ಮಕರ ರಾಶಿಯಲ್ಲಿ ಜನಿಸಿದವರಿಗೆ ಪರಾಭವ ನಾಮ ಸಂವತ್ಸರದಲ್ಲಿ ಯುಗಾದಿ ವರ್ಷಫಲ ಹೇಗಿದೆ? ಶುಭ ಫಲಗಳು ಏನೇನು? ಗುರು ಬಲ ಇದೆಯಾ? ಎಚ್ಚರಿಕೆಗಳು ಯಾವ್ಯಾವು? ಇತ್ಯಾದಿ ವಿಚಾರಗಳ ಬಗ್ಗೆ ಗ್ರಹಗಳ ಗೋಚಾರದ ಆಧಾರದಲ್ಲಿ ವರ್ಷಭವಿಷ್ಯ ನೀಡಲಾಗುತ್ತಿದೆ. 2026ರ ಪರಾಭವ ನಾಮ ಸಂವತ್ಸರವು ಮಕರ ರಾಶಿಯವರಿಗೆ ಅತ್ಯಂತ ಸಮಾಧಾನಕರ ವರ್ಷ. ಶನಿಯ ಅನುಗ್ರಹ ಜೊತೆಗೆ ಗುರುವಿನ ಆಶೀರ್ವಾದದ ಬಲದಿಂದಾಗಿ ಈ ವರ್ಷ ಹೊಸ ಚೈತನ್ಯ ನೀಡಲಿದೆ. ನಿಮ್ಮ ರಾಶಿಯ ಭವಿಷ್ಯ ಈ ಕೆಳಗಿನಂತಿದೆ:
ಮಕರ ರಾಶಿ ಗುಣ ಸ್ವಭಾವ
ಮಕರ ರಾಶಿಯವರು ಉತ್ತರಾಷಾಢ (2, 3, 4ನೇ ಪಾದ), ಶ್ರವಣ ಮತ್ತು ಧನಿಷ್ಠಾ ನಕ್ಷತ್ರದ 1 ಮತ್ತು 2ನೇ ಪಾದದಲ್ಲಿ ಜನಿಸಿದವರು. ಶನಿ ಈ ರಾಶಿಯ ಅಧಿಪತಿ ಆಗಿರುವುದರಿಂದ ಇವರು ಶಿಸ್ತುಬದ್ಧರು, ಕಠಿಣ ಪರಿಶ್ರಮಿಗಳು ಮತ್ತು ಸ್ಥಿರ ಮನಸ್ಸಿನವರು. ಅತಿ ದೊಡ್ಡ ಮಹತ್ವಾಕಾಂಕ್ಷೆಗಳನ್ನು ಹೊಂದಿರುತ್ತಾರೆ ಮತ್ತು ಅದನ್ನು ಸಾಧಿಸಲು ಎಷ್ಟೇ ಸಮಯವಾದರೂ ತಾಳ್ಮೆಯಿಂದ ಕಾಯುತ್ತಾರೆ. ಇವರು ಸಂಪ್ರದಾಯವಾದಿಗಳು ಮತ್ತು ಜವಾಬ್ದಾರಿಯುತ ವ್ಯಕ್ತಿಗಳು. ಹೊರನೋಟಕ್ಕೆ ಗಂಭೀರವಾಗಿ ಕಂಡರೂ ಒಳಗಡೆ ಅಪಾರ ಪ್ರೀತಿ ಮತ್ತು ಕಾಳಜಿ ಉಳ್ಳವರು.
ಶನಿ ಸಂಚಾರ
ಈ ಸಂವತ್ಸರದಲ್ಲಿ ಶನಿ ಗ್ರಹವು ನಿಮ್ಮ ರಾಶಿಯಿಂದ ಮೂರನೇ ಮನೆಯಾದ ಮೀನ ರಾಶಿಯಲ್ಲಿ ಸಂಚರಿಸಲಿದೆ.
- ಪರಿಣಾಮ: ಇದು ಮಕರ ರಾಶಿಯವರಿಗೆ ಅತ್ಯಂತ ಶುಭದಾಯಕವಾದ ಸಂಚಾರ. ಮೂರನೇ ಮನೆಯ ಶನಿಯು ಶತ್ರುನಾಶ, ಧೈರ್ಯ ವೃದ್ಧಿ ಮತ್ತು ಉದ್ಯೋಗದಲ್ಲಿ ಸ್ಥಿರತೆಯನ್ನು ನೀಡಲಿದ್ದಾನೆ.
- ಲಾಭ: ದೀರ್ಘ ಕಾಲದಿಂದ ಅನುಭವಿಸುತ್ತಿದ್ದ ಮಾನಸಿಕ ಒತ್ತಡ ಮತ್ತು ಆರ್ಥಿಕ ಸಂಕಷ್ಟಗಳು ಈ ವರ್ಷ ಬಗೆಹರಿಯಲಿವೆ. ಸಣ್ಣಪುಟ್ಟ ಪ್ರಯಾಣಗಳಿಂದ ಲಾಭವಾಗಲಿದೆ. ಶನಿಯ ಕೃಪೆಯಿಂದ ಸಮಾಜದಲ್ಲಿ ನಿಮ್ಮ ಗೌರವ ಹೆಚ್ಚಾಗಲಿದೆ.
ಗುರು ಸಂಚಾರ
ಈ ವರ್ಷ ಗುರುವಿನ ಸಂಚಾರವು ನಿಮ್ಮ ಅಭಿವೃದ್ಧಿಗೆ ಪೂರಕವಾಗಿದೆ:
- ಜೂನ್ 1ರ ತನಕ: ಗುರುವು 6ನೇ ಮನೆಯಲ್ಲಿದ್ದು (ಮಿಥುನ) ಸಾಲ ಮತ್ತು ಆರೋಗ್ಯದ ಬಗ್ಗೆ ಸಣ್ಣಪುಟ್ಟ ಸಮಸ್ಯೆ ನೀಡಬಹುದು.
- ಜೂನ್ 2ರಿಂದ ಅಕ್ಟೋಬರ್ 31: ಗುರುವು ತನ್ನ ಉಚ್ಚ ರಾಶಿಯಾದ ಕರ್ಕಾಟಕಕ್ಕೆ ಅಂದರೆ ನಿಮ್ಮ ರಾಶಿಯಿಂದ 7ನೇ ಮನೆಗೆ (ಸಪ್ತಮ ಗುರು) ಪ್ರವೇಶಿಸುತ್ತಾನೆ. ಇದು ‘ಗುರುಬಲ’ ಲಭಿಸುವ ಅದ್ಭುತ ಸಮಯ. ವಿವಾಹ ಕಾರ್ಯಗಳು ಕೈಗೂಡಲಿವೆ, ಪಾಲುದಾರಿಕೆ ವ್ಯವಹಾರದಲ್ಲಿ ಯಶಸ್ಸು ಸಿಗಲಿದೆ ಮತ್ತು ದಾಂಪತ್ಯ ಜೀವನ ಸುಖಮಯವಾಗಿರಲಿದೆ.
- ನವೆಂಬರ್ 1ರಿಂದ ಜನವರಿ 24: ಗುರುವು 8ನೇ ಮನೆಗೆ ಪ್ರವೇಶಿಸುವುದರಿಂದ ಆರೋಗ್ಯದ ಬಗ್ಗೆ ಸ್ವಲ್ಪ ಕಾಳಜಿ ಇರಲಿ. ಅನಿರೀಕ್ಷಿತ ಖರ್ಚುಗಳ ಬಗ್ಗೆ ಎಚ್ಚರಿಕೆ ಅಗತ್ಯ.
- ಜನವರಿ 25ರ ನಂತರ: ಗುರುವು ಪುನಃ 7ನೇ ಮನೆಗೆ ಬರುವುದರಿಂದ ಸ್ಥಗಿತಗೊಂಡ ಕೆಲಸಗಳು ಪುನಃ ಆರಂಭವಾಗಲಿವೆ.
ರಾಹು-ಕೇತು ಸಂಚಾರ
ವರ್ಷದ ಆರಂಭದಿಂದ ಡಿಸೆಂಬರ್ 5ರ ತನಕ ರಾಹುವು ಕುಂಭ ರಾಶಿಯಲ್ಲಿ ಅಂದರೆ ನಿಮ್ಮ ರಾಶಿಯಿಂದ ಎರಡನೇ ಮನೆಯಲ್ಲಿ ಮತ್ತು ಕೇತುವು ಸಿಂಹ ರಾಶಿಯಲ್ಲಿ ಅಂದರೆ ನಿಮ್ಮ ರಾಶಿಯಿಂದ ಎಂಟನೇ ಮನೆಯಲ್ಲಿ ಸಂಚರಿಸಲಿದ್ದಾರೆ.
- ರಾಹು 2ರಲ್ಲಿ: ಎರಡನೇ ಮನೆಯಲ್ಲಿ ರಾಹು ಇರುವುದರಿಂದ ಹಣಕಾಸಿನ ವ್ಯವಹಾರಗಳಲ್ಲಿ ತೀವ್ರ ಜಾಗರೂಕತೆ ಇರಲಿ. ಮಾತಿನ ಮೇಲೆ ಹಿಡಿತವಿಲ್ಲದಿದ್ದರೆ ಕುಟುಂಬದಲ್ಲಿ ಸಣ್ಣಪುಟ್ಟ ಭಿನ್ನಾಭಿಪ್ರಾಯಗಳು ಮೂಡಬಹುದು. ಕಣ್ಣಿನ ಅಥವಾ ಹಲ್ಲಿನ ಆರೋಗ್ಯದ ಬಗ್ಗೆ ಗಮನವಿರಲಿ.
- ಕೇತು 8ರಲ್ಲಿ: ಎಂಟನೇ ಮನೆಯ ಕೇತುವು ಅನಿರೀಕ್ಷಿತ ಆಧ್ಯಾತ್ಮಿಕ ಅನುಭವಗಳನ್ನು ನೀಡುತ್ತಾನೆ. ಗುಪ್ತ ವಿದ್ಯೆ ಅಥವಾ ಸಂಶೋಧನೆಯಲ್ಲಿ ಆಸಕ್ತಿ ಹೆಚ್ಚಲಿದೆ. ಆದರೆ ವಾಹನ ಚಾಲನೆಯಲ್ಲಿ ಮತ್ತು ಆರೋಗ್ಯದ ವಿಷಯದಲ್ಲಿ ಅಸಡ್ಡೆ ಮಾಡಬಾರದು.
ಡಿಸೆಂಬರ್ 5ರ ನಂತರ ರಾಹುವು ನಿಮ್ಮ ರಾಶಿಗೆ (1ನೇ ಮನೆ) ಮತ್ತು ಕೇತು 7ನೇ ಮನೆಗೆ ಪ್ರವೇಶಿಸುತ್ತಾರೆ. ಈ ಬದಲಾವಣೆಯು ನಿಮ್ಮ ಆಲೋಚನಾ ಕ್ರಮದಲ್ಲಿ ಹೊಸತನವನ್ನು ತರಲಿದ್ದು, ದೈವಿಕ ಚಿಂತನೆಗಳು ಹೆಚ್ಚಾಗಲು ಕಾರಣವಾಗಲಿದೆ.
ಪರಿಹಾರಗಳು
- ಶನಿ ಸೇವೆ: ಶನಿ ದೇವರಿಗೆ ಪ್ರತಿ ಶನಿವಾರ ಎಳ್ಳೆಣ್ಣೆ ದೀಪ ಹಚ್ಚಿ.
- ಗುರು ಪ್ರಾರ್ಥನೆ: ಗುರುವಾರಗಳಂದು ರಾಘವೇಂದ್ರ ಸ್ವಾಮಿಗಳ ಮಠಕ್ಕೆ ಭೇಟಿ ನೀಡಿ ಅಥವಾ ದಕ್ಷಿಣಾಮೂರ್ತಿಯನ್ನು ಆರಾಧಿಸಿ.
- ದಾನ: ನಿರ್ಗತಿಕರಿಗೆ ಅಥವಾ ವಯಸ್ಸಾದವರಿಗೆ ಶಕ್ತಿಗನುಗುಣವಾಗಿ ಸಹಾಯ ಮಾಡಿ.
- ಮಂತ್ರ: ಪ್ರತಿದಿನ ‘ಓಂ ಹನುಮತೇ ನಮಃ’ ಮಂತ್ರವನ್ನು ಜಪಿಸಿ.
ಮಕರ ರಾಶಿಯವರ ಗುಣ-ಸ್ವಭಾವ: ಮೌನವೇ ಶಕ್ತಿಯಾದ ಇವರ ಬದುಕು ಬದಲಾಗುವುದು ಯಾವಾಗ?
ಕೊನೆಮಾತು
“ಇದು ನಿಮ್ಮ ಕನಸುಗಳನ್ನು ನನಸು ಮಾಡಿಕೊಳ್ಳಲು ಸೂಕ್ತ ಸಮಯ. ಜೂನ್ ನಂತರದ ಗುರುಬಲವು ನಿಮ್ಮ ಬಾಳಿಗೆ ಹೊಸ ಬೆಳಕು ತರಲಿದೆ.”
ಲೇಖನ- ಶ್ರೀನಿವಾಸ ಮಠ
