ಜ್ಯೋತಿಷ್ಯ ರೀತಿಯಾಗಿ ನೋಡಿದರೆ, ನಾಲ್ಕು ರಾಶಿಯವರಿಗೆ ಉದ್ಯೋಗ ವಿಚಾರದಲ್ಲಿ ಪದೇಪದೇ ಗೊಂದಲ ಕಾಡುತ್ತಾ ಇರುತ್ತದೆ. ವ್ಯಾಪಾರ- ವ್ಯವಹಾರ ಮಾಡಿಕೊಂಡು ಇದ್ದುಬಿಡೋಣ ಅಂತಲೂ ಇನ್ನೂ ಕೆಲವು ಬಾರಿ ಪದೇ ಪದೇ ಉದ್ಯೋಗ ಬದಲಾವಣೆ ಆಲೋಚನೆ ಬರುವುದು ಇಂಥವು ಜಾಸ್ತಿ. ಉದ್ಯೋಗಕ್ಕೆ ಅಂತ ಹೋಗಲು ಶುರು ಮಾಡಿದ ಮೇಲೆ ತುಂಬ ವೇಗವಾಗಿ ಕೆಲಸ ಕಲಿತು, ಅದಕ್ಕೆ ಸಂಬಂಧಪಟ್ಟ ಅಥವಾ ಅದರ ಸುತ್ತಮುತ್ತಲ ವಿಷಯಗಳಲ್ಲಿ ಕೋರ್ಸ್ ಗಳನ್ನು ಮಾಡಿಕೊಂಡು ತುಂಬ ವೇಗವಾಗಿ ಏಳ್ಗೆ ಕಾಣಲು ಬಯಸುವ ಈ ನಾಲ್ಕು ರಾಶಿಯವರಿಗೆ ಅವರು ಅಂದುಕೊಂಡ ಮಟ್ಟಕ್ಕೆ ಛಕಾಛಕ್ ಮೇಲೇರಲು ಸಾಧ್ಯವಾಗದೇ ಹೋಗುವುದು ಬೇಸರಕ್ಕೆ ಕಾರಣ ಆಗುತ್ತದೆ. ಯಾವುದು ಆ ನಾಲ್ಕು ರಾಶಿಗಳು ಅಂದರೆ, ಮಿಥುನ, ಕನ್ಯಾ, ಧನುಸ್ಸು ಹಾಗೂ ಮೀನ.
ಮಿಥುನ ರಾಶಿ: ವೈಯಕ್ತಿಕ ಜೀವನದ ಕಡೆಗೂ ಸ್ವಲ್ಪ ಲಕ್ಷ್ಯ ಕೊಡಬೇಕು
ಕ್ರಿಯೇಟಿವಿಟಿ ಇಲ್ಲದ ಕ್ಷೇತ್ರ ಅಂದುಬಿಟ್ಟರೆ ಬಹಳ ಬೇಗ ಬೇಸರ ಆಗುವಂಥ ಜನರು ಇವರು. ತಪ್ಪು ಮಾಡುವುದಕ್ಕಾದರೂ ಅವಕಾಶ ಇಲ್ಲದ ಜಾಗ ಅಂದರೆ, ಅದು ಬೆಳವಣಿಗೆಗೆ ಲಾಯಕ್ಕಿಲ್ಲದ ಸ್ಥಳ ಅಂತ ಬಹಳ ಬೇಗ ನಿರ್ಧಾರ ಮಾಡಿಬಿಡುತ್ತಾರೆ. ಕೆಲಸ ಸುಲಭ ಇದೆಯಲ್ಲ, ಸುಮ್ಮನೆ ಸಂಬಳ ತೆಗೆದುಕೊಂಡು ಇರಬಹುದಲ್ಲಾ ಅಂತ ಯಾರೇ ಬುದ್ಧಿ ಹೇಳಿದರೂ ಕೇಳುವ ಪೈಕಿ ಇವರಲ್ಲ.
ಒಂದು ಚೌಕಟ್ಟು ಹಾಕಿ, ಇದರಲ್ಲಿ ಇರುವುದನ್ನೇ ಮಾಡಿಕೊಂಡು ಹೋಗಿ ಅಂತ ಹೇಳಿದರೂ ಗದರಿದರೂ ಕೊನೆಗೆ ಕೆಲಸದಿಂದ ತೆಗೆದು ಹಾಕಿಬಿಡುವುದಾಗಿ ಬೆದರಿಸಿದರೂ ಯಾವುದಕ್ಕೂ ಜಗ್ಗುವ ಆಸಾಮಿಗಳು ಇವರಲ್ಲ. ತಮ್ಮ ಜವಾಬ್ದಾರಿ ಅಲ್ಲದಿದ್ದರೂ ಅದೇನು ಎಂಬ ಕುತೂಹಲ ಬಂದುಬಿಟ್ಟರೆ ಅದು ಮಾಡಿ ಮುಗಿಸುವ ತನಕ ಜೀವಕ್ಕೆ ಸಮಾಧಾನ ಇಲ್ಲದಂತೆ ವಿಲವಿಲ ಒದ್ದಾಡಿ ಬಿಡುತ್ತಾರೆ.
ಒಂದು ಕೆಲಸ ಹೇಗೆ ಸುಲಭವಾಗಿ ಮಾಡುವುದು ಎಂಬುದಕ್ಕಿಂತ ಅದೇ ಕೆಲಸವನ್ನು ಹತ್ತು ಬೇರೆ ಬೇರೆ ರೀತಿಯಲ್ಲಿ ಮಾಡುವುದು ಹೇಗೆ ಎಂಬ ಬಗ್ಗೆ ಆಲೋಚಿಸುವ ಈ ಮಿಥುನ ರಾಶಿಯವರು ತಮ್ಮ ಮೇಲಧಿಕಾರಿಗಳಿಗೆ ಸಿಕ್ಕಾಪಟ್ಟೆ ತಲೆನೋವು ತರುವ ಆಸಾಮಿಗಳು. ಇವರು ಮಾಡುವುದು ಪೂರ್ತಿಯಾಗಿ ತಪ್ಪು ಎನ್ನಲು ಸಾಧ್ಯವಿಲ್ಲ. ಹಾಗಂತ ಇವರನ್ನು ಪ್ರೋತ್ಸಾಹ ಕೊಟ್ಟು, ಮುಂದುವರಿಯಲು ಅವಕಾಶ ಕೊಟ್ಟರೆ ಮತ್ತೇನು ಮಾಡಿಬಿಡುತ್ತಾರೋ ಎಂಬ ಆತಂಕ. “ನನಗೆ ಆ ಕೆಲಸದಲ್ಲಿ ಕೈ ಕಟ್ಟಿಹಾಕಿದಂತೆ ಆಗಿತ್ತು, ಉಸಿರು ಕಟ್ಟಿದಂತೆ ಆಗಿತ್ತು,” ಹೀಗೆಲ್ಲ ಕಾರಣ ಕೊಟ್ಟು ಕೆಲಸ ಬಿಡುವುದರಲ್ಲಿ ಮಿಥುನ ರಾಶಿಯವರು ಮೊದಲಿಗರು.
ಸದಾ ಹೊಸತರ ಕಡೆಗೆ ಹಂಬಲಿಸುವ ಇವರಿಗೆ ಬಿಜಿನೆಸ್ ಜವಾಬ್ದಾರಿ ಕೊಟ್ಟು ಕೂಡಿಸಿಬಿಟ್ಟರೆ, ಸಮಸ್ಯೆಗಳನ್ನು ಇವರಾಗಿಯೇ ಹುಡುಕಿಕೊಂಡು ಹೋಗಿ, ಕರೆದುಕೊಂಡು ಬರುತ್ತಾರೆ. ಇಬ್ಬರು ಮಿಥುನ ರಾಶಿಯವರಿಗೆ ಒಂದೇ ಹೊಸ ಪ್ರಾಜೆಕ್ಟ್ ಕೊಟ್ಟು, ಇದರ ಯಶಸ್ಸು ನಿಮ್ಮದೇ ಜವಾಬ್ದಾರಿ ಎಂದುಬಿಟ್ಟರೆ, ಅವರು ಮಾಡುವ ಕೆಲಸ, ಸಿದ್ಧಪಡಿಸುವ ರಿಪೋರ್ಟ್ ಗಳು, ಆಲೋಚನಾ ಕ್ರಮಕ್ಕೆ ಬೇರೆ ಪ್ರಾಜೆಕ್ಟ್ ಗಳಲ್ಲಿ ಕೆಲಸ ಮಾಡುವವರು ಇವರನ್ನು ನಿತ್ಯ ಬೈದುಕೊಂಡು ಓಡಾಡುವಂತೆ ಆಗುತ್ತದೆ.
ಮಿಥುನ ರಾಶಿಯವರು ವೈಯಕ್ತಿಕ ಜೀವನದ ಕಡೆಗೂ ಸ್ವಲ್ಪ ಲಕ್ಷ್ಯ ಕೊಡಬೇಕು. ವರ್ಕ್- ಲೈಫ್ ಸಮತೋಲನದ ಕಡೆಗೆ ನೋಡಬೇಕು. ಇಲ್ಲದಿದ್ದರೆ ಬಹಳ ಕಷ್ಟ. ತಮ್ಮ ಖರ್ಚನ್ನು ಜಾಸ್ತಿ ಮಾಡಿಕೊಂಡು, ಅದನ್ನು ಹೊಂದಾಣಿಕೆ ಮಾಡುವುದಕ್ಕೆ ಇವರು ಪಡುವ ಶ್ರಮ, ಪಡಿಪಾಟಲು ಇದೆಯಲ್ಲಾ, ಅದು ಇನ್ನೂ ಭಯಂಕರ ಗಾಬರಿ ಹುಟ್ಟಿಸುವ ರೀತಿ ಇರುತ್ತದೆ.
ಎಲ್ಲ ಜಾಣ ತುಸು ಕೋಣ: ಈ ಐದು ರಾಶಿಯವರ ಭಾಗ್ಯಕ್ಕೆ ಮುಳ್ಳಾಗುವ ಅತಿಯಾದ ಸಿಟ್ಟು
ಕನ್ಯಾ ರಾಶಿ: ಮಾನಸಿಕ ಆರೋಗ್ಯದ ಕಡೆಗೆ ಗಮನ ಕೊಡಬೇಕು
ಪರಿಪೂರ್ಣತೆ ಎನ್ನುವುದು ಇವರ ರಕ್ತದ ಕಣಕಣದಲ್ಲೂ ಇರುತ್ತದೆ. ಇವರು ಕೆಲಸಕ್ಕೆ ಸೇರಿದ ಮೊದಲ ದಿನವೇ ಆ ಸಂಸ್ಥೆಯ ಪ್ರತಿಯೊಂದು ನಿಯಮಾವಳಿಗಳನ್ನು, ಕೆಲಸದ ಶೈಲಿಯನ್ನು ಅರೆದು ಕುಡಿದುಬಿಡುತ್ತಾರೆ. ಕೆಲಸದಲ್ಲಿ ಸಣ್ಣ ತಪ್ಪಾದರೂ ಇವರಿಗೆ ಸಮಾಧಾನ ಇರುವುದಿಲ್ಲ. ತಮಗೆ ವಹಿಸಿದ ಕೆಲಸವನ್ನು ಅಚ್ಚುಕಟ್ಟಾಗಿ ಮಾಡುವುದಷ್ಟೇ ಅಲ್ಲದೆ, ಅದಕ್ಕೆ ಸಂಬಂಧಿಸಿದ ಪ್ರತಿಯೊಂದು ಸಣ್ಣ ವಿಷಯವನ್ನೂ ಕೂಲಂಕಷವಾಗಿ ತಿಳಿದುಕೊಳ್ಳಲು ಇವರು ಹಂಬಲಿಸುತ್ತಾರೆ.
ಇದೇ ಕಾರಣಕ್ಕೆ ಇವರು ಕೆಲಸಕ್ಕೆ ಸೇರಿದ ಕೂಡಲೇ ಅದರ ಆಳ-ಅಗಲ ಅರಿಯಲು ಹತ್ತಾರು ಕೋರ್ಸ್ಗಳನ್ನು ಮಾಡಿಕೊಳ್ಳುತ್ತಾರೆ, ಸರ್ಟಿಫಿಕೇಟ್ಗಳನ್ನು ಪೇರಿಸಿಟ್ಟುಕೊಳ್ಳುತ್ತಾರೆ. ಆದರೆ ಇವರು ಎದುರಿಸುವ ಅತಿ ದೊಡ್ಡ ಸಮಸ್ಯೆ ಎಂದರೆ “ತಮಗೆ ಗೊತ್ತಿರುವುದು ಮಾತ್ರ ಸರಿ” ಅಥವಾ “ತಾವು ಹಾಕಿದ ಹಾದಿಯೇ ಶ್ರೇಷ್ಠ” ಎನ್ನುವ ಅಚಲವಾದ ನಂಬಿಕೆ. ಮೇಲಧಿಕಾರಿಗಳು ಇವರ ಕೆಲಸದಲ್ಲಿ ಸಣ್ಣ ಬದಲಾವಣೆ ಸೂಚಿಸಿದರೂ ಅಥವಾ ಅದರಲ್ಲಿ ದೋಷ ಹುಡುಕಿದರೂ ಇವರು ಅದನ್ನು ಸಹಿಸಿಕೊಳ್ಳುವುದಿಲ್ಲ.
“ನಾನು ಇಷ್ಟೆಲ್ಲಾ ಅಧ್ಯಯನ ಮಾಡಿ, ಪರ್ಫೆಕ್ಟ್ ಆಗಿ ಮಾಡಿದ್ದರೂ ಇವರು ಅದರಲ್ಲಿ ತಪ್ಪು ಹುಡುಕುತ್ತಿದ್ದಾರಲ್ಲಾ” ಎನ್ನುವ ಬೇಸರವೇ ಇವರು ಉದ್ಯೋಗ ಬದಲಾವಣೆಯ ಯೋಚನೆ ಮಾಡಲು ಪ್ರಮುಖ ಕಾರಣವಾಗುತ್ತದೆ. ಕನ್ಯಾ ರಾಶಿಯವರಿಗೆ ಉದ್ಯೋಗದಲ್ಲಿ ಸಿಗುವ ಸಂಬಳಕ್ಕಿಂತಲೂ ಅಲ್ಲಿ ಸಿಗುವ “ಸಿಸ್ಟಮ್” ಮುಖ್ಯ. ಕೆಲಸ ಸುಲಭವಾಗಿ ಮುಗಿಯುತ್ತದೋ ಇಲ್ಲವೋ ಎಂಬುವುದಕ್ಕಿಂತ, ಅದು ತರ್ಕಬದ್ಧವಾಗಿದೆಯೇ ಎಂದು ಇವರು ಯೋಚಿಸುತ್ತಾರೆ. ಇವರ ಈ ವಿಶ್ಲೇಷಣಾತ್ಮಕ ಗುಣವು ಕೆಲವೊಮ್ಮೆ ಇವರನ್ನು ಕ್ರೂರವಾಗಿ ಕಾಣುವಂತೆ ಮಾಡುತ್ತದೆ.
ಸಹೋದ್ಯೋಗಿಗಳು ಅರೆಬರೆ ಕೆಲಸ ಮಾಡಿದರೆ ಅಥವಾ ಸೋಮಾರಿತನ ತೋರಿಸಿದರೆ ಇವರು ತಕ್ಷಣವೇ ಗದರುತ್ತಾರೆ ಅಥವಾ ಮೇಲಧಿಕಾರಿಗಳಿಗೆ ದೂರು ನೀಡುತ್ತಾರೆ. ಇದರಿಂದಾಗಿ ಆಫೀಸಿನಲ್ಲಿ ಇವರಿಗೆ ವೈರಿಗಳ ಸಂಖ್ಯೆ ಹೆಚ್ಚಾಗುತ್ತದೆ. “ನನ್ನ ಜ್ಞಾನಕ್ಕೆ ಮತ್ತು ಶಿಸ್ತಿಗೆ ಇಲ್ಲಿ ಬೆಲೆ ಇಲ್ಲ, ಇಲ್ಲಿರುವವರೆಲ್ಲ ಕೆಲಸಕ್ಕೆ ಬಾರದವರು” ಎಂದು ನಿರ್ಧರಿಸಿ ಕೆಲಸ ಬಿಡಲು ಸನ್ನದ್ಧರಾಗುತ್ತಾರೆ. ವ್ಯಾಪಾರ ಮಾಡೋಣ ಎಂದು ಹೊರಟರೆ, ಅಲ್ಲಿನ ಲೆಕ್ಕಾಚಾರದಲ್ಲಿ ಸಿಲುಕಿ ಲಾಭಕ್ಕಿಂತ ಹೆಚ್ಚಾಗಿ ವ್ಯವಹಾರದ ಪ್ರಕ್ರಿಯೆಯಲ್ಲೇ ತಪ್ಪುಗಳನ್ನು ಹುಡುಕುತ್ತಾ ಕಾಲ ಕಳೆಯುತ್ತಾರೆ. ಇವರ ಅತಿಯಾದ ವಿಶ್ಲೇಷಣಾ ಗುಣ ಮತ್ತು ಪ್ರತಿಯೊಂದನ್ನೂ ಟೀಕಿಸುವ ಸ್ವಭಾವವೇ ಇವರ ವೃತ್ತಿಜೀವನದ ವೇಗಕ್ಕೆ ಬ್ರೇಕ್ ಹಾಕುತ್ತದೆ.
ಇನ್ನೊಂದು ಮುಖ್ಯ ವಿಷಯವೆಂದರೆ, ಕನ್ಯಾ ರಾಶಿಯವರು ತಮ್ಮ ಮಾನಸಿಕ ಆರೋಗ್ಯದ ಕಡೆಗೆ ಗಮನ ಕೊಡಬೇಕು. ಕೆಲಸದ ಬಗ್ಗೆ ಸದಾ ಚಿಂತಿಸುತ್ತಾ, ಮನೆಯಲ್ಲೂ ಆಫೀಸಿನ ಲೆಕ್ಕಾಚಾರಗಳನ್ನೇ ಹಾಕುತ್ತಾ ಇವರು ನಿದ್ರೆ ಕೆಡಿಸಿಕೊಳ್ಳುತ್ತಾರೆ. ಇವರು ತಮ್ಮ ಬುದ್ಧಿವಂತಿಕೆಯನ್ನು ಮೆಚ್ಚುವ ಮತ್ತು ಸ್ವತಂತ್ರವಾಗಿ ಕೆಲಸ ಮಾಡಲು ಬಿಡುವ ವಾತಾವರಣವನ್ನು ಸದಾ ಹುಡುಕುತ್ತಿರುತ್ತಾರೆ.
ಆದರೆ, ಪ್ರಾಯೋಗಿಕ ಜಗತ್ತಿನಲ್ಲಿ ಇವರು ಅಂದುಕೊಂಡಂತಹ ಪರ್ಫೆಕ್ಟ್ ವಾತಾವರಣ ಸಿಗುವುದು ಕಷ್ಟ. ಇದರಿಂದಾಗಿ “ನಾನು ಉದ್ಯೋಗಕ್ಕೆ ಲಾಯಕ್ಕಿಲ್ಲವೇನೋ ಅಥವಾ ನಾನು ತಪ್ಪು ಜಾಗದಲ್ಲಿದ್ದೇನೆಯೇ?” ಎಂಬ ಗೊಂದಲ ಇವರನ್ನು ಪದೇಪದೇ ಕಾಡುತ್ತದೆ. ಇಬ್ಬರು ಕನ್ಯಾ ರಾಶಿಯವರು ಒಂದೇ ವಿಭಾಗದಲ್ಲಿದ್ದರೆ, ಅಲ್ಲಿ ಯಾರು ಹೆಚ್ಚು ಶಿಸ್ತುಬದ್ಧ ಎನ್ನುವ ಶೀತಲ ಸಮರವೇ ನಡೆದು ಹೋಗುತ್ತದೆ. ಇವರು ತಮ್ಮ ವೃತ್ತಿಜೀವನದಲ್ಲಿ ಸ್ಥಿರತೆ ಕಾಣಬೇಕಾದರೆ, ಬದಲಾವಣೆಗಳನ್ನು ಮುಕ್ತ ಮನಸ್ಸಿನಿಂದ ಸ್ವೀಕರಿಸುವುದನ್ನು ಕಲಿಯಬೇಕು.
ಧನುಸ್ಸು ರಾಶಿ: ಒಂದೇ ಕಡೆ ಕೆಲ ವರ್ಷ ನೆಲೆ ನಿಲ್ಲಬೇಕು
ಧನುಸ್ಸು ರಾಶಿಯವರು ಸದಾ ಜ್ಞಾನದ ಹಸಿವು ಇರುವವರು ಮತ್ತು ಮೂಲತಃ ಅನ್ವೇಷಕರು. ಒಂದು ಕೆಲಸವನ್ನು ಕಲಿತ ಮೇಲೆ “ಮುಂದೇನು? ಹೊಸದೇನಿದೆ?” ಎಂಬ ಪ್ರಶ್ನೆ ಇವರನ್ನು ಸದಾ ಕಾಡುತ್ತಿರುತ್ತದೆ. ಕೆಲಸದಲ್ಲಿ ಹೊಸ ಸವಾಲುಗಳಿಲ್ಲದಿದ್ದರೆ ಇವರು ಬಹಳ ಬೇಗ ಬೇಸರ ಅನುಭವಿಸುತ್ತಾರೆ. ಇವರು ಕೆಲಸಕ್ಕೆ ಸೇರಿದ ವೇಗದಲ್ಲೇ ಅದರ ಸುತ್ತಮುತ್ತಲ ವಿಷಯಗಳನ್ನು ಕರಗತ ಮಾಡಿಕೊಳ್ಳುತ್ತಾರೆ. ಇವರ ಲವಲವಿಕೆ ಮತ್ತು ಕಲಿಕಾ ಸಾಮರ್ಥ್ಯ ಕಂಡು ಮ್ಯಾನೇಜ್ಮೆಂಟ್ಗೂ ಆಶ್ಚರ್ಯವಾಗುತ್ತದೆ.
ಆದರೆ, ಇವರಿಗೆ ಉದ್ಯೋಗದಲ್ಲಿ ಪೂರ್ಣ ಸ್ವಾತಂತ್ರ್ಯ ಬೇಕು. ಯಾರಾದರೂ ಇವರ ಮೇಲೆ ಸದಾ ಕಣ್ಣಿಟ್ಟು ‘ಮೈಕ್ರೋ ಮ್ಯಾನೇಜ್ಮೆಂಟ್’ ಮಾಡಿದರೆ ಅಥವಾ ಪ್ರತಿ ಹಂತದಲ್ಲೂ ಅಡೆತಡೆ ಒಡ್ಡಿದರೆ ಇವರಿಗೆ ಉಸಿರು ಕಟ್ಟಿದಂತಾಗುತ್ತದೆ. “ನನ್ನ ಸಾಮರ್ಥ್ಯಕ್ಕೆ ತಕ್ಕ ವೇದಿಕೆ ಇದಲ್ಲ, ನಾನು ಪಂಜರದ ಹಕ್ಕಿಯಂತೆ ಇಲ್ಲಿ ಇರಲು ಸಾಧ್ಯವಿಲ್ಲ” ಎಂದು ನಿರ್ಧರಿಸಿ ಬೇರೆ ಕಡೆಗೆ ಹಾರಲು ಇವರು ಸದಾ ಸನ್ನದ್ಧರಾಗಿರುತ್ತಾರೆ.
ಯಾರ ಕೆಳಗೋ ಕೆಲಸ ಮಾಡುವ ಬದಲು ಸ್ವಂತವಾಗಿ ಏನಾದರೂ ದೊಡ್ಡದನ್ನು ಸಾಧಿಸಬೇಕು, ಬಿಜಿನೆಸ್ ಮಾಡಬೇಕು ಎಂಬ ಆಲೋಚನೆ ಇವರನ್ನು ಪದೇಪದೇ ಕಾಡುತ್ತದೆ. ಧನುಸ್ಸು ರಾಶಿಯವರು ತುಂಬಾ ಮಹತ್ವಾಕಾಂಕ್ಷಿಗಳು. ಇವರು ಕೇವಲ ಉದ್ಯೋಗಕ್ಕಾಗಿ ಕೆಲಸ ಮಾಡುವುದಿಲ್ಲ, ಅದೊಂದು ಸಾಹಸದಂತೆ ಇರಬೇಕು ಎಂದು ಬಯಸುತ್ತಾರೆ. ಆದರೆ ಬಿಜಿನೆಸ್ನಲ್ಲಿ ಆರಂಭದಲ್ಲಿ ಬೇಕಾದ ಕಠಿಣ ಪರಿಶ್ರಮ, ತಾಳ್ಮೆ ಮತ್ತು ಸಣ್ಣಪುಟ್ಟ ಕೆಲಸಗಳನ್ನು ಮಾಡುವಲ್ಲಿ ಇವರು ಸೋಲುತ್ತಾರೆ.
ಇವರು “ತಕ್ಷಣದ ದೊಡ್ಡ ಯಶಸ್ಸು” ಮತ್ತು “ದೊಡ್ಡ ಮಟ್ಟದ ಅಧಿಕಾರ” ಬಯಸುವುದರಿಂದ ವಾಸ್ತವದಲ್ಲಿ ಅದಕ್ಕೆ ಬೇಕಾದ ಶ್ರಮ ಹಾಕುವಾಗ ಗೊಂದಲಕ್ಕೀಡಾಗುತ್ತಾರೆ. “ನಾನು ಇಷ್ಟು ಕಲಿತಿದ್ದೇನೆ, ಆದರೂ ನನಗೆ ಯಾಕೆ ಪ್ರಮೋಷನ್ ಸಿಗುತ್ತಿಲ್ಲ?” ಎಂದು ವ್ಯವಸ್ಥೆಯ ಮೇಲೆ ಕಿಡಿಕಾರುತ್ತಾರೆ. ಇಬ್ಬರು ಧನುಸ್ಸು ರಾಶಿಯವರು ಒಂದು ಟೀಮ್ನಲ್ಲಿದ್ದರೆ, ಅಲ್ಲಿ ಪ್ರಾಯೋಗಿಕ ಕೆಲಸಕ್ಕಿಂತ ಹೆಚ್ಚಾಗಿ ದೊಡ್ಡ ಯೋಜನೆಗಳ ಬಗ್ಗೆ ಮತ್ತು ಹೊಸ ಐಡಿಯಾಗಳ ಬಗ್ಗೆ ಚರ್ಚೆಯೇ ಜೋರಾಗಿರುತ್ತದೆ.
ಇವರು ವೃತ್ತಿಯಲ್ಲಿ ಬಹಳ ವೇಗವಾಗಿ ಮೇಲೇರಲು ಪ್ರಯತ್ನಿಸುತ್ತಾರೆ. ಇದಕ್ಕಾಗಿ ಹಗಲಿರುಳು ಕೆಲಸದ ಬಗ್ಗೆ ಕಲಿಯುತ್ತಾರೆ, ಕೋರ್ಸ್ಗಳನ್ನು ಮುಗಿಸುತ್ತಾರೆ. ಆದರೆ ಸಂಸ್ಥೆಯ ರಾಜಕೀಯ ಅಥವಾ ವೇಗವಾಗಿ ಬದಲಾಗದ ವಾತಾವರಣ ಕಂಡು ಇವರಿಗೆ ವಿರಕ್ತಿ ಬಂದುಬಿಡುತ್ತದೆ. “ಈ ಕೆಲಸ ನನಗೆ ಆತ್ಮತೃಪ್ತಿ ನೀಡುತ್ತಿಲ್ಲ” ಎನ್ನುವ ಒಂದೇ ಕಾರಣಕ್ಕೆ ಇವರು ಎಷ್ಟೇ ದೊಡ್ಡ ಸಂಬಳವಿದ್ದರೂ ಕೆಲಸಕ್ಕೆ ರಾಜೀನಾಮೆ ಕೊಟ್ಟು ಹೊರಬರುತ್ತಾರೆ.
ಧನುಸ್ಸು ರಾಶಿಯವರು ತಮ್ಮ ವೈಯಕ್ತಿಕ ಜೀವನದ ಬಗ್ಗೆಯೂ ಹೆಚ್ಚು ಆತಂಕ ಪಡುತ್ತಾರೆ. ತಮಗೆ ಬೇಕಾದ ವಿಲಾಸಿ ಜೀವನ ನಡೆಸಲು ಅತಿ ಹೆಚ್ಚು ಹಣದ ಅವಶ್ಯಕತೆ ಇರುತ್ತದೆ, ಅದನ್ನು ಗಳಿಸಲು ಇವರು ಉದ್ಯೋಗ ಮತ್ತು ವ್ಯಾಪಾರದ ನಡುವೆ ಸದಾ ತೂಗಾಡುತ್ತಿರುತ್ತಾರೆ. ಇವರು ತಮ್ಮ ವೃತ್ತಿಜೀವನದಲ್ಲಿ ಯಶಸ್ವಿಯಾಗಬೇಕಾದರೆ, ಒಂದೇ ಕಡೆ ಕನಿಷ್ಠ ಐದು ವರ್ಷಗಳ ಕಾಲ ನೆಲೆ ನಿಲ್ಲುವ ದೃಢ ನಿರ್ಧಾರ ಮಾಡಬೇಕು. ಇಲ್ಲದಿದ್ದರೆ, ಇವರ ಜ್ಞಾನವು ಕೇವಲ ಕೋರ್ಸ್ಗಳಿಗಷ್ಟೇ ಸೀಮಿತವಾಗುತ್ತದೆ ಹೊರತು ಅದು ಅನುಭವವಾಗಿ ಪರಿವರ್ತನೆಯಾಗುವುದಿಲ್ಲ.
ಮೀನ ರಾಶಿ: “ನೋ” ಹೇಳುವುದನ್ನು ಕಲಿಯಬೇಕು
ಮೀನ ರಾಶಿಯವರು ಅಪ್ಪಟ ಭಾವನಾತ್ಮಕ ಜೀವಿಗಳು ಮತ್ತು ಅದ್ಭುತ ಕನಸುಗಾರರು. ಇವರಿಗೆ ಕೆಲಸ ಎನ್ನುವುದು ಕೇವಲ ಹಣ ಗಳಿಸುವ ಸಾಧನವಲ್ಲ, ಅದೊಂದು ಭಾವನಾತ್ಮಕ ಬಂಧದಂತೆ. ಕೆಲಸದ ವಾತಾವರಣವು ಇವರಿಗೆ ಮನೆಯಂತೆ ಇರಬೇಕು, ಅಲ್ಲಿನ ಸಹೋದ್ಯೋಗಿಗಳು ಸ್ನೇಹಿತರಂತೆ ಇರಬೇಕು ಎಂದು ಬಯಸುತ್ತಾರೆ. ಕಚೇರಿಯಲ್ಲಿ ಸ್ವಲ್ಪ ರಾಜಕೀಯ ಶುರುವಾದರೂ ಅಥವಾ ಮೇಲಧಿಕಾರಿಗಳು ಕಟುವಾಗಿ ಮಾತನಾಡಿದರೂ ಇವರು ಮಾನಸಿಕವಾಗಿ ಕುಗ್ಗಿ ಹೋಗುತ್ತಾರೆ.
ಇವರು ಕೆಲಸವನ್ನು ತುಂಬ ವೇಗವಾಗಿ ಕಲಿಯುತ್ತಾರೆ, ಅದಕ್ಕೆ ಸಂಬಂಧಿಸಿದ ಕೌಶಲಗಳನ್ನು ಬೆಳೆಸಿಕೊಳ್ಳಲು ರಾತ್ರಿ-ಹಗಲು ಶ್ರಮಿಸುತ್ತಾರೆ. ಆದರೆ ಇವರ ದೊಡ್ಡ ಸಮಸ್ಯೆ ಏನೆಂದರೆ ವಾಸ್ತವ ಪ್ರಪಂಚದ ಸ್ಪರ್ಧೆ ಮತ್ತು ಇವರ ಕಲ್ಪನೆಯ ನಡುವಿನ ಅಂತರ. “ನಾನು ಈ ಕಂಪನಿಯನ್ನು ಎಲ್ಲಿಗೋ ಕೊಂಡೊಯ್ಯುತ್ತೇನೆ, ನಾನು ಬಹಳ ದೊಡ್ಡ ವ್ಯಕ್ತಿಯಾಗುತ್ತೇನೆ” ಎಂದು ದೊಡ್ಡ ಕನಸು ಕಾಣುವ ಇವರಿಗೆ, ಸಹೋದ್ಯೋಗಿಗಳಿಂದ ಅಸಹಕಾರ ಆದಾಗ ತೀವ್ರ ಹತಾಶೆ ಉಂಟಾಗುತ್ತದೆ.
“ಇಲ್ಲಿ ಯಾರಿಗೂ ನನ್ನ ಬೆಲೆ ಗೊತ್ತಿಲ್ಲ, ನನ್ನ ಶ್ರಮವನ್ನು ಗುರುತಿಸುತ್ತಿಲ್ಲ” ಎಂಬ ಭಾವನೆ ಇವರನ್ನು ಪದೇಪದೇ ಕಾಡುತ್ತದೆ. ಇದರಿಂದಾಗಿ ಇವರು ಉದ್ಯೋಗದಲ್ಲಿ ನಿರಂತರತೆಯನ್ನು ಕಳೆದುಕೊಳ್ಳುತ್ತಾರೆ. ಮೀನ ರಾಶಿಯವರಿಗೆ ಉದ್ಯೋಗಕ್ಕಿಂತ ವ್ಯಾಪಾರ-ವ್ಯವಹಾರ ಮಾಡಿಕೊಂಡು ನೆಮ್ಮದಿಯಾಗಿ ಇರಬಹುದು ಎಂಬ ಯೋಚನೆ ಪದೇಪದೇ ಬರುತ್ತದೆ. ಆದರೆ ವ್ಯಾಪಾರದಲ್ಲಿ ಬೇಕಾದ ಗಟ್ಟಿತನ ಮತ್ತು ಜನರನ್ನು ನೂಕಿಕೊಂಡು ಹೋಗುವ ಕಲೆ ಇವರಲ್ಲಿ ಕಡಿಮೆ ಇರುತ್ತದೆ.
ಇವರ ಮೃದು ಸ್ವಭಾವದಿಂದಾಗಿ ಯಾರಾದರೂ ಮೋಸ ಮಾಡಬಹುದೇ ಎಂಬ ಭಯ ಇವರನ್ನು ಕಾಡುತ್ತದೆ. ಕೆಲಸಕ್ಕೆ ಸೇರಿದ ಮೇಲೆ ಇವರು ಅದರಲ್ಲಿ ಮಾಸ್ಟರ್ ಆಗಲು ಪ್ರಯತ್ನಿಸುತ್ತಾರೆ, ಆದರೆ ಯಶಸ್ಸು ಸಿಗಲು ತಡವಾದರೆ ಇವರಿಗೆ “ದೈವಬಲ ಇಲ್ಲವೋ ಅಥವಾ ನನ್ನಲ್ಲೇ ದೋಷವಿದೆಯೋ” ಎಂಬ ಗೊಂದಲ ಶುರುವಾಗುತ್ತದೆ. ಇವರು ವೃತ್ತಿಜೀವನದಲ್ಲಿ ಕ್ರಿಯೇಟಿವ್ ಕೆಲಸಗಳನ್ನು ಮಾಡಲು ಬಯಸುತ್ತಾರೆ, ಆದರೆ ಯಾಂತ್ರಿಕವಾದ ಶಿಸ್ತಿನ ಚೌಕಟ್ಟು ಇವರನ್ನು ಹತಾಶೆಗೊಳಿಸುತ್ತದೆ.
ವರ್ಕ್-ಲೈಫ್ ಬ್ಯಾಲೆನ್ಸ್ ಇಲ್ಲದಿದ್ದರೆ ಇವರ ಮಾನಸಿಕ ಶಾಂತಿ ಸಂಪೂರ್ಣ ಹದಗೆಡುತ್ತದೆ. ತಮ್ಮ ಖರ್ಚುಗಳನ್ನು ನಿಭಾಯಿಸಲು ಮತ್ತು ಜೀವನಮಟ್ಟವನ್ನು ಹೆಚ್ಚಿಸಿಕೊಳ್ಳಲು ಇವರು ಪಡುವ ಪಡಿಪಾಟಲು ಅಷ್ಟಿಷ್ಟಲ್ಲ. ಕೆಲಸದ ಒತ್ತಡಕ್ಕೆ ಸಿಲುಕಿ ಇವರು ದೈಹಿಕವಾಗಿಯೂ ಸುಸ್ತಾಗಿ ಬಿಡುತ್ತಾರೆ. ಇಬ್ಬರು ಮೀನ ರಾಶಿಯವರು ಜೊತೆಗೂಡಿದರೆ, ಅಲ್ಲಿ ಕೆಲಸದ ಚರ್ಚೆಗಿಂತ ಒಬ್ಬರ ಕಷ್ಟಕ್ಕೆ ಒಬ್ಬರು ಮರುಗುವುದೇ ಜಾಸ್ತಿ ಆಗುತ್ತದೆ.
ಇವರು ತಮ್ಮ ವೃತ್ತಿಜೀವನದ ಉತ್ತುಂಗಕ್ಕೆ ಏರಲು ಮೊದಲು “ನೋ” ಹೇಳುವುದನ್ನು ಕಲಿಯಬೇಕು. ಎಲ್ಲರನ್ನೂ ಮೆಚ್ಚಿಸಲು ಹೋದರೆ ಕೆಲಸದ ಮೇಲೆ ಗಮನ ತಪ್ಪುತ್ತದೆ. ಉದ್ಯೋಗದಲ್ಲಿ ಪದೇಪದೇ ಗೊಂದಲ ಅನುಭವಿಸುವ ಇವರು, ಯಾವುದಾದರೂ ಒಂದು ಕ್ಷೇತ್ರವನ್ನು ಆಯ್ದುಕೊಂಡು ಅದರಲ್ಲಿ ಸ್ಥಿರವಾಗಿ ಇರಲು ಕಲಿಯಬೇಕು. ತಮ್ಮ ಸಂವೇದನಾಶೀಲತೆಯನ್ನು ವೃತ್ತಿಯ ಬಲವನ್ನಾಗಿ ಮಾಡಿಕೊಂಡರೆ ಮಾತ್ರ ಇವರು ಅಂದುಕೊಂಡ ಛಕಾಛಕ್ ಯಶಸ್ಸು ಸಿಗಲು ಸಾಧ್ಯ.
ಷೇರು ಮಾರುಕಟ್ಟೆ ಹೂಡಿಕೆ: ಯಾವ ರಾಶಿಯವರ ಹೂಡಿಕೆ ಶೈಲಿ ಹೇಗಿರುತ್ತದೆ? ಇಲ್ಲಿದೆ ಪೂರ್ಣ ವಿವರ
ಈ ನಾಲ್ಕು ರಾಶಿಯವರಿಗೆ ಕಿವಿಮಾತು
ಈ ನಾಲ್ಕು ರಾಶಿಗಳವರು (ಮಿಥುನ, ಕನ್ಯಾ, ಧನುಸ್ಸು, ಮೀನ) ‘ದ್ವಿಸ್ವಭಾವ ರಾಶಿಗಳು’ ಎಂದು ಕರೆಯಲ್ಪಡುತ್ತವೆ. ಅಂದರೆ ಇವರಲ್ಲಿ ಸದಾ ಎರಡು ಮನಸ್ಸುಗಳು ಹೋರಾಡುತ್ತಿರುತ್ತವೆ.
- ಸ್ಥಿರತೆ ಬೆಳೆಸಿಕೊಳ್ಳಿ: ಉದ್ಯೋಗ ಬದಲಾಯಿಸುವುದು ಪರಿಹಾರವಲ್ಲ, ಬದಲಿಗೆ ಆ ಉದ್ಯೋಗದಲ್ಲಿಯೇ ಹೊಸತನವನ್ನು ಹುಡುಕುವುದು ಮುಖ್ಯ.
- ತಾಳ್ಮೆಯ ಅಗತ್ಯ: ನೀವು ಕಲಿತ ಕೋರ್ಸ್ಗಳು ಅಥವಾ ಜ್ಞಾನವು ರಾತ್ರೋರಾತ್ರಿ ನಿಮ್ಮನ್ನು ಉತ್ತುಂಗಕ್ಕೆ ಏರಿಸುವುದಿಲ್ಲ. ಅದಕ್ಕೆ ಸಮಯ ನೀಡಬೇಕು.
- ಆರ್ಥಿಕ ಶಿಸ್ತು: ಈ ನಾಲ್ಕೂ ರಾಶಿಯವರು ಹಣಕಾಸಿನ ವಿಚಾರದಲ್ಲಿ ಸ್ವಲ್ಪ ಜಾಗರೂಕರಾಗಿರಬೇಕು. ಆದಾಯಕ್ಕಿಂತ ಹೆಚ್ಚು ಖರ್ಚು ಮಾಡಿ, ನಂತರ ಆ ಒತ್ತಡವನ್ನು ನಿವಾರಿಸಲು ಮತ್ತೊಂದು ಕೆಲಸ ಹುಡುಕುವುದು ಸರಿಯಾದ ಕ್ರಮವಲ್ಲ.
ಗಮನಿಸಿ: ಈ ರಾಶಿಗಳವರು ತಮ್ಮ ಜನ್ಮ ಜಾತಕದಲ್ಲಿರುವ ದಶೆ ಮತ್ತು ಭುಕ್ತಿಗಳ ಬಗ್ಗೆ ಗಮನ ಹರಿಸಿದರೆ, ಯಾವ ಸಮಯದಲ್ಲಿ ಉದ್ಯೋಗ ಬದಲಾವಣೆ ಲಾಭದಾಯಕ ಎಂಬುದು ಸ್ಪಷ್ಟವಾಗುತ್ತದೆ.
ಲೇಖನ- ಶ್ರೀನಿವಾಸ ಮಠ
