ಏಪ್ರಿಲ್ 2ನೇ ತಾರೀಕಿನಿಂದ ಮೇ ತಿಂಗಳ 11ನೇ ತಾರೀಕಿನ ತನಕ ಮೀನ ರಾಶಿಯಲ್ಲಿ ಶನಿ- ಕುಜ ಸಂಯೋಗ ಇರುತ್ತದೆ. ಈ ಗ್ರಹಗತಿ ಬದಲಾವಣೆ ಜ್ಯೋತಿಷ್ಯ ಶಾಸ್ತ್ರದಲ್ಲಿ ಅತ್ಯಂತ ಕುತೂಹಲಕಾರಿಯಾಗಿದೆ. ಅದರಲ್ಲೂ ಮೀನ ರಾಶಿಯಲ್ಲಿ ಕುಜ ಮತ್ತು ಶನಿಯ ಸಮಾಗಮದಿಂದ ಉಂಟಾಗುವ ‘ಮಂದ-ಮಂಗಳ’ ಯೋಗವು ಜಾಗತಿಕವಾಗಿ ಮತ್ತು ವೈಯಕ್ತಿಕವಾಗಿ ಮಹತ್ವದ ಬದಲಾವಣೆಗಳಿಗೆ ಸಾಕ್ಷಿಯಾಗಲಿದೆ. ಈ ಕುರಿತಾದ ಲೇಖನ ಇಲ್ಲಿದೆ:
ಜಗತ್ತಿನ ಮೇಲೆ ಶನಿ-ಮಂಗಳ ಯುತಿಯ ಪ್ರಭಾವ
ಮೀನ ರಾಶಿಯು ಕಾಲಪುರುಷನ ಹನ್ನೆರಡನೇ ಮನೆಯಾಗಿದ್ದು, ಇದು ಮೋಕ್ಷ, ವ್ಯಯ ಮತ್ತು ವಿದೇಶಿ ವ್ಯವಹಾರಗಳನ್ನು ಸೂಚಿಸುತ್ತದೆ. ಇಲ್ಲಿ ಶನಿ (ಮಂದ) ಮತ್ತು ಮಂಗಳ (ಕುಜ) ಒಂದಾಗುವುದು ಅಗ್ನಿ ಮತ್ತು ಗಾಳಿಯ ಸಂಯೋಜನೆಯಂತೆ. ಈ ಅವಧಿಯಲ್ಲಿ ಜಾಗತಿಕವಾಗಿ ಅಶಾಂತಿ, ಯುದ್ಧಭೀತಿ ಅಥವಾ ಗಡಿ ಸಂಘರ್ಷಗಳು ತೀವ್ರಗೊಳ್ಳುವ ಸಾಧ್ಯತೆಯಿದೆ. ಹನ್ನೆರಡನೇ ಮನೆಯು ಗುಪ್ತ ಶತ್ರುಗಳನ್ನು ಪ್ರತಿನಿಧಿಸುವುದರಿಂದ, ದೇಶಗಳ ನಡುವೆ ರಹಸ್ಯ ಕಾರ್ಯಾಚರಣೆಗಳು ಹೆಚ್ಚಾಗಬಹುದು. ನೈಸರ್ಗಿಕ ವಿಕೋಪಗಳು, ಅದರಲ್ಲೂ ಮುಖ್ಯವಾಗಿ ಸಮುದ್ರ ಅಥವಾ ನೀರಿಗೆ ಸಂಬಂಧಿಸಿದ ಅವಘಡಗಳು ಸಂಭವಿಸುವ ಸಂಭವವಿರುತ್ತದೆ. ಆರ್ಥಿಕ ಮಾರುಕಟ್ಟೆಯಲ್ಲಿ ಅನಿರೀಕ್ಷಿತ ಏರಿಳಿತಗಳು ಕಂಡುಬರಬಹುದು. ಜನರು ತಾಳ್ಮೆಯನ್ನು ಕಳೆದುಕೊಳ್ಳುವ ಸಾಧ್ಯತೆ ಇರುವುದರಿಂದ ಸಾರ್ವಜನಿಕ ಪ್ರತಿಭಟನೆಗಳು ಹೆಚ್ಚಾಗಬಹುದು. ಒಟ್ಟಾರೆಯಾಗಿ, ಈ ಯುತಿಯು ಜಗತ್ತಿಗೆ ಒಂದು ರೀತಿಯ ಪರೀಕ್ಷಾ ಕಾಲ ಎನ್ನಬಹುದು.
ಹನ್ನೆರಡು ರಾಶಿಗಳ ಮೇಲೆ ಈ ಗ್ರಹ ಸ್ಥಿತಿಯ ಪ್ರಭಾವ
- ಮೇಷ ರಾಶಿ: ಹನ್ನೆರಡನೇ ಮನೆಯಲ್ಲಿ ಈ ಯುತಿ ಇರುವುದರಿಂದ ಅತಿಯಾದ ಖರ್ಚು ಮತ್ತು ನಿದ್ರಾಹೀನತೆ ಕಾಡಬಹುದು. ಶತ್ರುಗಳ ಬಗ್ಗೆ ಜಾಗ್ರತೆ ಇರಲಿ. ಆರೋಗ್ಯದ ಮೇಲೆ ಹಣ ವ್ಯಯವಾಗಬಹುದು.
- ವೃಷಭ ರಾಶಿ: ಹನ್ನೊಂದನೇ ಮನೆಯಲ್ಲಿ ಈ ಯೋಗ ಇರುವುದರಿಂದ ಲಾಭದ ಪ್ರಮಾಣ ಹೆಚ್ಚಿದ್ದರೂ ಆಕಸ್ಮಿಕ ಅಡೆತಡೆಗಳು ಎದುರಾಗಬಹುದು. ಹಿರಿಯ ಒಡಹುಟ್ಟಿದವರೊಂದಿಗೆ ಭಿನ್ನಾಭಿಪ್ರಾಯ ಉಂಟಾಗದಂತೆ ನೋಡಿಕೊಳ್ಳಿ.
- ಮಿಥುನ ರಾಶಿ: ಹತ್ತನೇ ಮನೆಯಲ್ಲಿ ಗ್ರಹಗಳ ಸಂಯೋಜನೆಯಿಂದ ವೃತ್ತಿ ಜೀವನದಲ್ಲಿ ಒತ್ತಡ ಹೆಚ್ಚಾಗುತ್ತದೆ. ಮೇಲಧಿಕಾರಿಗಳೊಂದಿಗೆ ಸಮಾಧಾನದಿಂದ ವರ್ತಿಸಿ. ಕೆಲಸದ ಸ್ಥಳದಲ್ಲಿ ಹೆಚ್ಚಿನ ಜವಾಬ್ದಾರಿಗಳು ಹೆಗಲೇರಲಿವೆ.
- ಕರ್ಕಾಟಕ ರಾಶಿ: ಒಂಬತ್ತನೇ ಮನೆಯಲ್ಲಿ ಈ ಯುತಿ ಇರುವುದರಿಂದ ತಂದೆಯ ಆರೋಗ್ಯದಲ್ಲಿ ಏರುಪೇರಾಗಬಹುದು. ದೀರ್ಘ ಪ್ರಯಾಣದಲ್ಲಿ ಅಡೆತಡೆಗಳು ಎದುರಾಗಬಹುದು. ಭಾಗ್ಯೋದಯಕ್ಕೆ ಕಠಿಣ ಪರಿಶ್ರಮ ಅಗತ್ಯ.
- ಸಿಂಹ ರಾಶಿ: ಎಂಟನೇ ಮನೆಯಲ್ಲಿ ಶನಿ-ಮಂಗಳ ಯುತಿ ಇರುವುದರಿಂದ ವಾಹನ ಚಾಲನೆಯಲ್ಲಿ ಅತೀವ ಜಾಗ್ರತೆ ಅಗತ್ಯ. ಹಠಾತ್ ಆರೋಗ್ಯ ಸಮಸ್ಯೆ ಅಥವಾ ಆರ್ಥಿಕ ಸಂಕಷ್ಟ ಎದುರಾಗಬಹುದು. ಮಾತು ಹಿತವಾಗಿರಲಿ.
- ಕನ್ಯಾ ರಾಶಿ: ಏಳನೇ ಮನೆಯಲ್ಲಿ ಈ ಯುತಿ ಇರುವುದರಿಂದ ದಾಂಪತ್ಯ ಜೀವನದಲ್ಲಿ ಕಲಹಗಳು ಏರ್ಪಡಬಹುದು. ಪಾಲುದಾರಿಕೆ ವ್ಯವಹಾರದಲ್ಲಿ ನಷ್ಟ ಸಂಭವಿಸುವ ಸಾಧ್ಯತೆ ಇದೆ. ತಾಳ್ಮೆಯೇ ನಿಮ್ಮ ಯಶಸ್ಸಿನ ಮಂತ್ರ.
- ತುಲಾ ರಾಶಿ: ಆರನೇ ಮನೆಯಲ್ಲಿ ಶನಿ-ಮಂಗಳರು ಶತ್ರು ಜಯವನ್ನು ನೀಡುತ್ತಾರೆ. ಹಳೆಯ ಸಾಲಗಳಿಂದ ಮುಕ್ತಿ ಸಿಗಬಹುದು. ಆದರೆ ಆರೋಗ್ಯದ ಬಗ್ಗೆ ನಿರ್ಲಕ್ಷ್ಯ ಬೇಡ, ವಿಶೇಷವಾಗಿ ರಕ್ತದೊತ್ತಡದ ಬಗ್ಗೆ ಗಮನವಿರಲಿ.
- ವೃಶ್ಚಿಕ ರಾಶಿ: ಐದನೇ ಮನೆಯಲ್ಲಿ ಈ ಯುತಿ ಇರುವುದರಿಂದ ಸಂತಾನಕ್ಕೆ ಸಂಬಂಧಿಸಿದ ಚಿಂತೆ ಕಾಡಬಹುದು. ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡುವಾಗ ಎಚ್ಚರವಿರಲಿ. ಪ್ರೇಮ ಜೀವನದಲ್ಲಿ ಗೊಂದಲಗಳು ಉಂಟಾಗಬಹುದು.
- ಧನು ರಾಶಿ: ನಾಲ್ಕನೇ ಮನೆಯಲ್ಲಿ ಗ್ರಹಗಳ ಸ್ಥಿತಿಯಿಂದ ತಾಯಿಯ ಆರೋಗ್ಯ ಕಾಡಬಹುದು. ಆಸ್ತಿ ಅಥವಾ ವಾಹನ ಖರೀದಿ ಪ್ರಕ್ರಿಯೆ ವಿಳಂಬವಾಗಬಹುದು. ಮನೆಯಲ್ಲಿ ಅಶಾಂತಿಯ ವಾತಾವರಣ ಇರದಂತೆ ನೋಡಿಕೊಳ್ಳಿ.
- ಮಕರ ರಾಶಿ: ಮೂರನೇ ಮನೆಯಲ್ಲಿ ಮಂಗಳ ಸಂಚಾರ ನಿಮ್ಮ ಧೈರ್ಯವನ್ನು ಹೆಚ್ಚಿಸುತ್ತದೆ. ಆದರೆ ಸೋದರರೊಂದಿಗೆ ಮನಸ್ತಾಪವಾಗಬಹುದು. ಕಠಿಣ ನಿರ್ಧಾರಗಳನ್ನು ತೆಗೆದುಕೊಳ್ಳುವಾಗ ಆತುರ ಬೇಡ.
- ಕುಂಭ ರಾಶಿ: ಎರಡನೇ ಮನೆಯಲ್ಲಿ ಈ ಯುತಿ ಇರುವುದರಿಂದ ಕಟುವಾದ ಮಾತುಗಳಿಂದ ಸಂಬಂಧ ಹಾಳಾಗಬಹುದು. ಆರ್ಥಿಕ ಉಳಿತಾಯಕ್ಕೆ ಅಡೆತಡೆ ಎದುರಾಗಬಹುದು. ಕಣ್ಣಿನ ಆರೋಗ್ಯದ ಬಗ್ಗೆ ಕಾಳಜಿ ವಹಿಸಿ.
- ಮೀನ ರಾಶಿ: ನಿಮ್ಮದೇ ರಾಶಿಯಲ್ಲಿ ಶನಿ-ಮಂಗಳರ ಇರುವುದರಿಂದ ಮಾನಸಿಕ ಒತ್ತಡ ಹೆಚ್ಚಿರಲಿದೆ. ದೈಹಿಕ ಆಯಾಸ ಮತ್ತು ಕೋಪ ನಿಮ್ಮನ್ನು ಕಾಡಬಹುದು. ನಿಯಮಿತ ಧ್ಯಾನ ಮತ್ತು ಸಂಯಮ ಈ ಅವಧಿಯಲ್ಲಿ ಅತಿ ಮುಖ್ಯ.
ಲೇಖನ- ಶ್ರೀನಿವಾಸ ಮಠ
