ಅದೃಷ್ಟವನ್ನೇ ಬದಲಿಸಬಲ್ಲದು!

ಕೊನೆಮಾತು

ಜ್ಯೋತಿಷ್ಯ ಎಂಬುದು ಪ್ರಮಾಣಬದ್ಧವಾದ ಜ್ಞಾನ. ಪಂಚಾಂಗ ಅಂದರೆ, ತಿಥಿ, ವಾರ, ನಕ್ಷತ್ರ, ಯೋಗ ಹಾಗೂ ಕರಣ ಸೇರುತ್ತದೆ. ರಾತ್ರಿ ಮುಹೂರ್ತ ಇಡುವುದಾದರೆ ಅದಕ್ಕೆ ವಾರದ ದೋಷ ಅನ್ವಯವೇ ಆಗುವುದಿಲ್ಲ. ಉಳಿದ ಅಂಗಗಳನ್ನು ಗಮನಿಸಿಕೊಳ್ಳಬೇಕು. ಯಜಮಾನನಿಗೆ ತಾರಾಬಲ, ಲಗ್ನಕ್ಕೆ ದ್ವಾದಶ ಶುದ್ಧಿ, ಮುಹೂರ್ತವಾಗಿ ಇಡುವಂಥ ಗೃಹಪ್ರವೇಶ ಲಗ್ನವು ಯಜಮಾನನ ಜನ್ಮಲಗ್ನಕ್ಕೋ ಜನ್ಮರಾಶಿಗೋ ಅಷ್ಟಮ (ಎಂಟನೇ) ಲಗ್ನ ಆಗಬಾರದು. ಉತ್ತರಾಯಣದಲ್ಲಿ (ಚೈತ್ರ, ವೈಶಾಖ, ಜ್ಯೇಷ್ಠ, ಆಷಾಢ), ಅದನ್ನು ಬಿಟ್ಟರೆ, ನವರಾತ್ರಿಯ ಸಮಯ ಹಾಗೂ ಕಾರ್ತೀಕ ಮಾಸದಲ್ಲಿ ಗೃಹಪ್ರವೇಶವನ್ನು ಮಾಡುವುದಕ್ಕೆ ಪ್ರಶಸ್ತ ಕಾಲ. ವಾಸ್ತು ಪುರುಷನಿಗೆ ಉತ್ತರಾಯಣ ಕಾಲ ಬಹಳ ಶ್ರೇಷ್ಠ.  ಇನ್ನು ಅಧಿಕ ಮಾಸ, ಕ್ಷಯ ಮಾಸ, ಶುಕ್ರಾಸ್ತ ಹಾಗೂ ಗುರು ಗ್ರಹದ ಅಸ್ತ ಇರುವಾಗ ಗೃಹಪ್ರವೇಶವನ್ನು ಮಾಡುವುದಿಲ್ಲ.

ಲೇಖನ- ಶ್ರೀನಿವಾಸ ಮಠ