ತಮಿಳುನಾಡಿನ ಮೈಲಾಡುದುರೈ ಜಿಲ್ಲೆಯಲ್ಲಿರುವ ವೈತೀಶ್ವರನ್ ಕೋವಿಲ್ (Vaitheeswaran Koil) ಭಾರತದ ಅತ್ಯಂತ ಶಕ್ತಿಯುತ ಹಾಗೂ ಪುರಾತನ ದೇಗುಲಗಳಲ್ಲಿ ಒಂದು. ಇದನ್ನು “ಪುಳ್ಳಿರುಕ್ಕುವೇಲೂರು” ಎಂದೂ ಕರೆಯುತ್ತಾರೆ. ಈ ಕ್ಷೇತ್ರವು ನವಗ್ರಹಗಳಲ್ಲಿ ಒಂದಾದ ‘ಮಂಗಳ’ (ಕುಜ) ಗ್ರಹಕ್ಕೆ ಸಂಬಂಧಿಸಿದ ಕ್ಷೇತ್ರವಾಗಿ ಪ್ರಸಿದ್ಧವಾಗಿದ್ದರೂ ಇಲ್ಲಿನ ಮುಖ್ಯ ಆರಾಧ್ಯ ದೈವ ‘ವೈದ್ಯನಾಥೇಶ್ವರ’. ಮನುಷ್ಯನಿಗೆ ಎಷ್ಟು ಸಂಪತ್ತು ಇದ್ದರೂ ಆರೋಗ್ಯ ಇಲ್ಲದಿದ್ದರೆ ಎಲ್ಲವೂ ಶೂನ್ಯ. ಅಂತಹ ಅನಾರೋಗ್ಯದ ತೊಂದರೆಯಿಂದ ಮುಕ್ತಿ ನೀಡಿ, ಭಕ್ತರ ಕಷ್ಟಗಳನ್ನು ನಿವಾರಿಸುವ ದೈವಿಕ ಸ್ಥಳವೇ ಈ ವೈತೀಶ್ವರನ್ ಕೋವಿಲ್.
ಕ್ಷೇತ್ರದ ಪೌರಾಣಿಕ ಹಿನ್ನೆಲೆ (ಸ್ಥಳ ಪುರಾಣ):
‘ವೈತೀಶ್ವರನ್’ ಎಂದರೆ ‘ವೈದ್ಯರ ದೇವರು’ ಎಂದರ್ಥ. ಶಿವನು ಇಲ್ಲಿ ವೈದ್ಯನ ರೂಪದಲ್ಲಿ ನೆಲೆಸಿದ್ದಾನೆ ಎಂಬ ನಂಬಿಕೆಯಿದೆ. ಪುರಾಣಗಳ ಪ್ರಕಾರ, ಯುದ್ಧದಲ್ಲಿ ಗಾಯಗೊಂಡ ದೇವತೆಗಳು ಮತ್ತು ಸುಬ್ರಹ್ಮಣ್ಯ ಸ್ವಾಮಿಯ ಸೈನ್ಯವನ್ನು ಗುಣಪಡಿಸಲು ಶಿವನು ಇಲ್ಲಿ ವೈದ್ಯನಾಗಿ ಬಂದು ಚಿಕಿತ್ಸೆ ನೀಡಿದನಂತೆ.
ಜಟಾಯು ಮೋಕ್ಷ: ರಾಮಾಯಣ ಕಾಲದಲ್ಲಿ ರಾವಣನೊಂದಿಗೆ ಹೋರಾಡಿ ಗಾಯಗೊಂಡ ಜಟಾಯು ಪಕ್ಷಿಯು ಈ ಕ್ಷೇತ್ರದಲ್ಲಿ ಬಿದ್ದಿತ್ತು, ಶ್ರೀರಾಮನು ಜಟಾಯುವಿಗೆ ಇಲ್ಲಿಯೇ ಅಂತ್ಯಕ್ರಿಯೆ ನಡೆಸಿ ಮೋಕ್ಷ ನೀಡಿದನು ಎನ್ನಲಾಗುತ್ತದೆ. ಇಂದಿಗೂ ದೇವಸ್ಥಾನದ ಆವರಣದಲ್ಲಿ ‘ಜಟಾಯು ಕುಂಡ’ವನ್ನು ಕಾಣಬಹುದು.
ಅಂಗಾರಕ (ಕುಜ) ಪರಿಹಾರ: ಕುಜ ಗ್ರಹವು ಒಮ್ಮೆ ತೀವ್ರವಾದ ಚರ್ಮರೋಗದಿಂದ ಬಳಲುತ್ತಿದ್ದಾಗ, ಇಲ್ಲಿನ ವೈದ್ಯನಾಥೇಶ್ವರನಿಗೆ ಪೂಜೆ ಸಲ್ಲಿಸಿ ರೋಗಮುಕ್ತನಾದನು. ಆದ್ದರಿಂದ ಇದು ನವಗ್ರಹಗಳಲ್ಲಿ ಅಂಗಾರಕ (Mars) ಕ್ಷೇತ್ರವೆಂದು ಪ್ರಸಿದ್ಧವಾಗಿದೆ.
ಮುಖ್ಯ ದೇವತೆಗಳು:
ವೈದ್ಯನಾಥೇಶ್ವರ: ಗರ್ಭಗುಡಿಯಲ್ಲಿ ಶಿವನು ಲಿಂಗ ರೂಪದಲ್ಲಿ ನೆಲೆಸಿದ್ದಾನೆ. ಭಕ್ತರ ಸಕಲ ರೋಗಗಳನ್ನು ಗುಣಪಡಿಸುವ ಧನ್ವಂತರಿ ಸ್ವರೂಪ ಇವನದು.
ತೈಯಲ್ ನಾಯಕಿ ಅಮ್ಮನ್: ಈಕೆಯು ಪಾರ್ವತಿಯ ಸ್ವರೂಪ. ಶಿವನ ಜೊತೆಯಲ್ಲಿ ವೈದ್ಯಕೀಯ ತೈಲದ ಬಟ್ಟಲನ್ನು ಹಿಡಿದು ಚಿಕಿತ್ಸೆಯಲ್ಲಿ ನೆರವಾಗುತ್ತಾಳೆ ಎಂಬ ನಂಬಿಕೆಯಿದೆ.
ಸೆಲ್ವ ಮುತ್ತುಕುಮಾರಸ್ವಾಮಿ: ಸುಬ್ರಹ್ಮಣ್ಯ ಸ್ವಾಮಿಯ ಅತ್ಯಂತ ಸುಂದರ ವಿಗ್ರಹ ಇಲ್ಲಿದೆ. ಸಂತಾನ ಅಪೇಕ್ಷಿತರಾಗಿದ್ದು, ಆ ಪ್ರಯತ್ನಕ್ಕೆ ಅಡೆತಡೆಗಳು ಎದುರಾಗುತ್ತಿರುವವರು ಈ ದೇವರಿಗೆ ವಿಶೇಷ ಪೂಜೆ ಸಲ್ಲಿಸಿದಲ್ಲಿ ಅವರ ಪ್ರಾರ್ಥನೆ ಫಲಿಸುತ್ತದೆ ಎಂಬುದು ಭಕ್ತರ ನಂಬಿಕೆಯಾಗಿದೆ.
ಕುಜ ದೋಷ, ವಿವಾಹ ವಿಳಂಬ, ಭೂಮಿ ವ್ಯಾಜ್ಯಕ್ಕೆ ಪರಿಹಾರ ನೀಡುವ ಅಪರೂಪದ ಅಂಗಾರಕ ದೇವಾಲಯ – ತುಮಕೂರಿನ ಶ್ರೀಕೃಷ್ಣ ನಗರ
ಕ್ಷೇತ್ರದ ವಿಶೇಷ:
ಪವಿತ್ರ ಪ್ರಸಾದ – ‘ತಿರುಚಂದುರು ಉಂಡೈ’: ಇಲ್ಲಿನ ಅತ್ಯಂತ ಪ್ರಮುಖ ವಿಶೇಷವೆಂದರೆ ರೋಗ ನಿವಾರಕ ಪ್ರಸಾದ. ದೇವಸ್ಥಾನದ ಮಣ್ಣು, ವಿಭೂತಿ ಮತ್ತು ಬೇವು ಹಾಗೂ ಶ್ರೀಗಂಧದ ಮಿಶ್ರಣದಿಂದ ಸಣ್ಣ ಗುಳಿಗೆಗಳನ್ನು ತಯಾರಿಸಲಾಗುತ್ತದೆ. ಇದನ್ನು ಸೇವಿಸುವುದರಿಂದ ದೀರ್ಘಕಾಲದ ಕಾಯಿಲೆಗಳು ಗುಣವಾಗುತ್ತವೆ ಎಂಬುದು ಭಕ್ತರ ದೃಢ ವಿಶ್ವಾಸ.
ನಾಡಿ ಜ್ಯೋತಿಷ್ಯದ ತವರು: ವೈತೀಶ್ವರನ್ ಕೋವಿಲ್ ಜಗತ್ತಿನಾದ್ಯಂತ ಪ್ರಸಿದ್ಧಿ ಆಗಿರುವುದು ಇಲ್ಲಿನ ‘ನಾಡಿ ಜ್ಯೋತಿಷ್ಯ’ದಿಂದ. ಪ್ರಾಚೀನ ಕಾಲದ ಋಷಿಮುನಿಗಳು ಮಾನವಕುಲದ ಭವಿಷ್ಯವನ್ನು ತಾಳೆಗರಿಗಳಲ್ಲಿ ಬರೆದಿಟ್ಟಿದ್ದಾರೆ ಎನ್ನಲಾಗುವ ಈ ಕೇಂದ್ರಗಳು ದೇವಸ್ಥಾನದ ಸುತ್ತಮುತ್ತ ನೂರಾರು ಸಂಖ್ಯೆಯಲ್ಲಿವೆ.
ಸಿದ್ಧಾಮೃತ ತೀರ್ಥ: ದೇವಸ್ಥಾನದ ಆವರಣದಲ್ಲಿರುವ ದೊಡ್ಡ ಪುಷ್ಕರಣಿಯೇ ‘ಸಿದ್ಧಾಮೃತ ತೀರ್ಥ’. ಇಲ್ಲಿ ಸ್ನಾನ ಮಾಡುವುದರಿಂದ ಚರ್ಮ ರೋಗಗಳು ನಿವಾರಣೆಯಾಗುತ್ತವೆ ಎಂಬ ನಂಬಿಕೆಯಿದೆ.
ಯಾರು ಇಲ್ಲಿಗೆ ಭೇಟಿ ನೀಡುತ್ತಾರೆ?
ಕುಜ ದೋಷ ಇರುವವರು: ಮದುವೆ ತಡವಾಗುತ್ತಿದ್ದರೆ ಅಥವಾ ದಾಂಪತ್ಯದಲ್ಲಿ ಸಮಸ್ಯೆಗಳಿದ್ದರೆ ಇಲ್ಲಿ ಅಂಗಾರಕನಿಗೆ ವಿಶೇಷ ಪೂಜೆ ಸಲ್ಲಿಸುತ್ತಾರೆ.
ಅನಾರೋಗ್ಯದಿಂದ ಬಳಲುತ್ತಿರುವವರು: ಯಾವುದೇ ವೈದ್ಯಕೀಯ ಚಿಕಿತ್ಸೆಯಿಂದ ಚೇತರಿಗೆ ಕಾಣದ ಕಾಯಿಲೆಗಳಿದ್ದಲ್ಲಿ ವೈದ್ಯನಾಥೇಶ್ವರನ ಪೂಜೆ ಮಾಡಿಸುತ್ತಾರೆ.
ಶತ್ರು ಬಾಧೆ ನಿವಾರಣೆ: ಭೂಮಿಗೆ ಸಂಬಂಧಿಸಿದ ವಿವಾದಗಳು ಅಥವಾ ಕೋರ್ಟ್ ಕೇಸುಗಳಿದ್ದರೆ ಇಲ್ಲಿನ ದೇವರಿಗೆ ಪ್ರಾರ್ಥನೆ ಸಲ್ಲಿಸಿದರೆ ಇತ್ಯರ್ಥ ಆಗುತ್ತದೆ ಎಂಬ ನಂಬಿಕೆ ಸಹ ಇದೆ.
ಪೂಜಾ ವಿಧಾನ ಮತ್ತು ಹರಕೆ
ಭಕ್ತರು ಇಲ್ಲಿ ಉಪ್ಪು ಮತ್ತು ಮೆಣಸನ್ನು ದೇವಸ್ಥಾನದ ಕೊಳಕ್ಕೆ ಅರ್ಪಿಸುತ್ತಾರೆ. ಇದರಿಂದ ದೇಹದ ಮೇಲಿನ ಗುಳ್ಳೆಗಳು ಮತ್ತು ಚರ್ಮದ ಕಾಯಿಲೆಗಳು ದೂರವಾಗುತ್ತವೆ ಎಂಬ ಭಾವನೆಯಿದೆ. ಅಲ್ಲದೆ, ಬೆಲ್ಲದಿಂದ ಮಾಡಿದ ಸಣ್ಣ ಆಕೃತಿಗಳನ್ನು ಅರ್ಪಿಸುವ ಪದ್ಧತಿಯೂ ಇಲ್ಲಿದೆ.
ತಮಿಳುನಾಡಿನ ಮೈಲಾಡುದುರೈ ಜಿಲ್ಲೆಯಲ್ಲಿರುವ ಸುಪ್ರಸಿದ್ಧ ವೈತೀಶ್ವರನ್ ಕೋವಿಲ್ ದೇವಾಲಯದ ಸಮಯ ಮತ್ತು ಅಲ್ಲಿಗೆ ತಲುಪುವ ಮಾರ್ಗದ ವಿವರಗಳು ಇಲ್ಲಿವೆ:
ದೇವಾಲಯದ ಸಮಯ:
ಬೆಳಗ್ಗೆ 6ರಿಂದ ಮಧ್ಯಾಹ್ನ 1 ಗಂಟೆವರೆಗೆ
ಸಂಜೆ 4ರಿಂದ ರಾತ್ರಿ 9 ಗಂಟೆವರೆಗೆ.
(ವಿಶೇಷ ದಿನಗಳಲ್ಲಿ ಮತ್ತು ಹಬ್ಬದ ಸಂದರ್ಭಗಳಲ್ಲಿ ಈ ಸಮಯದಲ್ಲಿ ಬದಲಾವಣೆಗಳಿರಬಹುದು)
ತಲುಪುವುದು ಹೇಗೆ?
ವಿಮಾನದ ಮೂಲಕ: ಇಲ್ಲಿಗೆ ಸಮೀಪದ ವಿಮಾನ ನಿಲ್ದಾಣವೆಂದರೆ ತಿರುಚಿರಾಪಳ್ಳಿ (Trichy). ಇದು ಸುಮಾರು 150 ಕಿ.ಮೀ ದೂರದಲ್ಲಿದೆ. ಇಲ್ಲಿಂದ ನೀವು ಟ್ಯಾಕ್ಸಿ ಅಥವಾ ಬಸ್ ಮೂಲಕ ದೇವಾಲಯವನ್ನು ತಲುಪಬಹುದು.
ರೈಲಿನ ಮೂಲಕ: ವೈತೀಶ್ವರನ್ ಕೋವಿಲ್ ರೈಲು ನಿಲ್ದಾಣ (Vaitheeswaran Koil Railway Station) ಇದು ಚೆನ್ನೈ ಮತ್ತು ಮೈಲಾಡುದುರೈ ಮಾರ್ಗದಲ್ಲಿದೆ. ನಿಲ್ದಾಣದಿಂದ ದೇವಾಲಯವು ಕೇವಲ 1-2 ಕಿ.ಮೀ ದೂರದಲ್ಲಿದೆ. ಹತ್ತಿರದ ಪ್ರಮುಖ ರೈಲು ನಿಲ್ದಾಣಗಳಾದ ಮೈಲಾಡುದುರೈ (Mayiladuthurai) ಅಥವಾ ಚಿದಂಬರಂ (Chidambaram) ನಿಂದಲೂ ನೀವು ಸುಲಭವಾಗಿ ಬರಬಹುದು.
ರಸ್ತೆಯ ಮೂಲಕ (Bus/Taxi): ಚಿದಂಬರಂ 15 ಕಿ.ಮೀ, ಮೈಲಾಡುದುರೈ 15 ಕಿ.ಮೀ ಮತ್ತು ಕುಂಭಕೋಣಂ 50 ಕಿ.ಮೀ ಇದ್ದು, ಅಲ್ಲಿಂದ ನಿಯಮಿತವಾಗಿ ಬಸ್ ಸೌಲಭ್ಯವಿದೆ. ಚೆನ್ನೈನಿಂದ ಸುಮಾರು 260 ಕಿ.ಮೀ ದೂರವಿದ್ದು, 6-7 ಗಂಟೆಗಳ ಪ್ರಯಾಣದ ಮೂಲಕ ತಲುಪಬಹುದು.
ಲೇಖನ- ಶ್ರೀನಿವಾಸ ಮಠ
