2026ರ ಮಾರ್ಚ್ 19ರಿಂದ ಆರಂಭ ಆಗಲಿರುವ ‘ಪರಾಭವ ನಾಮ ಸಂವತ್ಸರ’ವು ತುಲಾ ರಾಶಿಯವರಿಗೆ ಅತ್ಯಂತ ಭರವಸೆಯ ವರ್ಷವಾಗಲಿದೆ. ಈ ವರ್ಷ ಶನಿ ಗ್ರಹವು ನಿಮ್ಮ ರಾಶಿಯಿಂದ ಆರನೇ ಮನೆಯಲ್ಲಿ ಸಂಚರಿಸುತ್ತಿರುವುದು ಜೀವನದಲ್ಲಿ ದೊಡ್ಡ ಮಟ್ಟದ ವಿಜಯವನ್ನು ತರಲಿದೆ. ಶತ್ರು ಬಾಧೆಗಳಿಂದ ಮುಕ್ತಿ ಮತ್ತು ಗುರುವಿನ ಬಲವು ನಿಮಗೆ ಹೇಗೆ ವರದಾನವಾಗಲಿದೆ? ವೃತ್ತಿ, ಕುಟುಂಬ ಮತ್ತು ಆರೋಗ್ಯದ ದೃಷ್ಟಿಯಿಂದ ನೀವು ಕೈಗೊಳ್ಳಬೇಕಾದ ಮುನ್ನೆಚ್ಚರಿಕೆಗಳೇನು? ಇಲ್ಲಿದೆ ಸಂಪೂರ್ಣ ಮಾಹಿತಿ.
ತುಲಾ ರಾಶಿಯವರ ಗುಣ ಸ್ವಭಾವ
ತುಲಾ ರಾಶಿಯವರು ಚಿತ್ತಾ (3, 4ನೇ ಪಾದ), ಸ್ವಾತಿ ಮತ್ತು ವಿಶಾಖ ನಕ್ಷತ್ರದ (1, 2, 3ನೇ ಪಾದ) ಜನಿಸಿದವರು. ಶುಕ್ರ ರಾಶ್ಯಾಧಿಪತಿ. ಇವರು ನ್ಯಾಯಪ್ರಿಯರು, ಸೌಮ್ಯ ಸ್ವಭಾವದವರು ಮತ್ತು ಕಲಾತ್ಮಕ ಮನೋಭಾವದವರು. ಜೀವನದಲ್ಲಿ ಸಮತೋಲನ ಕಾಯ್ದುಕೊಳ್ಳಲು ಬಯಸುವ ಇವರು, ಸಮಾಜದಲ್ಲಿ ಎಲ್ಲರೊಂದಿಗೆ ಉತ್ತಮ ಬಾಂಧವ್ಯ ಹೊಂದಿರುತ್ತಾರೆ. ಆಕರ್ಷಕ ವ್ಯಕ್ತಿತ್ವ ಮತ್ತು ಸಮಯಪ್ರಜ್ಞೆ ಇವರ ವಿಶೇಷತೆ. ಸವಾಲುಗಳನ್ನು ಶಾಂತ ರೀತಿಯಿಂದ ಎದುರಿಸುವ ಜಾಣ್ಮೆ ಇವರಲ್ಲಿರುತ್ತದೆ.
ಶನಿ ಸಂಚಾರ
ಈ ಸಂವತ್ಸರದಲ್ಲಿ ಶನಿ ಗ್ರಹವು ನಿಮ್ಮ ರಾಶಿಯಿಂದ ಆರನೇ ಮನೆಯಾದ ಮೀನ ರಾಶಿಯಲ್ಲಿ ಸಂಚರಿಸಲಿದ್ದಾನೆ. ಜ್ಯೋತಿಷ್ಯ ಶಾಸ್ತ್ರದ ಪ್ರಕಾರ, ಆರನೇ ಮನೆಯ ಶನಿಯು ಅತ್ಯಂತ ಶುಭಫಲಗಳನ್ನು ನೀಡುತ್ತಾನೆ.
- ಶತ್ರು ವಿಜಯ: ನಿಮ್ಮ ವಿರುದ್ಧ ಸಂಚು ರೂಪಿಸುವವರು ಈ ವರ್ಷ ಸೋಲೊಪ್ಪಿಕೊಳ್ಳುತ್ತಾರೆ. ಹಳೆಯ ಕೋರ್ಟ್ ಕಚೇರಿ ವ್ಯಾಜ್ಯಗಳಲ್ಲಿ ಜಯ ಸಿಗಲಿದೆ.
- ವೃತ್ತಿ ಪ್ರಗತಿ: ಕೆಲಸದಲ್ಲಿ ನಿಮ್ಮ ದಕ್ಷತೆಗೆ ಮೆಚ್ಚುಗೆ ದೊರೆಯುತ್ತದೆ. ಕಠಿಣ ಶ್ರಮಕ್ಕೆ ತಕ್ಕ ಪ್ರತಿಫಲ ಸಿಗಲಿದೆ.
- ಎಚ್ಚರಿಕೆ: ಸಾಲ ಮಾಡುವಾಗ ಅಥವಾ ಯಾರಿಗಾದರೂ ಜಾಮೀನು ನೀಡುವಾಗ ಎಚ್ಚರಿಕೆ ಇರಲಿ. ಆರೋಗ್ಯದ ಸಣ್ಣ ಪುಟ್ಟ ಸಮಸ್ಯೆಗಳನ್ನು ನಿರ್ಲಕ್ಷಿಸಬೇಡಿ.
ಗುರು ಸಂಚಾರ
ತುಲಾ ರಾಶಿಯವರಿಗೆ ಈ ವರ್ಷ ಗುರುವು ಅದೃಷ್ಟದ ಬಾಗಿಲನ್ನು ತೆರೆಯಲಿದ್ದಾನೆ:
- ಜೂನ್ 1ರ ತನಕ: ಗುರುವು 9ನೇ ಮನೆಯಲ್ಲಿದ್ದು (ಮಿಥುನ), ತಂದೆ ಕಡೆಯಿಂದ ಲಾಭ, ಪಿತ್ರಾರ್ಜಿತ ಆಸ್ತಿ ವಿಚಾರದಲ್ಲಿ ಅನುಕೂಲ, ದೂರದ ಪ್ರಯಾಣ ಮತ್ತು ಧಾರ್ಮಿಕ ಕಾರ್ಯಗಳಲ್ಲಿ ಭಾಗಿಯಾಗುವ ಯೋಗವಿದೆ.
- ಜೂನ್ 2ರಿಂದ ಅಕ್ಟೋಬರ್ 31ರ ತನಕ: ಗುರುವು 10ನೇ ಮನೆಗೆ (ಕರ್ಕಾಟಕ) ಪ್ರವೇಶಿಸುತ್ತಾನೆ. ಇದು ವೃತ್ತಿ ಕ್ಷೇತ್ರದಲ್ಲಿ ಉನ್ನತ ಸ್ಥಾನಮಾನ ಮತ್ತು ಹೊಸ ಜವಾಬ್ದಾರಿಗಳನ್ನು ತರಲಿದೆ. ಸರ್ಕಾರಿ ಕೆಲಸಗಳಿಗೆ ಪ್ರಯತ್ನಿಸುತ್ತಿರುವವರಿಗೆ ಇದು ಸುವರ್ಣ ಕಾಲ.
- ನವೆಂಬರ್ 1ರಿಂದ ಜನವರಿ 24ರ ತನಕ: ಗುರು 11ನೇ ಮನೆಗೆ ಚಲಿಸುವುದರಿಂದ ಆರ್ಥಿಕ ಲಾಭದ ಹಾದಿ ಸುಗಮವಾಗಲಿದೆ. ಹಳೆಯ ಬಾಕಿ ಹಣ ವಾಪಸ್ ಬರಲಿದೆ.
- ಜನವರಿ 25ರ ನಂತರ: ಪುನಃ 10ನೇ ಮನೆಗೆ ಬರುವುದರಿಂದ ಕೆಲಸದಲ್ಲಿ ಸ್ವಲ್ಪ ಒತ್ತಡ ಹೆಚ್ಚಾಗಬಹುದು.
ರಾಹು-ಕೇತು ಸಂಚಾರ
ಡಿಸೆಂಬರ್ 5ರ ತನಕ ರಾಹುವು 5ನೇ ಮನೆಯಲ್ಲಿ (ಕುಂಭ) ಮತ್ತು ಕೇತುವು 11ನೇ ಮನೆಯಲ್ಲಿ (ಸಿಂಹ) ಇರುತ್ತಾರೆ.
- 5ನೇ ಮನೆಯ ರಾಹು ಮಕ್ಕಳ ಶಿಕ್ಷಣ ಅಥವಾ ಆರೋಗ್ಯದ ಬಗ್ಗೆ ಸ್ವಲ್ಪ ಚಿಂತೆ ತರಬಹುದು. ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡುವಾಗ ಜಾಗರೂಕರಾಗಿರಿ.
- ಡಿಸೆಂಬರ್ 5ರ ನಂತರ ರಾಹು 4ನೇ ಮನೆಗೆ ಮತ್ತು ಕೇತು 10ನೇ ಮನೆಗೆ ಪ್ರವೇಶಿಸುತ್ತಾರೆ. ಈ ಸಮಯದಲ್ಲಿ ಮನೆ ಅಥವಾ ವಾಹನ ಖರೀದಿಯ ಯೋಗವಿದೆ. ಆದರೆ ತಾಯಿಯ ಆರೋಗ್ಯದ ಬಗ್ಗೆ ಕಾಳಜಿ ವಹಿಸಬೇಕು.
ಪರಿಹಾರಗಳು
- ಶುಕ್ರ ಶಾಂತಿ: ಪ್ರತಿ ಶುಕ್ರವಾರ ಮಹಾಲಕ್ಷ್ಮಿಯ ಆರಾಧನೆ ಮಾಡಿ ಮತ್ತು ಲಲಿತಾ ಸಹಸ್ರನಾಮ ಪಠಿಸಿ.
- ದಾನ: ಬಡವರಿಗೆ ಅಥವಾ ಅಗತ್ಯವಿರುವವರಿಗೆ ಬಿಳಿ ಬಣ್ಣದ ವಸ್ತುಗಳನ್ನು (ಅಕ್ಕಿ, ಸಕ್ಕರೆ ಅಥವಾ ಬಿಳಿ ಬಟ್ಟೆ) ದಾನ ಮಾಡಿ.
- ಶನಿ ಪರಿಹಾರ: ಆರನೇ ಮನೆಯ ಶನಿಯ ಫಲ ಪರಿಣಾಮಕಾರಿಯಾಗಿ ಸಿಗಲು ಶನಿವಾರ ಶಿವನಿಗೆ ಅಭಿಷೇಕ ಮಾಡಿ.
- ಮಂತ್ರ: ಪ್ರತಿದಿನ ‘ಓಂ ಶುಂ ಶುಕ್ರಾಯ ನಮಃ’ ಮಂತ್ರವನ್ನು 108 ಬಾರಿ ಜಪಿಸಿ.
ಸೌಂದರ್ಯ ಆರಾಧಕ ಆರ್ಥಿಕ ಚತುರ ತುಲಾ ರಾಶಿಯವರ ಆಕರ್ಷಕ ವ್ಯಕ್ತಿತ್ವ ಸಂಪೂರ್ಣ ಗುಣಸ್ವಭಾವ
ಕೊನೆಮಾತು: “ಈ ವರ್ಷ ನಿಮಗೆ ಶನಿ ಬಲ ಮತ್ತು ಗುರು ಬಲ ಎರಡೂ ಪೂರಕವಾಗಿವೆ. ಆರೋಗ್ಯದ ಕಡೆಗೆ ನಿರ್ಲಕ್ಷ್ಯ ಮಾಡದೆ, ಬರುವ ಅವಕಾಶಗಳನ್ನು ಸರಿಯಾಗಿ ಬಳಸಿಕೊಂಡರೆ ಈ ವರ್ಷ ಆರ್ಥಿಕವಾಗಿ ನೀವು ದೊಡ್ಡ ಮಟ್ಟದ ಏಳಿಗೆ ಕಾಣಲಿದ್ದೀರಿ.”
ಲೇಖನ-ಶ್ರೀನಿವಾಸ ಮಠ
