ಮಂತ್ರಾಲಯ ಪ್ರಭು ರಾಘವೇಂದ್ರ ಸ್ವಾಮಿಗಳು ಜನಿಸಿದ ಪುಣ್ಯಭೂಮಿ ಭುವನಗಿರಿ: ಈ ಕ್ಷೇತ್ರದ ವಿಶೇಷತೆಗಳೇನು?

ರಾಘವೇಂದ್ರ ಸ್ವಾಮಿಗಳ ಹೆಸರು ಕಿವಿಗೆ ಬಿದ್ದರೆ ನೆನಪಾಗುವುದು ಮಂತ್ರಾಲಯ. ಈ ಎರಡೂ ಹೆಸರು ಕೇಳಿದ ಕೂಡಲೇ ಭಕ್ತರ ಮನದಲ್ಲಿ ಭಕ್ತಿಭಾವದ ಅಲೆ ಏಳುತ್ತದೆ. ತುಂಗಭದ್ರಾ ನದಿ ತಟದಲ್ಲಿ ಇರುರುವ ಮಂತ್ರಾಲಯವು  ಶ್ರೀ ರಾಘವೇಂದ್ರ ತೀರ್ಥರ ಸಶರೀರ ವೃಂದಾವನದಿಂದಾಗಿ ಜಗತ್ಪ್ರಸಿದ್ಧವಾಗಿದೆ. ಲಕ್ಷಾಂತರ ಭಕ್ತರ ಕಷ್ಟಗಳನ್ನು ನೀಗಿಸುವ, ನಂಬಿದವರಿಗೆ ಇಷ್ಟಾರ್ಥ ಸಿದ್ಧಿಸುವ ‘ಕಲ್ಪವೃಕ್ಷ’ ಎಂದು ರಾಘವೇಂದ್ರ ಸ್ವಾಮಿಗಳಿಗೆ ನಡೆದುಕೊಳ್ಳುವವರು ಬಲವಾಗಿ ನಂಬುತ್ತಾರೆ. ಅಂಥ ರಾಯರು ಮಂತ್ರಾಲಯದಲ್ಲಿ ನೆಲೆಸಿದ್ದಾರೆ. ಆದರೆ ಈ ಮಹಾನ್ ಚೇತನವು ಜನ್ಮತಾಳಿದ ಆ ಪವಿತ್ರ ತಾಣ ತಮಿಳುನಾಡಿನ ಭುವನಗಿರಿ.

ಭುವನಗಿರಿಯ ಐತಿಹಾಸಿಕ ಹಿನ್ನೆಲೆ

ತಮಿಳುನಾಡಿನ ಕಡಲೂರು ಜಿಲ್ಲೆಯಲ್ಲಿರುವ ಭುವನಗಿರಿಯು ರಾಯರ ಪೂರ್ವಾಶ್ರಮದ ಜನ್ಮಸ್ಥಳ. ಹದಿನಾರನೇ ಶತಮಾನದಲ್ಲಿ (ಕ್ರಿ.ಶ. 1595) ಫಾಲ್ಗುಣ ಮಾಸದ ಶುಕ್ಲ ಪಕ್ಷದ ಸಪ್ತಮಿಯಂದು ತಿಮ್ಮಣ್ಣ ಭಟ್ಟರು ಮತ್ತು ಗೋಪಿಕಾಂಬೆಯವರ ಮಗನಾಗಿ, ಜನಿಸಿದರು. ಅವರ ಹೆಸರು ವೆಂಕಟನಾಥ (ರಾಯರ ಪೂರ್ವಾಶ್ರಮದ ಹೆಸರು) ಎಂದಿತ್ತು.

ಕ್ಷೇತ್ರದ ವಿಶೇಷತೆಗಳು

ಭುವನಗಿರಿ. ಇಂದು ಈ ಸ್ಥಳವು ಕೇವಲ ಸ್ಮರಣೀಯ ತಾಣವಾಗಿ ಮಾತ್ರ ಉಳಿಯದೆ, ಭಕ್ತರ ಶ್ರದ್ಧಾ ಕೇಂದ್ರವಾದ ಶ್ರೀ ರಾಘವೇಂದ್ರ ಸ್ವಾಮಿಗಳ ಮಠವಾಗಿ ಮಾರ್ಪಟ್ಟಿದೆ.

ವಿಗ್ರಹ ಮತ್ತು ಬೃಂದಾವನದ ವಿಶೇಷ ಸನ್ನಿಧಿ

ಭುವನಗಿರಿಯ ಮಠದ ವೈಶಿಷ್ಟ್ಯವೆಂದರೆ ಇಲ್ಲಿ ಒಂದೇ ಗರ್ಭಗೃಹದಲ್ಲಿ ಶ್ರೀ ಗುರುರಾಯರ ವಿಗ್ರಹ ಮತ್ತು ಮೃತ್ತಿಕಾ ವೃಂದಾವನ ಎರಡೂ ಇರುವುದು.

• ರಾಯರ ಮನೋಹರ ವಿಗ್ರಹ: ಇಲ್ಲಿ ರಾಯರ ಸುಂದರವಾದ ವಿಗ್ರಹವನ್ನು ಪ್ರತಿಷ್ಠಾಪಿಸಲಾಗಿದೆ. ರಾಯರು ಕುಳಿತ ಭಂಗಿಯಲ್ಲಿರುವ ಈ ವಿಗ್ರಹವು ಭಕ್ತರಿಗೆ ಅವರ ಸಾಕ್ಷಾತ್ ದರ್ಶನದ ಅನುಭೂತಿ ನೀಡುತ್ತದೆ. ಸಾಮಾನ್ಯವಾಗಿ ಮಠಗಳಲ್ಲಿ ವೃಂದಾವನಕ್ಕೆ ಪೂಜೆ ನಡೆಯುತ್ತದೆ, ಆದರೆ ಇಲ್ಲಿ ವಿಗ್ರಹದ ಮೂಲಕ ರಾಯರ ಸೌಮ್ಯ ರೂಪವನ್ನು ಕಣ್ತುಂಬಿಕೊಳ್ಳಬಹುದು.
• ಮೃತ್ತಿಕಾ ವೃಂದಾವನ: ವಿಗ್ರಹದ ಹಿಂಭಾಗದಲ್ಲಿ ಅಥವಾ ಪಕ್ಕದಲ್ಲೇ ಪವಿತ್ರವಾದ ಮೃತ್ತಿಕಾ ವೃಂದಾವನವಿದೆ. 
• ಜನ್ಮಸ್ಥಳದ ಪಾವಿತ್ರ್ಯ: ರಾಯರು ಜನಿಸಿದ ಸ್ಥಳದಲ್ಲೇ ಈ ವೃಂದಾವನ ಮತ್ತು ವಿಗ್ರಹವನ್ನು ಸ್ಥಾಪಿಸಿರುವುದು ಈ ಕ್ಷೇತ್ರದ ಮಹತ್ವವನ್ನು ಹೆಚ್ಚು ಮಾಡಿದೆ.

ಮಠದ ವಾತಾವರಣ

• ಈ ಮಠವು ಮಂತ್ರಾಲಯ ಶ್ರೀ ರಾಘವೇಂದ್ರ ಸ್ವಾಮಿಗಳ ಮಠದ ಆಡಳಿತಕ್ಕೆ ಒಳಪಟ್ಟಿದ್ದು, ಇಲ್ಲಿ ಪ್ರತಿದಿನ ಶಾಸ್ತ್ರೋಕ್ತವಾಗಿ ಪೂಜೆ, ಪುನಸ್ಕಾರಗಳು ಮತ್ತು ಹಸ್ತೋದಕ ನಡೆಯುತ್ತವೆ.
• ಮಠದ ಆವರಣದಲ್ಲಿ ರಾಯರ ಬಾಲ್ಯವನ್ನು ವಿವರಿಸುವ ಶಿಲ್ಪಕಲೆಗಳು ಮತ್ತು ಚಿತ್ರಗಳು ಇವೆ.
• ಇಲ್ಲಿ ರಾಯರ ಆರಾಧನಾ ಮಹೋತ್ಸವ ಮತ್ತು ಗುರು ಪೂರ್ಣಿಮೆಯ ಸಂದರ್ಭದಲ್ಲಿ ವಿಶೇಷ ಉತ್ಸವಗಳು ಜರುಗುತ್ತವೆ.

ಕಾರ್ಯ ಸಿದ್ಧಿಗೆ ಈ ಐದು ಗಣಪತಿಗಳ ಸರಣಿ ದರ್ಶನವೇ ರಾಮಬಾಣ: ಇಲ್ಲಿದೆ ಕ್ಷೇತ್ರಗಳ ಸಂಪೂರ್ಣ ಮಾಹಿತಿ

ಒಂದು ವಿಶೇಷ ಮಾಹಿತಿ: ಮಂತ್ರಾಲಯದಲ್ಲಿ ರಾಯರು ಸಶರೀರ ವೃಂದಾವನಸ್ಥರಾಗಿದ್ದರೆ, ಭುವನಗಿರಿಯಲ್ಲಿ ಅವರು ಶಿಶುವಾಗಿ ಜನ್ಮತಳೆದ ಕಾರಣ, ಈ ಕ್ಷೇತ್ರವನ್ನು ‘ರಾಯರ ಜನ್ಮ ಭೂಮಿ’ ಎಂದು ಅತ್ಯಂತ ಭಕ್ತಿಯಿಂದ ಪೂಜಿಸಲಾಗುತ್ತದೆ.

ಭುವನಗಿರಿಗೆ ಭೇಟಿ ನೀಡುವುದು ಹೇಗೆ?

ಭುವನಗಿರಿಯು ಚಿದಂಬರಂನಿಂದ ಕೇವಲ 7 ಕಿಲೋಮೀಟರ್ ದೂರದಲ್ಲಿದೆ. ರೈಲು ಅಥವಾ ಬಸ್ಸಿನ ಮೂಲಕ ಚಿದಂಬರಂ ತಲುಪಿ ಅಲ್ಲಿಂದ ಸುಲಭವಾಗಿ ಈ ಪುಣ್ಯಕ್ಷೇತ್ರಕ್ಕೆ ಭೇಟಿ ನೀಡಬಹುದು.

“ಪೂಜ್ಯಾಯ ರಾಘವೇಂದ್ರಾಯ ಸತ್ಯಧರ್ಮ ರತಾಯ ಚ | ಭಜತಾಂ ಕಲ್ಪವೃಕ್ಷಾಯ ನಮತಾಂ ಕಾಮಧೇನವೇ ||”

ಮಂತ್ರಾಲಯದಲ್ಲಿ ರಾಯರ ವೈಭವವನ್ನು ಕಂಡ ಕಣ್ಣುಗಳಿಗೆ, ಭುವನಗಿರಿಯ ದರ್ಶನವು ಮತ್ತೊಂದು ಅಧ್ಯಾತ್ಮ ಅನುಭೂತಿಯಾಗುತ್ತದೆ. ರಾಘವೇಂದ್ರ ಸ್ವಾಮಿಗಳ ಭಕ್ತರು ಒಮ್ಮೆಯಾದರೂ ಭೇಟಿ ನೀಡುವಂಥ ವಿಶೇಷ ಸ್ಥಳವಿದು.

ರಾಘವೇಂದ್ರ ಸ್ತೋತ್ರದ ಯೂಟ್ಯೂಬ್ ಲಿಂಕ್: https://www.youtube.com/watch?v=6nVJsuFPlCc

ಲೇಖನ- ಶ್ರೀನಿವಾಸ ಮಠ