ಭಾರತದಲ್ಲಿ ಗೋಚರಿಸದ ಸೂರ್ಯ ಗ್ರಹಣ: ಯಾವ ರಾಶಿಗೆ ಲಾಭ? ಯಾರಿಗೆ ನಷ್ಟ? ಸಮಗ್ರ ಮಾಹಿತಿ

2026ರ ಫೆಬ್ರವರಿ 17ರ ಮಂಗಳವಾರದಂದು ಖಗೋಳ ಮಂಡಲದಲ್ಲಿ ಒಂದು ಮಹತ್ವದ ಘಟನೆ ಸಂಭವಿಸಲಿದೆ. ಅದೇ ರಾಹು ಗ್ರಸ್ತ ಸೂರ್ಯ ಗ್ರಹಣ. ಈ ಗ್ರಹಣವು ಶತಭಿಷ ನಕ್ಷತ್ರದ ಕುಂಭ ರಾಶಿಯಲ್ಲಿ ಸಂಭವಿಸುತ್ತಿದೆ. ಭಾರತದಲ್ಲಿ ಈ ಗ್ರಹಣವು ನೇರವಾಗಿ ಗೋಚರವಾಗದಿದ್ದರೂ ಜ್ಯೋತಿಷ್ಯ ಶಾಸ್ತ್ರದ ಪ್ರಕಾರ ಗ್ರಹಗತಿಗಳ ಬದಲಾವಣೆಯು ಹನ್ನೆರಡು ರಾಶಿಗಳ ಮೇಲೆ ಮತ್ತು ಪರಿಸರದ ಮೇಲೆ ತನ್ನದೇ ಆದ ಪ್ರಭಾವವನ್ನು ಬೀರುತ್ತದೆ.

ಗ್ರಹಣದ ಜ್ಯೋತಿಷ್ಯ ಹಿನ್ನೆಲೆ

ಕುಂಭ ರಾಶಿಯಲ್ಲಿ ಸೂರ್ಯ ಮತ್ತು ರಾಹು ಒಂದೇ ಮನೆಯಲ್ಲಿ ಇರುವುದರಿಂದ ಈ ಗ್ರಹಣ ಸಂಭವಿಸುತ್ತದೆ. ಜ್ಯೋತಿಷ್ಯ ಶಾಸ್ತ್ರದ ಪ್ರಕಾರ, ಸೂರ್ಯನು ಆತ್ಮ ಮತ್ತು ಅಧಿಕಾರದ ಸಂಕೇತವಾದರೆ, ರಾಹುವು ಭ್ರಮೆ ಮತ್ತು ವಿಘ್ನಗಳ ಸಂಕೇತ. ಈ ಎರಡು ಗ್ರಹಗಳ ಸಂಯೋಗವು ಸಮಾಜದಲ್ಲಿ ಮತ್ತು ವೈಯಕ್ತಿಕ ಜೀವನದಲ್ಲಿ ಕೆಲವು ಏರಿಳಿತಗಳನ್ನು ತರುತ್ತದೆ.

ಹನ್ನೆರಡು ರಾಶಿಗಳ ಮೇಲೆ ಗ್ರಹಣದ ಪ್ರಭಾವ

ಅಶುಭ ಫಲ (ಜಾಗರೂಕತೆ ಅತ್ಯಗತ್ಯ)

ಕೆಳಗಿನ ರಾಶಿಯವರು ಗ್ರಹಣದ ಸಮಯದಲ್ಲಿ ಮತ್ತು ನಂತರದ ಕೆಲವು ದಿನಗಳ ಕಾಲ ತಾಳ್ಮೆಯಿಂದ ಇರುವುದು ಕ್ಷೇಮ.

• ಕುಂಭ: ಗ್ರಹಣವು ನಿಮ್ಮದೇ ರಾಶಿಯಲ್ಲಿ ನಡೆಯುವುದರಿಂದ ಮಾನಸಿಕ ಒತ್ತಡ, ಆರೋಗ್ಯ ಸಮಸ್ಯೆ ಹಾಗೂ ನಿರ್ಧಾರ ತೆಗೆದುಕೊಳ್ಳುವಲ್ಲಿ ಗೊಂದಲ ಉಂಟಾಗಬಹುದು.
• ಮೀನ: ಅನಗತ್ಯ ಖರ್ಚುಗಳು ಹೆಚ್ಚಾಗಲಿವೆ. ಆಸ್ಪತ್ರೆ ವೆಚ್ಚ ಅಥವಾ ದೂರದ ಪ್ರಯಾಣದಿಂದ ಆಯಾಸವಾಗಬಹುದು.
• ವೃಶ್ಚಿಕ: ಕೌಟುಂಬಿಕ ಕಲಹಗಳು ಬರುವ ಸಾಧ್ಯತೆ ಇದೆ. ತಾಯಿಯ ಆರೋಗ್ಯದ ಬಗ್ಗೆ ಕಾಳಜಿ ಇರಲಿ. ಮನೆ ಅಥವಾ ವಾಹನದ ಕೆಲಸಗಳಲ್ಲಿ ಅಡೆತಡೆ ಉಂಟಾಗಬಹುದು.
• ಕರ್ಕಾಟಕ: ಅನಿರೀಕ್ಷಿತ ಅವಘಡ ಅಥವಾ ಆರೋಗ್ಯದಲ್ಲಿ ಏರುಪೇರಾಗಬಹುದು. ಹೂಡಿಕೆ ಮಾಡುವಾಗ ಎಚ್ಚರಿಕೆ ವಹಿಸಿ.

ಶುಭ ಫಲ (ಪ್ರಗತಿಯ ಪರ್ವ)

ಈ ರಾಶಿಯವರಿಗೆ ಗ್ರಹಣವು ಹೊಸ ಅವಕಾಶಗಳ ಬಾಗಿಲನ್ನು ತೆರೆಯಲಿದೆ.

• ಧನುಸ್ಸು: ಧೈರ್ಯ ಮತ್ತು ಪರಾಕ್ರಮ ಹೆಚ್ಚಾಗುತ್ತದೆ. ಸಣ್ಣ ಪ್ರವಾಸದಿಂದ ಲಾಭವಾಗಲಿದೆ. ಸಹೋದರರಿಂದ ಸಹಕಾರ ಸಿಗಲಿದೆ.
• ಮೇಷ: ಹಠಾತ್ ಧನಲಾಭದ ಯೋಗವಿದೆ. ದೀರ್ಘಕಾಲದ ಆಸೆಗಳು ಈಡೇರಲಿವೆ. ಸ್ನೇಹಿತರಿಂದ ಬೆಂಬಲ ಸಿಗಲಿದೆ.
• ವೃಷಭ: ವೃತ್ತಿ ಜೀವನದಲ್ಲಿ ಬಡ್ತಿ ಅಥವಾ ಹೊಸ ಜವಾಬ್ದಾರಿಗಳು ಅರಸಿ ಬರಲಿವೆ. ಸಾಮಾಜಿಕವಾಗಿ ಗೌರವ ವೃದ್ಧಿಯಾಗಲಿದೆ.
• ಕನ್ಯಾ: ಹಳೆಯ ಸಾಲಗಳಿಂದ ಮುಕ್ತಿ ಸಿಗಲಿದೆ. ಶತ್ರುಗಳ ಮೇಲೆ ಜಯ ಸಾಧಿಸುವಿರಿ. ಆರೋಗ್ಯ ಸುಧಾರಿಸಲಿದೆ.

ಮಿಶ್ರ ಫಲ (ಸಮತೋಲನ ಕಾಯ್ದುಕೊಳ್ಳಿ)

• ಮಕರ: ಆರ್ಥಿಕ ಸ್ಥಿತಿ ಉತ್ತಮವಾಗಿದ್ದರೂ ಕಟುವಾದ ಮಾತುಗಳಿಂದ ಸಂಬಂಧಗಳು ಹಾಳಾಗಬಹುದು.
• ತುಲಾ: ಮಕ್ಕಳ ಶಿಕ್ಷಣದ ಬಗ್ಗೆ ಚಿಂತೆ ಕಾಡಬಹುದು. ಸೃಜನಾತ್ಮಕ ಕೆಲಸಗಳಲ್ಲಿ ಸಾಧಾರಣ ಯಶಸ್ಸು ಸಿಗಲಿದೆ.
• ಸಿಂಹ: ವೈವಾಹಿಕ ಜೀವನದಲ್ಲಿ ಅಥವಾ ಪಾಲುದಾರಿಕೆ ವ್ಯವಹಾರದಲ್ಲಿ ಹೊಂದಾಣಿಕೆ ಅಗತ್ಯ. ಆತುರದ ನಿರ್ಧಾರ ಬೇಡ.
• ಮಿಥುನ: ಅದೃಷ್ಟದ ಮೇಲೆ ಅವಲಂಬಿತರಾಗುವ ಬದಲು ಪರಿಶ್ರಮ ನಂಬಿ. ಅಧ್ಯಾತ್ಮದ ಕಡೆ ಮನಸ್ಸು ವಾಲುವುದು.

ಕೇತುಗ್ರಸ್ತ ಚಂದ್ರ ಗ್ರಹಣ ಮಾರ್ಚ್ ಮೂರಕ್ಕೆ ಸಿಂಹ ರಾಶಿಯಲ್ಲಿ; ಮೇಷದಿಂದ ಮೀನದ ತನಕ ಯಾರಿಗೆ ಏನು ಫಲ?

ದೋಷ ನಿವಾರಣೆಗೆ ವಿಶೇಷ ದಾನಗಳ ಮಹತ್ವ

ಗ್ರಹಣದ ನಕಾರಾತ್ಮಕ ಪ್ರಭಾವವನ್ನು ತಗ್ಗಿಸಲು ಮತ್ತು ಗ್ರಹಗಳ ಶಾಂತಿಗಾಗಿ ಶಾಸ್ತ್ರೋಕ್ತವಾಗಿ ದಾನ ಮಾಡುವುದು ಅತ್ಯಂತ ಪರಿಣಾಮಕಾರಿ ಎಂದು ನಂಬಲಾಗಿದೆ.

1. ಸೂರ್ಯನ ಪ್ರೀತಿಗಾಗಿ ಗೋಧಿ ದಾನ: ಸೂರ್ಯನು ಗ್ರಹಣ ಪೀಡಿತನಾಗುವುದರಿಂದ ಆತನ ಅನುಗ್ರಹಕ್ಕಾಗಿ ಗೋಧಿಯನ್ನು ದಾನ ಮಾಡಬೇಕು. ಇದು ಆತ್ಮವಿಶ್ವಾಸವನ್ನು ಹೆಚ್ಚಿಸುತ್ತದೆ ಮತ್ತು ತಂದೆಯವರ ಕಡೆಯಿಂದ ಬರಬೇಕಾದ ಸೌಲಭ್ಯಗಳನ್ನು ಸುಗಮಗೊಳಿಸುತ್ತದೆ.
2. ರಾಹುವಿನ ಶಾಂತಿಗಾಗಿ ಉದ್ದಿನ ದಾನ: ರಾಹುವಿನ ಪ್ರಭಾವ ತಗ್ಗಿಸಲು ಉದ್ದಿನ ಕಾಳು ಅಥವಾ ಉದ್ದಿನ ಬೇಳೆಯನ್ನು ದಾನ ಮಾಡಬೇಕು. ಇದು ಜೀವನದಲ್ಲಿ ಬರುವ ಅನಿರೀಕ್ಷಿತ ವಿಘ್ನಗಳನ್ನು, ಭಯವನ್ನು ಮತ್ತು ಮಾನಸಿಕ ಗೊಂದಲಗಳನ್ನು ದೂರ ಮಾಡುತ್ತದೆ.
3. ದಾನದ ಕ್ರಮ: ಗ್ರಹಣ ಮುಗಿದ ನಂತರ ಅಥವಾ ಮರುದಿನ ಬೆಳಗ್ಗೆ ಸ್ನಾನಾದಿ ಕರ್ಮಗಳನ್ನು ಮುಗಿಸಿ, ದಕ್ಷಿಣೆಯೊಂದಿಗೆ ಈ ಧಾನ್ಯಗಳನ್ನು ಅರ್ಹರಿಗೆ ಅಥವಾ ದೇವಸ್ಥಾನಕ್ಕೆ ನೀಡುವುದು ಶ್ರೇಯಸ್ಕರ.

ಕೊನೆಮಾತು

ಈ ಸೂರ್ಯ ಗ್ರಹಣವು ಒಂದು ಸ್ಥಿತ್ಯಂತರದ ಸಂಕೇತವಾಗಿದೆ. ಅಶುಭ ಫಲ ಇರುವ ರಾಶಿಯವರು ಆತಂಕ ಪಡದೆ, ಸಂಯಮ ಮತ್ತು ದಾನ-ಧರ್ಮಗಳ ಮೂಲಕ ಶಾಂತಿ ಕಂಡುಕೊಳ್ಳಬಹುದು. ಶುಭ ಫಲ ಇರುವವರು ಸಕಾಲದಲ್ಲಿ ಬಂದ ಅವಕಾಶಗಳನ್ನು ಬಳಸಿಕೊಳ್ಳಲು ಸನ್ನದ್ಧರಾಗಬೇಕು. 

ಲೇಖನ- ಶ್ರೀನಿವಾಸ ಮಠ