ಶ್ರೀರಂಗಂನ ಸಕ್ಕರತ್ತಾ ಆಳ್ವಾರ್ ಸನ್ನಿಧಿಯ ವಿಶೇಷತೆ ಏನು? ಶತ್ರು ಬಾಧೆ ಮತ್ತು ದೃಷ್ಟಿ ದೋಷ ನಿವಾರಣೆಗೆ ಇಲ್ಲಿದೆ ಪರಿಹಾರ

ತಮಿಳುನಾಡಿನ ಶ್ರೀರಂಗಂನಲ್ಲಿ ಇರುವ ಶ್ರೀರಂಗನಾಥ ದೇವಸ್ಥಾನಕ್ಕೆ ತೆರಳಿದಂಥವರು ರಂಗನಾಥನ ದರ್ಶನವನ್ನು ಸಾಮಾನ್ಯವಾಗಿ ಮಾಡಿಯೇ ಮಾಡುತ್ತಾರೆ. ಆದರೆ ಈ ಬೃಹತ್ ದೇವಾಲಯ ಸಮುಚ್ಚಯದಲ್ಲಿ ಅನೇಕ ಉಪ-ಸನ್ನಿಧಿಗಳಿವೆ. ಅಂಥದ್ದರಲ್ಲಿ ‘ಸಕ್ಕರತ್ತಾ ಆಳ್ವಾರ್’ (ಚಕ್ರತ್ತಾಳ್ವರ್) ಸನ್ನಿಧಿಗೆ ಭಕ್ತರು ಅತಿ ಹೆಚ್ಚಿನ ಸಂಖ್ಯೆಯಲ್ಲಿ ಭೇಟಿ ನೀಡುತ್ತಾರೆ. ಸಕ್ಕರತ್ತಾ ಆಳ್ವಾರ್ ಅಂದರೆ ವಿಷ್ಣುವಿನ ಕೈಯಲ್ಲಿ ಇರುವ ಸುದರ್ಶನ ಚಕ್ರ. ಇಲ್ಲಿ ಸುದರ್ಶನ ಚಕ್ರವನ್ನು ಕೇವಲ ಆಯುಧವಾಗಿ ನೋಡದೆ, ಒಬ್ಬ ಆಳ್ವಾರ್ ಎಂದೇ ಪೂಜಿಸಲಾಗುತ್ತದೆ.

ಅಪ್ರತಿಮ ವಿಗ್ರಹ ವಿನ್ಯಾಸ 

ಇಲ್ಲಿನ ವಿಗ್ರಹವು ತಾಂತ್ರಿಕ ಮತ್ತು ಆಧ್ಯಾತ್ಮಿಕ ದೃಷ್ಟಿಯಿಂದ ಬಹಳ ವಿಶೇಷವಾಗಿದೆ.

• ಜೋತಿ ಚಕ್ರ: ವಿಗ್ರಹದ ಸುತ್ತಲೂ ಬೆಂಕಿಯ ಜ್ವಾಲೆಗಳನ್ನು ಕೆತ್ತಲಾಗಿದೆ (ಜ್ವಾಲಾ ಮಾಲೆ). ಇದು ನಕಾರಾತ್ಮಕ ಶಕ್ತಿಗಳನ್ನು ಸುಟ್ಟು ಭಸ್ಮ ಮಾಡುವ ಸಂಕೇತ.
• ಆಯುಧಗಳು: ಎಂಟು ಕೈಗಳಲ್ಲಿ ಶಂಖ, ಚಕ್ರ, ಧನುಸ್ಸು, ಕೊಡಲಿ ಮುಂತಾದ ವಿವಿಧ ದಿವ್ಯ ಆಯುಧಗಳನ್ನು ಹಿಡಿದಿದ್ದಾನೆ. ಇದು ಸ್ವಾಮಿಯು ಭಕ್ತನನ್ನು ಎಲ್ಲಾ ದಿಕ್ಕುಗಳಿಂದಲೂ ರಕ್ಷಿಸುತ್ತಾನೆ ಎಂಬ ಭರವಸೆ ನೀಡುತ್ತದೆ.
• ಹಿಂಭಾಗದ ರಹಸ್ಯ: ವಿಗ್ರಹದ ಹಿಂಭಾಗದಲ್ಲಿ ಯೋಗ ನರಸಿಂಹ ಮೂರ್ತಿ ಇದೆ. ಸುದರ್ಶನ ಚಕ್ರವು ಕ್ರಿಯೆಯ ಸಂಕೇತವಾದರೆ, ನರಸಿಂಹನು ಜ್ಞಾನದ ಸಂಕೇತ. ಈ ಸಂಗಮವನ್ನು ‘ಸುದರ್ಶನ ನರಸಿಂಹ’ ಎಂದು ಕರೆಯಲಾಗುತ್ತದೆ.

ಐತಿಹಾಸಿಕ ಮತ್ತು ಸಾಂಸ್ಕೃತಿಕ ಮಹತ್ವ

• ಕೃಷ್ಣದೇವರಾಯನ ಕೊಡುಗೆ: ವಿಜಯನಗರದ ಅರಸರು, ವಿಶೇಷವಾಗಿ ಕೃಷ್ಣದೇವರಾಯ ಈ ಸನ್ನಿಧಿಯ ಅಭಿವೃದ್ಧಿಗೆ ಬಹಳಷ್ಟು ಶ್ರಮಿಸಿದ್ದಾರೆ. ಅವರ ಕಾಲದಲ್ಲಿ ಈ ಸನ್ನಿಧಿಗೆ ವಿಶೇಷ ಕಲ್ಲಿನ ಮಂಟಪಗಳನ್ನು ನಿರ್ಮಿಸಲಾಯಿತು.
• ದರ್ಶನ ಕ್ರಮ: ಭಕ್ತರು ಮೊದಲು ಮುಂಭಾಗದ ಸುದರ್ಶನ ಚಕ್ರಕ್ಕೆ ನಮಸ್ಕರಿಸಿ, ನಂತರ ಪ್ರದಕ್ಷಿಣೆ ಬಂದು ಹಿಂಭಾಗದ ಯೋಗ ನರಸಿಂಹನ ದರ್ಶನ ಪಡೆಯುವುದು ಇಲ್ಲಿನ ಪದ್ಧತಿ.
• ಈ ಸನ್ನಿಧಿಯು ಶ್ರೀರಂಗಂ ದೇವಾಲಯದ ಎರಡನೇ ಪ್ರಾಕಾರದಲ್ಲಿದೆ (ಯುಗಲಕ್ಷ್ಮಿ ಸನ್ನಿಧಿಯ ಹತ್ತಿರ).
• ಇದನ್ನು ವಿಜಯನಗರದ ಕಾಲದಲ್ಲಿ ವಿಸ್ತರಿಸಲಾಯಿತು. ಇಲ್ಲಿನ ಕೆತ್ತನೆಗಳು ಮತ್ತು ಕಲ್ಲಿನ ಕೆಲಸಗಳು ಬಹಳ ಸುಂದರವಾಗಿವೆ.

ಪವಾಡ ಮತ್ತು ನಂಬಿಕೆಗಳು

• ದೃಷ್ಟಿ ದೋಷ ನಿವಾರಣೆ: ಈ ಸನ್ನಿಧಿಯಲ್ಲಿ ಪ್ರಾರ್ಥನೆ ಸಲ್ಲಿಸುವುದರಿಂದ ಕೆಟ್ಟ ದೃಷ್ಟಿ- ದೃಷ್ಟಿ ದೋಷ ಮತ್ತು ವಾಮಾಚಾರದಂತಹ ನಕಾರಾತ್ಮಕ ಪ್ರಭಾವಗಳು ದೂರವಾಗುತ್ತವೆ ಎಂಬ ಬಲವಾದ ನಂಬಿಕೆಯಿದೆ.
• ಬುಧ ಗ್ರಹದ ದೋಷ: ಜ್ಯೋತಿಷ್ಯ ಶಾಸ್ತ್ರದ ಪ್ರಕಾರ ಬುಧ ಗ್ರಹದ ದೋಷ ಇರುವವರು ಸಕ್ಕರತ್ತಾ ಆಳ್ವಾರ್ ಸನ್ನಿಧಿಯಲ್ಲಿ ತುಳಸಿ ಅರ್ಚನೆ ಮಾಡಿಸಿದರೆ ಉತ್ತಮ ಫಲಿತಾಂಶ ಸಿಗುತ್ತದೆ ಎಂದು ಹೇಳಲಾಗುತ್ತದೆ.
• ಮನೋಬಲ: ಮಾನಸಿಕವಾಗಿ ಕುಗ್ಗಿದವರು ಅಥವಾ ಅತಿಯಾದ ಭಯ ಇರುವವರು ಇಲ್ಲಿ ಪೂಜೆ ಸಲ್ಲಿಸಿದರೆ ಧೈರ್ಯ ಮತ್ತು ಆತ್ಮವಿಶ್ವಾಸ ಹೆಚ್ಚುತ್ತದೆ.
• ಶತ್ರು ಬಾಧೆ ನಿವಾರಣೆ: ಜೀವನದಲ್ಲಿ ಎದುರಾಗುವ ಅಡೆತಡೆಗಳು, ಶತ್ರುಗಳ ಕಾಟ ಮತ್ತು ಭಯವನ್ನು ಹೋಗಲಾಡಿಸಲು ಇಲ್ಲಿ ವಿಶೇಷ ಪೂಜೆ ಸಲ್ಲಿಸಲಾಗುತ್ತದೆ.
• ಸುದರ್ಶನ ಹೋಮ: ಭಕ್ತರು ತಮ್ಮ ಇಷ್ಟಾರ್ಥ ಸಿದ್ಧಿಗಾಗಿ ಇಲ್ಲಿ ಸುದರ್ಶನ ಹೋಮ ಅಥವಾ ಅರ್ಚನೆ ಮಾಡಿಸುತ್ತಾರೆ.
• ಸಂಕಷ್ಟ ಪರಿಹಾರ: ಮಾನಸಿಕ ನೆಮ್ಮದಿ ಮತ್ತು ದೀರ್ಘಕಾಲದ ಕಾಯಿಲೆಗಳಿಂದ ಚೇತರಿಕೆ ಕಾಣಲು ಸಕ್ಕರತ್ತಾ ಆಳ್ವಾರ್ ಪೂಜೆ ಪ್ರಶಸ್ತವೆಂದು ನಂಬಲಾಗಿದೆ.

ವಿಶೇಷ ಸೇವೆಗಳು

• ತುಳಸಿ ಮಾಲೆ: ಸಕ್ಕರತ್ತಾ ಆಳ್ವಾರ್‌ಗೆ ತುಳಸಿ ಮಾಲೆ ಎಂದರೆ ಅತ್ಯಂತ ಪ್ರಿಯ. ಭಕ್ತರು ಸಂಕಷ್ಟ ಪರಿಹಾರಕ್ಕಾಗಿ ಇಲ್ಲಿ ತುಳಸಿ ಅರ್ಚನೆ ಮಾಡಿಸುತ್ತಾರೆ.
• ಸುದರ್ಶನ ಹೋಮ: ವರ್ಷಕ್ಕೊಮ್ಮೆ ಅಥವಾ ವಿಶೇಷ ದಿನಗಳಲ್ಲಿ ಇಲ್ಲಿ ನಡೆಯುವ ಸುದರ್ಶನ ಹೋಮದಲ್ಲಿ ಭಾಗವಹಿಸಿದರೆ ಆ ವ್ಯಕ್ತಿಯ ಇಡೀ ಕುಟುಂಬಕ್ಕೆ ರಕ್ಷಣೆ ಸಿಗುತ್ತದೆ ಎಂಬ ನಂಬಿಕೆಯಿದೆ.

ಆತ್ಮವಿಶ್ವಾಸ ಮತ್ತು ಯಶಸ್ಸಿನ ಸಾರಥಿ ‘ಕಾರ್ನೇಲಿಯನ್’: ಈ ಅದೃಷ್ಟದ ರತ್ನದ ಅದ್ಭುತ ಜ್ಯೋತಿಷ್ಯ ಪ್ರಯೋಜನಗಳಿವು!

ದೇವಾಲಯದ ಸಮಯ

ಸಕ್ಕರತ್ತಾ ಆಳ್ವಾರ್ ಸನ್ನಿಧಿಯು ಸಾಮಾನ್ಯವಾಗಿ ಈ ಕೆಳಗಿನ ಸಮಯಗಳಲ್ಲಿ ತೆರೆದಿರುತ್ತದೆ:

• ಬೆಳಗ್ಗೆ 6ರಿಂದ ಮಧ್ಯಾಹ್ನ 1ರ ವರೆಗೆ.
• ಸಂಜೆ 4ರಿಂದ ರಾತ್ರಿ 9ರ ವರೆಗೆ.
• ಶನಿವಾರ ಮತ್ತು ಬುಧವಾರ: ಈ ಎರಡು ದಿನಗಳು ಸಕ್ಕರತ್ತಾ ಆಳ್ವಾರ್ ಪೂಜೆಗೆ ಅತ್ಯಂತ ಪ್ರಶಸ್ತ.

(ಗಮನಿಸಿ: ಶ್ರೀ ರಂಗನಾಥ ಸ್ವಾಮಿ ಮುಖ್ಯ ದೇವಾಲಯದ ದರ್ಶನದ ಸಮಯಗಳು ಪೂಜೆ ಮತ್ತು ಉತ್ಸವಗಳ ಸಂದರ್ಭದಲ್ಲಿ ಬದಲಾಗಬಹುದು. ಸಾಮಾನ್ಯವಾಗಿ ಬೆಳಿಗ್ಗೆ 5:30 ರಿಂದ ರಾತ್ರಿ 9:00 ರವರೆಗೆ ವಿವಿಧ ಹಂತಗಳಲ್ಲಿ ದರ್ಶನವಿರುತ್ತದೆ).

ಶ್ರೀರಂಗಂಗೆ ತಲುಪುವುದು ಹೇಗೆ? (How to Reach)

ಶ್ರೀರಂಗಂ ತಮಿಳುನಾಡಿನ ತಿರುಚಿರಾಪಳ್ಳಿ (ತಿರುಚ್ಚಿ) ನಗರದಲ್ಲಿದೆ ಮತ್ತು ಇಲ್ಲಿಗೆ ತಲುಪಲು ಉತ್ತಮ ಸಾರಿಗೆ ಸೌಲಭ್ಯಗಳಿವೆ:

ರೈಲಿನ ಮೂಲಕ:

• • ಶ್ರೀರಂಗಂನಲ್ಲಿ  ರೈಲು ನಿಲ್ದಾಣವಿದೆ (SRGM). ಆದರೆ ಪ್ರಮುಖ ರೈಲುಗಳು ತಿರುಚಿರಾಪಳ್ಳಿ ಜಂಕ್ಷನ್ (TPJ) ನಲ್ಲಿ ನಿಲ್ಲುತ್ತವೆ. ಇಲ್ಲಿಂದ ಶ್ರೀರಂಗಂಗೆ ಸುಮಾರು 10-12 ಕಿ.ಮೀ ದೂರವಿದ್ದು, ಬಸ್ ಅಥವಾ ಟ್ಯಾಕ್ಸಿ ಮೂಲಕ ಸುಲಭವಾಗಿ ತಲುಪಬಹುದು.

ಬಸ್ ಮೂಲಕ:

• • ತಿರುಚಿರಾಪಳ್ಳಿಯು ಎಲ್ಲ ಪ್ರಮುಖ ನಗರಗಳೊಂದಿಗೆ ಬಸ್ ಸಂಪರ್ಕ ಇದೆ. ತಿರುಚ್ಚಿ ಕೇಂದ್ರ ಬಸ್ ನಿಲ್ದಾಣದಿಂದ ಶ್ರೀರಂಗಂಗೆ ಪ್ರತಿ 5-10 ನಿಮಿಷಕ್ಕೊಮ್ಮೆ ನಗರ ಸಾರಿಗೆ ಬಸ್‌ಗಳು (Route No. 1) ಲಭ್ಯವಿವೆ.

ವಿಮಾನದ ಮೂಲಕ:

• • ಹತ್ತಿರದ ವಿಮಾನ ನಿಲ್ದಾಣವೆಂದರೆ ತಿರುಚಿರಾಪಳ್ಳಿ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣ (TRZ). ಇಲ್ಲಿಂದ ಶ್ರೀರಂಗಂಗೆ ಸುಮಾರು 15 ಕಿ.ಮೀ ದೂರವಿದ್ದು, ಟ್ಯಾಕ್ಸಿ ಅಥವಾ ಕ್ಯಾಬ್ ಮೂಲಕ ತಲುಪಬಹುದು.

ಲೇಖನ- ಶ್ರೀನಿವಾಸ ಮಠ