ಇದೇ ಫೆಬ್ರವರಿ ತಿಂಗಳು ಜ್ಯೋತಿಷ್ಯ ಶಾಸ್ತ್ರದ ದೃಷ್ಟಿಯಿಂದ ಅತ್ಯಂತ ಕುತೂಹಲಕಾರಿ ಬದಲಾವಣೆಗಳಿಗೆ ಸಾಕ್ಷಿಯಾಗುತ್ತಿದೆ. ಫೆಬ್ರವರಿ 3ಕ್ಕೆ ಬುಧನು ಕುಂಭ ರಾಶಿಗೆ ಪ್ರವೇಶಿಸಿದ ಬೆನ್ನಿಗೇ ಫೆಬ್ರವರಿ 5ರಂದು ಪ್ರೇಮ, ಸೌಂದರ್ಯ ಮತ್ತು ಐಶ್ವರ್ಯದ ಕಾರಕನಾದ ಶುಕ್ರ ಗ್ರಹ ಕೂಡ ಕುಂಭ ರಾಶಿಯನ್ನು ಪ್ರವೇಶಿಸಲಿದ್ದಾನೆ. ಕುಂಭ ರಾಶಿಯಲ್ಲಿ ಅದಾಗಲೇ ಬುಧನಿರುತ್ತಾನೆ. ಈ ಶುಕ್ರ ಮತ್ತು ಬುಧರ ಸಂಯೋಗದಿಂದ ಅತ್ಯಂತ ಮಂಗಳಕರವಾದ “ಲಕ್ಷ್ಮೀನಾರಾಯಣ ಯೋಗ” ಸೃಷ್ಟಿ ಆಗಲಿದೆ. ಮಾರ್ಚ್ 1ರಂದು ಶುಕ್ರನು ತನ್ನ ಉಚ್ಚ ಕ್ಷೇತ್ರವಾದ ಮೀನ ರಾಶಿಗೆ ತೆರಳಲಿದ್ದಾನೆ. ಈ ಬದಲಾವಣೆಗಳ ಕುರಿತಾದ ಸಮಗ್ರ ಲೇಖನ ಇಲ್ಲಿದೆ.
ಶುಕ್ರ ಗ್ರಹ: ಜ್ಯೋತಿಷ್ಯ ಹಿನ್ನೆಲೆ ಮತ್ತು ಪ್ರಾಮುಖ್ಯತೆ
ನವಗ್ರಹಗಳಲ್ಲಿ ಶುಕ್ರನನ್ನು “ದೈತ್ಯ ಗುರು” ಮತ್ತು ಸುಖ-ಭೋಗಗಳ ಅಧಿಪತಿ ಎಂದು ಪರಿಗಣಿಸಲಾಗುತ್ತದೆ. ಕಲೆ, ಸಾಹಿತ್ಯ, ವೈವಾಹಿಕ ಸುಖ ಮತ್ತು ಆರ್ಥಿಕ ಸಮೃದ್ಧಿಗೆ ಶುಕ್ರನೇ ಆಧಾರ.
- ಸ್ವಕ್ಷೇತ್ರ: ವೃಷಭ ಮತ್ತು ತುಲಾ ರಾಶಿಗಳು ಶುಕ್ರನ ಸ್ವಂತ ಮನೆಗಳು.
- ಉಚ್ಚ ಕ್ಷೇತ್ರ: ಶುಕ್ರನು ಮೀನ ರಾಶಿಯಲ್ಲಿ ಉಚ್ಚನಾಗುತ್ತಾನೆ. ಇಲ್ಲಿ ಶುಕ್ರನು ಅತ್ಯಂತ ಶುಭ ಮತ್ತು ಶಕ್ತಿಯುತ ಫಲಗಳನ್ನು ನೀಡುತ್ತಾನೆ.
- ನೀಚ ಕ್ಷೇತ್ರ: ಕನ್ಯಾ ರಾಶಿಯಲ್ಲಿ ಶುಕ್ರನು ನೀಚನಾಗುತ್ತಾನೆ. ಈ ಸ್ಥಾನದಲ್ಲಿ ಶುಕ್ರನ ಶುಭತ್ವವು ಕಡಿಮೆಯಾಗಿ ಭೌತಿಕ ಸುಖಗಳಲ್ಲಿ ಅಡೆತಡೆಗಳು ಉಂಟಾಗುತ್ತದೆ.
- ಶುಕ್ರನಿಗೆ ಮೀಸಲಾದ ಕ್ಷೇತ್ರ: ತಮಿಳುನಾಡಿನ ಕುಂಭಕೋಣಂ ಬಳಿ ಇರುವ ಕಂಜನೂರು (ಶುಕ್ರನ್ ಕೋವಿಲ್) ಶುಕ್ರ ಗ್ರಹಕ್ಕೆ ಮೀಸಲಾದ ಪ್ರಸಿದ್ಧ ಕ್ಷೇತ್ರ. ಕರ್ನಾಟಕದಲ್ಲಿ ಶ್ರೀರಂಗಪಟ್ಟಣದ ಬಳಿಯಿರುವ ಕೆಲವು ದೇವಾಲಯಗಳು ಹಾಗೂ ಲಕ್ಷ್ಮೀ ದೇವಾಲಯಗಳಲ್ಲಿ ಶುಕ್ರನಿಗೆ ವಿಶೇಷ ಪೂಜೆ ಸಲ್ಲಿಸಲಾಗುತ್ತದೆ.
- ಪರಿಹಾರ: ಶುಕ್ರ ಗ್ರಹದ ದೋಷ ನಿವಾರಣೆಗೆ ಮತ್ತು ಅನುಗ್ರಹಕ್ಕೆ ದುರ್ಗಾ ದೇವಿಯ ಆರಾಧನೆ ಶ್ರೇಷ್ಠ. ಶುಕ್ರವಾರದಂದು ದುರ್ಗಾ ಅಷ್ಟೋತ್ತರ ಪಠಿಸುವುದು ಅಥವಾ ದೇವಿಗೆ ಮಲ್ಲಿಗೆ ಹೂವಿನ ಅರ್ಚನೆ ಮಾಡುವುದು ಉತ್ತಮ.
ಕುಂಭದಲ್ಲಿ ಲಕ್ಷ್ಮೀನಾರಾಯಣ ಯೋಗ
ಫೆಬ್ರವರಿ 5 ರಿಂದ ಮಾರ್ಚ್ 1 ರವರೆಗಿನ ಈ ಕಾಲಘಟ್ಟವು ಬಹಳ ವಿಶೇಷ. ಬುಧ (ನಾರಾಯಣನ ಕಾರಕ) ಮತ್ತು ಶುಕ್ರ (ಲಕ್ಷ್ಮಿಯ ಕಾರಕ) ಒಂದೇ ರಾಶಿಯಲ್ಲಿ ಸೇರಿದಾಗ ‘ಲಕ್ಷ್ಮೀನಾರಾಯಣ ಯೋಗ’ ಉಂಟಾಗುತ್ತದೆ. ಇದು ಬುದ್ಧಿವಂತಿಕೆಯಿಂದ ಸಂಪತ್ತನ್ನು ಗಳಿಸುವ ಯೋಗವಾಗಿದೆ. ಮಾರ್ಚ್ 1 ರ ನಂತರ ಶುಕ್ರನು ಮೀನ ರಾಶಿಗೆ ಹೋದಾಗ, ಭೋಗ ಜೀವನದ ಉತ್ತುಂಗವನ್ನು ಕಾಣಬಹುದು.
ಹನ್ನೆರಡು ರಾಶಿಗಳ ಮೇಲೆ ಆಗುವ ಪರಿಣಾಮಗಳು:
1. ಮೇಷ ರಾಶಿ
ನಿಮ್ಮ ಲಾಭ ಸ್ಥಾನದಲ್ಲಿ ಈ ಯೋಗ ಆಗುವುದರಿಂದ ಹಣಕಾಸಿನ ಹರಿವು ಹೆಚ್ಚಲಿದೆ. ಹಿರಿಯ ಅಧಿಕಾರಿಗಳಿಂದ ಬೆಂಬಲ ಸಿಗಲಿದೆ. ಮಾರ್ಚ್ ನಂತರ ಸುಖ-ಭೋಗಗಳಿಗಾಗಿ ವೆಚ್ಚ ಮಾಡುವಿರಿ.
2. ವೃಷಭ ರಾಶಿ
ರಾಶ್ಯಾಧಿಪತಿ ಶುಕ್ರನು ಹತ್ತನೇ ಮನೆಯಲ್ಲಿ ಇರುವುದರಿಂದ ವೃತ್ತಿಯಲ್ಲಿ ದೊಡ್ಡ ಬದಲಾವಣೆಗಳಾಗಲಿವೆ. ಹೊಸ ಉದ್ಯಮ ಆರಂಭಿಸಲು ಇದು ಸಕಾಲ. ಮಾರ್ಚ್ನಲ್ಲಿ ಆದಾಯದ ಹೊಸ ಮೂಲಗಳು ತೆರೆಯಲಿವೆ.
3. ಮಿಥುನ ರಾಶಿ
ಭಾಗ್ಯ ಸ್ಥಾನದಲ್ಲಿ ಶುಕ್ರ-ಬುಧರ ಮಿಲನವು ಅದೃಷ್ಟವನ್ನು ತರಲಿದೆ. ಧಾರ್ಮಿಕ ಕಾರ್ಯಕ್ರಮಗಳಲ್ಲಿ ಭಾಗವಹಿಸುವಿರಿ. ದೂರದ ಪ್ರಯಾಣವು ಲಾಭದಾಯಕವಾಗಿರಲಿದೆ.
4. ಕಟಕ ರಾಶಿ
ಎಂಟನೇ ಮನೆಯಲ್ಲಿ ಶುಕ್ರನ ಸಂಚಾರವು ಮಿಶ್ರಫಲ ನೀಡಲಿದೆ. ಪಿತ್ರಾರ್ಜಿತ ಆಸ್ತಿ ವಿಷಯಗಳಲ್ಲಿ ಪ್ರಗತಿ ಕಂಡುಬರಲಿದೆ. ಆರೋಗ್ಯದ ಕಡೆಗೆ ಹೆಚ್ಚಿನ ಗಮನ ಹರಿಸುವುದು ಅವಶ್ಯಕ.
5. ಸಿಂಹ ರಾಶಿ
ಸಪ್ತಮ ಭಾವದಲ್ಲಿ ಲಕ್ಷ್ಮೀನಾರಾಯಣ ಯೋಗವು ನಿಮ್ಮ ದಾಂಪತ್ಯದಲ್ಲಿ ಪ್ರೀತಿಯನ್ನು ತುಂಬಲಿದೆ. ಪಾಲುದಾರಿಕೆ ವ್ಯವಹಾರ ನಡೆಸುವವರಿಗೆ ಭಾರಿ ಲಾಭ ನಿರೀಕ್ಷಿಸಬಹುದು.
6. ಕನ್ಯಾ ರಾಶಿ
ಶತ್ರುಗಳ ಮೇಲೆ ನಿಮ್ಮ ಮೇಲುಗೈ ಇರಲಿದೆ. ಹಳೆಯ ಸಾಲಗಳಿಂದ ಮುಕ್ತಿ ಸಿಗಬಹುದು. ಆದರೆ ಅತಿಯಾದ ಭೋಗ ಜೀವನದ ಬಗ್ಗೆ ಎಚ್ಚರಿಕೆ ಇರಲಿ.
ನಿಮ್ಮ ಜಾತಕದಲ್ಲಿ ಮಾಲವ್ಯ ಯೋಗವಿದೆಯೇ? ಐಷಾರಾಮಿ, ಕಲಾತ್ಮಕ ಜೀವನದ ರಾಜಯೋಗ
7. ತುಲಾ ರಾಶಿ
ಪಂಚಮ ಭಾವದಲ್ಲಿ ಈ ಸಂಚಾರವು ನಿಮ್ಮ ಕ್ರಿಯಾಶೀಲತೆಯನ್ನು ಹೆಚ್ಚಿಸುತ್ತದೆ. ಪ್ರೇಮ ವಿವಾಹಕ್ಕೆ ಮನೆಯವರ ಸಮ್ಮತಿ ಸಿಗುವ ಸಾಧ್ಯತೆ ಇದೆ. ಮಕ್ಕಳಿಂದ ಶುಭ ವಾರ್ತೆ ಕೇಳುವಿರಿ.
8. ವೃಶ್ಚಿಕ ರಾಶಿ
ನಾಲ್ಕನೇ ಮನೆಯಲ್ಲಿ ಸುಖ ಹೆಚ್ಚಾಗಲಿದೆ. ಮನೆಯ ನವೀಕರಣ ಅಥವಾ ಅಲಂಕಾರಿಕ ವಸ್ತುಗಳ ಖರೀದಿ ಮಾಡುವಿರಿ. ತಾಯಿಯ ಕಡೆಯಿಂದ ಸಂಪತ್ತು ಸಿಗುವ ಯೋಗವಿದೆ.
9. ಧನು ರಾಶಿ
ನಿಮ್ಮ ಸಂವಹನ ಶಕ್ತಿ ವೃದ್ಧಿಸಲಿದೆ. ನೆರೆಹೊರೆಯವರೊಂದಿಗೆ ಬಾಂಧವ್ಯ ಸುಧಾರಿಸಲಿದೆ. ಸಣ್ಣ ಪ್ರವಾಸಗಳು ಮನಸ್ಸಿಗೆ ಮುದ ನೀಡಲಿವೆ.
10. ಮಕರ ರಾಶಿ
ಧನ ಸ್ಥಾನದಲ್ಲಿ ಲಕ್ಷ್ಮೀನಾರಾಯಣ ಯೋಗವು ಆರ್ಥಿಕವಾಗಿ ನಿಮ್ಮನ್ನು ಸದೃಢಗೊಳಿಸಲಿದೆ. ಮಾತು ಮಧುರವಾಗಲಿದ್ದು, ಎಲ್ಲರ ಮನ ಗೆಲ್ಲುವಿರಿ. ಮಾರ್ಚ್ ನಂತರ ಹೂಡಿಕೆಯಲ್ಲಿ ಲಾಭ ಸಿಗಲಿದೆ.
11. ಕುಂಭ ರಾಶಿ
ನಿಮ್ಮದೇ ರಾಶಿಯಲ್ಲಿ ಈ ಯೋಗ ಸೃಷ್ಟಿಯಾಗುತ್ತಿರುವುದರಿಂದ ವ್ಯಕ್ತಿತ್ವದಲ್ಲಿ ಹೊಸ ಕಳೆ ಬರಲಿದೆ. ಸೌಂದರ್ಯದ ಕಡೆಗೆ ಆಸಕ್ತಿ ಹೆಚ್ಚಲಿದೆ. ಕಲಾ ಕ್ಷೇತ್ರದಲ್ಲಿರುವವರಿಗೆ ಅಪಾರ ಗೌರವ ಸಿಗಲಿದೆ.
12. ಮೀನ ರಾಶಿ
ಐಷಾರಾಮಿ ಜೀವನಕ್ಕೆ ಅಧಿಕ ವ್ಯಯ ತಂದರೂ ವಿದೇಶಿ ಸಂಬಂಧಗಳಿಂದ ಲಾಭ ಮತ್ತು ಮಾರ್ಚ್ನಲ್ಲಿ ಬರಲಿರುವ ನಿಮ್ಮ ಉಚ್ಚ ಶುಕ್ರನ ಸುವರ್ಣ ಕಾಲಕ್ಕೆ ಭದ್ರವಾದ ಆರ್ಥಿಕ ಅಡಿಪಾಯವನ್ನು ಹಾಕಿಕೊಡಲಿದೆ.
ಕೊನೆಮಾತು
ಈ ಗ್ರಹ ಬದಲಾವಣೆಯು ಆರ್ಥಿಕ ಸ್ಥಿರತೆ ಮತ್ತು ಬಾಂಧವ್ಯಗಳ ಸುಧಾರಣೆಗೆ ಉತ್ತಮ ಅವಕಾಶ ನೀಡುತ್ತದೆ. ವಿಶೇಷವಾಗಿ ಶುಕ್ರನು ಉಚ್ಚನಾದಾಗ ಕಲೆ, ಸಿನಿಮಾ ಮತ್ತು ಸಂವಹನ ಕ್ಷೇತ್ರಗಳಲ್ಲಿ ಜಾಗತಿಕ ಮಟ್ಟದ ಬದಲಾವಣೆಗಳಾಗಲಿವೆ. ನಿಮ್ಮ ಜಾತಕದಲ್ಲಿ ಶುಕ್ರನ ಸ್ಥಾನ ದುರ್ಬಲವಾಗಿದ್ದರೆ ದುರ್ಗಾ ದೇವಿಯ ದರ್ಶನ ಮಾಡಿ ಅಥವಾ ಬಿಳಿ ಬಣ್ಣದ ವಸ್ತುಗಳನ್ನು ದಾನ ಮಾಡಿ.
ಲೇಖನ- ಶ್ರೀನಿವಾಸ ಮಠ
